India

ന്യൂഡൽഹി:അസാധു നോട്ടുകൾ മാറ്റി നൽകുന്നതിനായി ജനങ്ങൾക്ക് സമയം നൽകണമെന്നും മതിയായ കാരണങ്ങളുള്ളവരെ അസാധു നോട്ടുകൾ മാറ്റിയെടുക്കുന്നതിൽ നിന്നും തടയാനാവില്ല എന്ന് സുപ്രീം കോടതി.ഈ വിഷയത്തിൽ മറുപടി നല്കാൻ കേന്ദ്ര സർക്കാരിനും റിസേർവ് ബാങ്കിനും സുപ്രീം കോടതി 14 ദിവസത്തെ സമയം അനുവദിച്ചിട്ടുണ്ട്.അസാധു നോട്ടുകൾ മാറിയെടുക്കാൻ സമയം അനുവദിക്കണമെന്നുള്ള ഹർജി പരിഗണിക്കുമ്പോഴാണ് സുപ്രീം കോടതി ചീഫ് ജസ്റ്റിസ് ജെ.എസ് ഖേഹർ റിസേർവ് ബാങ്കിൽ നിന്നും കേന്ദ്ര സർക്കാരിൽ നിന്നും പ്രതികരണം ആവശ്യപ്പെട്ടിട്ടുള്ളത്.ന്യായമായ കാരണങ്ങൾ ചൂണ്ടി കാണിച്ച ഒരു വ്യക്തിക്ക് അനുവദിച്ച സമയത്തിനുള്ളിൽ പണം നിക്ഷേപിക്കാൻ കഴിഞ്ഞില്ലെങ്കിൽ അയാളെ അസാധുനോട്ടുകൾ മാറിയെടുക്കുന്നതിൽ നിന്നും വിലക്കാൻ കഴിയില്ലെന്നാണ് കോടതിയുടെ വാദം.പ്രശ്ന പരിഹാരം കണ്ടെത്തണമെന്ന് ആവശ്യപ്പെട്ട കോടതി തീരുമാനം പുനഃപരിശോധിക്കാൻ തയ്യാറായില്ലെങ്കിൽ ഗുരുതര പ്രത്യാഘാതങ്ങൾ ഉണ്ടാകുമെന്നും മുന്നറിയിപ്പ് നൽകി.

ന്യൂഡൽഹി: ‘ആവി’ പറക്കുന്ന മദ്യം കഴിച്ച യുവാവിന്റെ ആമാശയത്തിൽ തുള വീണു.മുപ്പതു വയസ്സുകാരനായ യുവാവ് കഴിച്ച മദ്യത്തിലെ നൈട്രജൻ ദ്രാവകം ആമാശയത്തിനുള്ളിൽ പ്രവേശിച്ച് വികസിച്ചതാണ് തുള വീഴാൻ കാരണം.അസഹ്യമായ വേദനയും ശ്വാസതടസ്സവും വയറുവീർക്കലും അനുഭവപ്പെട്ട യുവാവിനെ ഉടനടി ആശുപത്രിയിലെത്തിക്കുകയായിരുന്നു. ഡൽഹി ബാറിലെ ആകർഷകമായ ഇനങ്ങളിലൊന്നാണ് വെള്ള പുക ഉയരുന്ന കോക്‌ടെയ്ൽ. ഇതിലെ പുക പൂർണ്ണമായും പോയാൽ മാത്രമേ ഇത് കഴിക്കാൻ പാടുള്ളൂ.എന്നാൽ ഇതറിയാതെ യുവാവ് കോക്റ്റൈൽ കിട്ടിയപാടെ കഴിച്ചതാണ് അപകടകാരണം.ഒരു ലിറ്റർ നൈട്രജൻ ദ്രാവകത്തിനു  ഇരുപതു ഡിഗ്രി സെൽഷ്യസിൽ 694 ലിറ്ററായി വികസിക്കാനുള്ള കഴിവുണ്ട്.നീരാവിയായി പുറത്തു പോകുന്ന ഈ നൈട്രജന് ചുറ്റിലുമുള്ളവയെ തണുപ്പിക്കാനും കഴിയും.എന്നാൽ ആമാശയത്തിലെത്തിയ നീരാവിക്കു പുറത്തു പോകാൻ കഴിയാത്തതിനാലാണ് തുള വീണത്.ആമാശയം പുസ്തകം പോലെ തുറന്നു പോയിരുന്നു എന്നാണ് ഡോക്ടർമാർ പറഞ്ഞത്.അതിനാൽ ആമാശയത്തിന്റെ ഒരു ഭാഗം നീക്കം ചെയ്യേണ്ടി വന്നു.യുവാവ് ആരോഗ്യനില വീണ്ടെടുത്ത് വരുന്നു.

ദുബായ്:ഇരുപത്തിരണ്ടോളം കപ്പലുകളിലായി നൂറോളം ഇന്ത്യക്കാർ കടലിൽ കുടുങ്ങി കിടക്കുകയാണെന്ന് റിപ്പോർട്ട്.സഹായം ആവശ്യപ്പെട്ട് നാവികർ ദുബായിയിലെ ഇന്ത്യൻ കോൺസുലേറ്റ് ജനറലിന്റെ സഹായം തേടിയെന്നാണ് സൂചന.കടലിൽ കുടുങ്ങിയ നാവികരുടെ നിരവധി കോളുകൾ ലഭിച്ചതായി ഇന്ത്യൻ കോൺസുൽ ജനറൽ വിപുൽ പറഞ്ഞു.എന്നാൽ ഇപ്പോൾ പരിഗണിക്കുന്നത് ഇരുപത്തി രണ്ടു കപ്പലുകളിലെ നാവികരെയാണ്.ദീർഘ കാലമായി ഇവർക്ക് ശമ്പളമോ ഭക്ഷണമോ വെള്ളമോ ഇന്ധനമോ ലഭിക്കാറില്ലെന്നു നാവികർ പരാതി നൽകിയിട്ടുണ്ട്.ശമ്പളകുടിശ്ശിക ലഭിച്ചാൽ ജോലി രാജിവെച്ച് നാട്ടിലേക്ക് മടങ്ങാൻ തയ്യാറായി നിൽക്കുകയാണ് ഇവരിൽ ഭൂരിഭാഗവും തൊഴിലാളികളുടെ ആവശ്യങ്ങൾ പരിഹരിക്കാൻ കോൺസുലർ കപ്പൽ ഉടമകളുമായും ഏജന്റുമാരുമായും ബന്ധപ്പെട്ടുവരികയാണ്.കഴിഞ്ഞ ഏതാനും നാളുകളായി 36 നാവികരെ നാട്ടിലേക്കു അയക്കാൻ കോൺസുലേറ്റിനു സാധിച്ചിട്ടുണ്ട്.

ഹൈദരാബാദ്:കുടിവെള്ളമാണെന്നു കരുതി ആസിഡ് കുടിച്ച സഹോദരങ്ങളായ രണ്ടു കുട്ടികൾ ഗുരുതരാവസ്ഥയിൽ.തെലുങ്കാനയിലെ മെഹ്ബൂബ നഗറിനു സമീപത്തെ സേക്രട് ഹാർട്ട് സ്കൂളിലെ വിദ്യാർത്ഥിയും സഹോദരനുമാണ് വെള്ളമാണെന്നു കരുതി ആസിഡ് കുടിച്ചത്.കുട്ടികളുടെ മുത്തശ്ശി ഈ സ്കൂളിൽ ജോലി നോക്കിയിരുന്നു.ഇവരുടെ കൊച്ചു മകൻ ഈ സ്കൂളിലെ രണ്ടാം ക്ലാസ് വിദ്യാർത്ഥിയാണ്.മുത്തശ്ശി സ്കൂളിലേക്ക് വരുമ്പോൾ മൂന്നു വയസ്സുള്ള ഇളയ കുട്ടിയേയും ഒപ്പം കൂട്ടിയിരുന്നു.സംഭവം നടക്കുന്ന ദിവസം മുത്തശ്ശി ഇരിക്കുന്ന സ്ഥലത്തു സൂക്ഷിച്ചിരുന്ന ദ്രാവകം വെള്ളമാണെന്നു കരുതി കുട്ടികൾ കുടിക്കുകയായിരുന്നു.നേർപ്പിച്ച ആസിഡായിരുന്നു ഇത്.വെള്ളം കുടിച്ചതിനു പിന്നാലെ കുട്ടികൾ ഛർദിച്ചതിനെ തുടർന്ന് സ്കൂൾ അധികൃതർ ഇവരെ ആശുപത്രിയിൽ പ്രവേശിപ്പിച്ചു.ഇവരുടെ നില ഗുരുതരമായി തുടരുകയാണ്.മുത്തശ്ശിക്കെതിരെ പോലീസ് വധശ്രമത്തിന് കേസെടുത്തു.