India

ന്യൂഡൽഹി:ഇസ്ലാം സമുദായത്തിൽ നിലനിൽക്കുന്ന മുത്തലാഖ് ക്രിമിനൽ കുറ്റമാക്കാൻ കേന്ദ്ര സർക്കാർ ഇന്ത്യൻ ശിക്ഷ നിയമം ഭേദഗതി ചെയ്യുന്നു.മുത്തലാഖ് നിരോധിച്ചുകൊണ്ട് കേന്ദ്രം ഇനി പുതിയ നിയമം ഉണ്ടാക്കില്ല.ഐപിസി 497 ആം വകുപ്പിന് തുടർച്ചയായി പുതിയൊരു ഉപവകുപ്പ് 497(എ) കൂട്ടിച്ചേർക്കാനാണ് സർക്കാർ ഉദ്ദേശിക്കുന്നത്.ഇത് പ്രകാരം മുത്തലാഖ് ചൊല്ലി വിവാഹ ബന്ധം വേർപ്പെടുത്തിയാൽ മൂന്നു വർഷത്തെ തടവ് ശിക്ഷയാണ് നിയമം വ്യവസ്ഥ ചെയ്യുന്നത്. ഓഗസ്റ്റ് 22 ന് സുപ്രീം കോടതി മുത്തലാഖ് നിരോധിച്ചതിനു ശേഷവും ഇത്തരം സംഭവങ്ങൾ ഉണ്ടായതിന്റെ പശ്ചാത്തലത്തിലാണ് സർക്കാർ ഇത് ക്രിമിനൽ കുറ്റമാക്കുന്നത്. ഇതിനുള്ള ബിൽ മന്ത്രിസഭയുടെ അനുമതിക്ക് ശേഷം പാർലമെന്റിന്റെ അടുത്ത സമ്മേളനത്തിൽ അവതരിപ്പിക്കും. മറ്റൊരാളുടെ ഭാര്യയുമായി അവിഹിത വേഴ്ച നടത്തുന്നത് കുറ്റകരമാക്കുന്ന വകുപ്പാണ് ഐപിസി 497.ഈ വകുപ്പ് പുരുഷന്മാർക്ക് മാത്രമാണ് ബാധകം.ഈ വകുപ്പിന് അനുബന്ധമായി 497 എ എന്ന ഉപവകുപ്പ് ഉണ്ടാക്കുന്നതാണ് പുതിയ ഭേദഗതി നിർദേശം. ഇതനുസരിച്ച് ഒറ്റയടിക്ക് മുത്തലാഖ് ചൊല്ലി വിവാഹബന്ധം വേർപ്പെടുത്തുന്നത് മൂന്നു വർഷം വരെ തടവ് ശിക്ഷ ലഭിക്കുന്ന കുറ്റമായി മാറും.

ന്യൂഡൽഹി:തീയേറ്ററുകളിൽ ദേശീയഗാനം നിർബന്ധിതമാക്കിയ ഉത്തരവ് പുനഃപരിശോധിക്കുമെന്ന് സുപ്രീം കോടതി.രാജ്യസ്നേഹം അടിച്ചേൽപ്പിക്കാനാകില്ല.ജനം തീയേറ്ററുകളിൽ എത്തുന്നത് വിനോദത്തിനാണെന്നും കോടതി നിരീക്ഷിച്ചു.തീയേറ്ററുകളിൽ ദേശീയ ഗാനം നിർബന്ധിതമാക്കിയും ദേശീയ ഗാനം കേൾപ്പിക്കുമ്പോൾ എല്ലാവരും എഴുന്നേറ്റ് നിൽക്കണമെന്നും കോടതി നേരെത്തെ ഉത്തരവിട്ടിരുന്നു.ഇതിൽ വ്യക്തത ആവശ്യപ്പെട്ടുള്ള ഹർജിയിലാണ് കോടതിയുടെ പുതിയ നിർദേശം.ദേശീയഗാനം നിർബന്ധിതമാക്കിയ ഉത്തരവിനെ അനുകൂലിച്ചും പ്രതികൂലിച്ചും നിരവധി പ്രതികരണങ്ങൾ ഉയർന്നു വന്നിരുന്നു. തീയേറ്ററിൽ ദേശീയ ഗാനം ആലപിക്കുമ്പോൾ എഴുന്നേറ്റ് നിൽക്കാത്തവർക്കെതിരെ പോലീസ് കേസെടുക്കാൻ തുടങ്ങിയതോടെയാണ് സംഭവം വിവാദമായത്.

മുംബൈ:എ ടി എമ്മുകൾ വഴി വർഷാവസാനം വരെ 200 രൂപ നോട്ടുകൾ വിതരണം ചെയ്യാൻ സാധിക്കില്ല.200 രൂപ നോട്ടുകൾ ഉൾക്കൊള്ളാനാകുന്ന തരത്തിൽ എ ടി എം മെഷീനുകൾ നവീകരിക്കാത്തതാണ് ഇതിനു കാരണമെന്ന് എ ടി എം നിർമാതാക്കൾ പറയുന്നു.100 രൂപയ്ക്കും 500 രൂപയ്ക്കും  ഇടയിലുള്ള അകലം കുറയ്ക്കാനായാണ് 200 രൂപ നോട്ടുകൾ ഇറക്കിയത്.എ ടി എം നിർമാതാക്കളുടെ കണക്കനുസരിച്ച് മിക്ക ബാങ്കുകളും പുതിയ നോട്ടിന്റെ ലഭ്യത കുറവായതിനാൽ അവരുടെ എ ടി എം മെഷീനുകൾ നവീകരിച്ചിട്ടില്ല. എ ടി എം മെഷീനുകൾ നവീകരിക്കാനുള്ള നടപടികൾ ബാങ്കുകളാണ് എടുക്കേണ്ടതെന്നും അവരുടെ ഭാഗത്തു നിന്നും യാതൊരു നിർദേശവും വന്നിട്ടില്ലെന്നും ഇന്ത്യയിലെ പ്രമുഖ എ ടി എം നിർമാതാക്കളായ എൻ സി ആർ ന്റെ എം ഡി നവ്‌റോസ് ദസ്തർ പറഞ്ഞു.അതേസമയം  എ ടി എം നവീകരണ പ്രവർത്തനങ്ങൾക്ക് സമയമെടുക്കുമെന്നും ഇത് കഠിനമായ ഒരു ജോലിയാണെന്നും ബാങ്കുകൾ വ്യക്തമാക്കി.ഇതിനായി ആഴ്ചകളോളം ജോലി ചെയ്യേണ്ടതായി വരും.നോട്ട് നിരോധനം നടപ്പിലാക്കിയപ്പോൾ തൊഴിലാളികൾ ഇതിനായി രാപ്പകലില്ലാതെ കഷ്ട്ടപ്പെട്ടിരുന്നു.എന്നിട്ട്കൂടി ഇതിനായി  രണ്ടാഴ്ചയോളം സമയം വേണ്ടിവന്നു.എന്നാൽ അത്തരത്തിലുള്ള ഒരു പ്രതിസന്ധി ഇപ്പോഴില്ലെന്നും അതിനാൽ തന്നെ എ ടി എമ്മുകൾ തിടുക്കപ്പെട്ട്  നവീകരിക്കേണ്ട ആവശ്യവുമില്ലെന്ന് ബാങ്കുകൾ വ്യക്തമാക്കി.1, 2, 5, 10, 20, 50, 100, 500 , 2000. എന്ന ശ്രേണിയിൽ 200 ന്റെ അഭാവം പരിഹരിക്കാനാണ് 200 രൂപ നോട്ടുകൾ ഇറക്കുന്നതെന്നാണ് ആർ ബി ഐ പുതിയ 200 രൂപ നോട്ടുകൾ വിപണിയിൽ ഇറക്കിക്കൊണ്ട് വ്യക്തമാക്കിയത്.അടുത്ത വർഷം ഏപ്രിലോടെ പുതിയ 100 രൂപ നോട്ട് വിപണിയിലിറക്കാനും ആർ ബി ഐ ലക്ഷ്യമിടുന്നുണ്ട്.

ന്യൂഡൽഹി:ഇന്ത്യൻ ക്രിക്കറ്റ് താരം യുവരാജ് സിംഗിനും സഹോദരനും അമ്മയ്ക്കുമെതിരേ ഗാർഹിക പീഡനക്കുറ്റം ആരോപിച്ച് പരാതി.യുവരാജിന്‍റെ സഹോദരൻ സൊരാവർ സിംഗിന്‍റെ ഭാര്യയും ബിഗ് ബോസ് ടിവി ഷോ മത്സരാർഥിയുമായിരുന്ന അകാൻഷ ശർമയാണ് പരാതി നല്‍കിയത്.ഭർത്താവിന്‍റെ വീട്ടുകാർ മാനസികമായും ശാരീരികമായും പീഡിപ്പിച്ചുവെന്ന് കാണിച്ചാണ് പരാതി നൽകിയിരിക്കുന്നത്.പരാതി പ്രകാരം ഗുഡ്ഗാവ് പോലീസ് യുവരാജിനും മാതാവിനും സഹോദരനും നോട്ടീസ് അയച്ചു.ഭർത്താവും ഭർത്യമാതാവും ഗർഭിണിയാകാൻ തന്നെ നിർബന്ധിച്ചുവെന്നും സമ്പത്തിന്‍റെ പേരിൽ തന്നെ മാനസികമായി പീഡിപ്പിച്ചുവെന്നുമാണ് അകാൻഷയുടെ പരാതി. തന്നെ ഇവർ പീഡിപ്പിക്കുന്നതിനെതിരെ യുവരാജ് പ്രതികരിക്കാതെ കണ്ടുനിന്നതിനാണ് അദ്ദേഹത്തിനെതിരേയും പരാതി നൽകിയിരിക്കുന്നത്. യുവരാജിന്‍റെ ഇളയ സഹോദരനായ സൊരാവറും അകാൻഷയും തമ്മിലുള്ള വിവാഹം 2014-ലാണ് നടന്നത്.ബിഗ്‌ബോസ് ഷോ നാലുമാസം പൂർത്തിയായപ്പോൾ തന്റെ വിവാഹം ആണെന്ന് അറിയിച്ച് അകാൻഷ ഷോയിൽ നിന്നും പിന്മാറിയിരുന്നു.പിന്നീട് ഇവരുടെ ബന്ധത്തിൽ താളപ്പിഴകൾ ഉണ്ടായതിനെ തുടർന്ന് കഴിഞ്ഞ വർഷം അകാൻഷ വിവാഹ മോചന കേസ് ഫയൽ ചെയ്തിരുന്നു.ഇത് ഇപ്പോഴും കോടതിയുടെ പരിഗണനയിലാണ്.