India

ന്യൂഡൽഹി:രാഷ്‌ട്രപതി തിരഞ്ഞെടുപ്പ് ഫലം ഇന്ന് വൈകിട്ട് അഞ്ചു മണിയോടെ അറിയാം.എൻ.ഡി.എ സ്ഥാനാർഥി രാംനാഥ് കോവിന്ദും പ്രതിപക്ഷ പാർട്ടികളുടെ സ്ഥാനാർഥി മീര കുമാറും തമ്മിലാണ് മത്സരം.പാർലമെന്റ് മന്ദിരത്തിൽ രാവിലെ 11 മണിക്ക് വോട്ടെണ്ണൽ ആരംഭിക്കും.പാർലമെന്റിലെ ബാലറ്റ് പെട്ടികളാണ് ആദ്യം തുറക്കുക.തുടർന്ന് സംസ്ഥാന നിയമസഭകളിൽ നിന്നെത്തിച്ച പെട്ടികളിലെ വോട്ടുകൾ സംസ്ഥാനങ്ങളുടെ പേരിന്റെ ഇംഗ്ലീഷ് അക്ഷരക്രമത്തിൽ എണ്ണും.776 എം.പി മാരും 4120 എം.എൽ.എ മാരുമാണ് ഇത്തവണ വോട്ടു ചെയ്തത്.ചരിത്രത്തിലെ ഏറ്റവും കൂടിയ വോട്ടിങ് ആയിരുന്നു ഇത്തവണ.വൈകിട്ട് അഞ്ചു മണിയോടെ ഫലം പ്രഖ്യാപിക്കും.വോട്ടെണ്ണൽ പൂർത്തിയായ ശേഷം വിജയിക്ക് വരണാധികാരി അനൂപ് മിശ്ര സാക്ഷ്യപത്രം നൽകും.

രാമേശ്വരം:തമിഴ്‌നാട്ടിൽ സർക്കാർ ബസ്സിന്‌ നേരെയുണ്ടായ കല്ലേറിൽ 20 പേർക്ക് പരിക്ക്.കഴിഞ്ഞ ദിവസം തങ്കച്ചി മഠത്തിൽ മത്സ്യത്തൊഴിലാളി മരിച്ചതുമായി ബന്ധപ്പെട്ടായിരുന്നു ആക്രമണം.രണ്ടു ബസ് ഡ്രൈവർമാർക്ക് കല്ലേറിൽ ഗുരുതരമായി പരിക്കേറ്റു.സംഘർഷവുമായി ബന്ധപ്പെട്ട് പതിനൊന്നു പേരെ പോലീസ് അറസ്റ്റ് ചെയ്തു.ചൊവ്വാഴ്ച രാത്രി മത്സ്യത്തൊഴിലാളി സഞ്ചരിച്ചിരുന്ന ബൈക്ക് സർക്കാർ ബസ്സിലിടിച്ചു മത്സ്യത്തൊഴിലാളി മരിച്ചിരുന്നു.അപകടത്തിൽ അദ്ദേഹത്തിന്റെ ഭാര്യക്കും ഗുരുതരമായി പരിക്കേറ്റിരുന്നു.

ഗോവ:ഇരുപത് വര്‍ഷമായി വീട്ടുകാര്‍ ഇരുട്ടുമുറിയില്‍ പൂട്ടിയിട്ട യുവതിയെ മോചിപ്പിച്ചു.വടക്കന്‍ ഗോവയിലെ കാന്‍ഡോളിം ഗ്രാമത്തിലാണ് സംഭവം. വിവാഹിതയായ യുവതിയുടെ  ഭര്‍ത്താവ് മുംബൈ സ്വദേശിയാണ്. ഭര്‍ത്താവിന്റെ വീട്ടില്‍ നിന്നും ഗോവയിലുള്ള സ്വന്തം വസതിയിലെത്തിയ യുവതിയെ നോര്‍മല്‍ അല്ലായെന്ന കാരണത്താല്‍ വീട്ടുകാര്‍ മുറിയില്‍ പൂട്ടിയിടുകയായിരുന്നു.ഒരു കൂട്ടം വനിതാ പൊലീസ് ഉദ്യോഗസ്ഥരുടെ നേതൃത്വത്തിലാണ് യുവതിയെ രക്ഷപ്പെടുത്തിയത്. പൊലീസ് എത്തുമ്പോള്‍ വസ്ത്രമില്ലാതെ അഴുക്ക് നിറഞ്ഞ മുറിയില്‍ കഴിയുകയായിരുന്നുവെന്ന് മുതിര്‍ന്ന പൊലീസ് ഉദ്യോഗസ്ഥന്‍ പറഞ്ഞു. മാതാപിതാക്കളുടെ അറിവോടെയാണ് യുവതിയെ പൂട്ടിയിട്ടത്. ഒരു ജനാല മാത്രമായിരുന്നു പുറംലോകത്തേക്കുള്ള ഏക ആശ്രയം. ഇതില്‍ കൂടിയാണ് യുവതിക്ക് വെള്ളവും ഭക്ഷണവും നല്‍കിയിരുന്നത്. ഇവരുടെ രണ്ട് സഹോദരന്‍മാരും കുടുംബവും ഈ വീട്ടില്‍ തന്നെയാണ് താമസിക്കുന്നത്.സ്ത്രീകളുടെ അവകാശങ്ങള്‍ക്ക് വേണ്ടി പ്രവര്‍ത്തിക്കുന്ന ബൈലാഞ്ചോ സാഡ് എന്ന സംഘടനയാണ് പൊലീസിനെ വിവരമറിയിച്ചത്. തുടര്‍ന്ന് ഒരു സംഘം പൊലീസെത്തി വീട്ടില്‍ പരിശോധന നടത്തുകയായിരുന്നു. യുവതിയ ചികിത്സക്കായി ആശുപത്രിയില്‍ പ്രവേശിപ്പിച്ചിട്ടുണ്ട്.ഭര്‍ത്താവിന് മറ്റൊരു ഭാര്യയുണ്ടെന്നറിഞ്ഞാണ് യുവതി സ്വവസതിയിലെത്തിയത്. അന്ന് മുതല്‍  യുവതി മാനസിക പ്രശ്നമുള്ളവരെപ്പോലെ പെരുമാറിയതെന്ന് ബന്ധുക്കള്‍ പറഞ്ഞു. അന്വേഷണം പ്രാഥമിക ഘട്ടത്തിലാണെന്നും സംഭവുമായി ബന്ധപ്പെട്ട് ആരെയും അറസ്റ്റ് ചെയ്തിട്ടില്ലെന്നും പൊലീസ് കൂട്ടിച്ചേര്‍ത്തു. എന്നാല്‍ യുവതിയുടെ ബന്ധുക്കളുടെ മൊഴിയെടുത്തിട്ടുണ്ട്.

ന്യൂഡൽഹി:കേന്ദ്ര സർക്കാരിന്റെ കശാപ്പുനിയന്ത്രണ വിജ്ഞാപനത്തിനു രാജ്യവ്യാപക സ്റ്റേ.വിജ്ഞാപനത്തിൽ കൂടുതൽ മാറ്റം വേണമെന്നും മദ്രാസ് ഹൈക്കോടതിയുടെ സ്റ്റേ ഉത്തരവ് രാജ്യവാപകമായി നിലനിൽക്കുമെന്നും സുപ്രീം കോടതി ഉത്തരവിട്ടു.ആശങ്കകൾ പരിഹരിക്കുമെന്നും ഓഗസ്റ്റ് അവസാനം പുതിയ വിജ്ഞാപനം പുറപ്പെടുവിക്കുമെന്നും സുപ്രീം കോടതി പറഞ്ഞു.വിജ്ഞാപനത്തിനെതിരെ നിരവധി പരാതികൾ ലഭിച്ചിട്ടുണ്ട്.ഈ പരാതികളെല്ലാം പരിഗണിച്ചായിരിക്കും പുതിയ വിജ്ഞാപനമെന്നും കേന്ദ്ര സർക്കാരിന് വേണ്ടി ഹാജരായ അഡിഷണൽ സോളിസിറ്റർ ജനറൽ പറഞ്ഞു.