India

ന്യൂഡൽഹി:രാഷ്ട്രീയക്കാർ ഉൾപ്പെട്ട കേസുകൾ തീർപ്പാക്കുന്നതിനായി പ്രത്യേക കോടതികൾ രൂപീകരിക്കും.ഇതിനായി ആറാഴ്ചയ്ക്കകം പദ്ധതി രൂപീകരിക്കാൻ സുപ്രീം കോടതി സർക്കാരിനോട് ആവശ്യപ്പെട്ടു.രാഷ്ട്രീയക്കാർ ഉൾപ്പെട്ട കേസുകൾ ഒരു വർഷത്തിനകം തീർപ്പാക്കണമെന്ന് 2014 ഇൽ സുപ്രീം കോടതി നിർദേശിച്ചിരുന്നു.അന്നത്തെ കണക്ക് പ്രകാരം എംഎൽഎമാരും എംപിമാരുമായ 1581 പേർ ക്രിമിനൽ കേസുകൾ നേരിടുന്നുണ്ട്.ഇതിൽ എത്ര കേസുകൾ ഒരു വർഷത്തിനകം തീർപ്പാക്കിയെന്ന് അറിയിക്കാൻ കേന്ദ്രത്തോട് കോടതി ആവശ്യപ്പെട്ടു.ക്രിമിനൽ കേസിൽ ശിക്ഷിക്കപ്പെടുന്ന രാഷ്ട്രീയ പ്രവർത്തകർക്ക് തിരഞ്ഞെടുപ്പിൽ മത്സരിക്കുന്നതിൽ വിലക്ക് ഏർപ്പെടുത്തുക എന്നതുൾപ്പെടെയുള്ള ആവശ്യങ്ങൾ ഉന്നയിച്ചു അഡ്വ.അശ്വിനി കുമാർ ഉപാധ്യായ സമർപ്പിച്ച ഹർജിയിലാണ് സുപ്രീം കോടതിയുടെ നിർദേശം.പ്രത്യേക കോടതി സ്ഥാപിക്കണമെന്നുള്ള ഹർജിയിലെ ആവശ്യത്തോട് സുപ്രീം കോടതിയും സർക്കാറും യോജിക്കുകയായിരുന്നു.

ജയ്പുർ: രാജസ്ഥാനിൽ ട്രാൻഫോർമർ പൊട്ടിത്തെറിച്ച് എട്ടു പേർ മരിച്ചു.ഇരുപതുപേർക്ക് പരിക്കേറ്റു.ജയ്പൂരിനടുത്ത ഖട്ടുലായ് ഗ്രാമത്തിൽ ചൊവ്വാഴ്ച ഉച്ചയ്ക്ക് ശേഷമാണ് അപകടമുണ്ടായത്. ഒരു വിവാഹ ചടങ്ങുമായി ബന്ധപ്പെട്ട് ട്രാൻഫോർമറിന് അടുത്തുകൂടി പോകുകയായിരുന്നവരാണ് അപകടത്തിൽപ്പെട്ടത്. ട്രാൻഫോർമർ പൊട്ടിത്തെറിച്ചയുടൻ സമീപമുണ്ടായിരുന്നവരിലേക്കു തീ പടരുകയായിരുന്നെന്നു ദൃക്സാക്ഷികൾ പറയുന്നു. അഞ്ചുപേർ സംഭവസ്ഥലത്തുതന്നെ മരിച്ചു. ഇവരിൽ ഒരു കുട്ടിയും ഉൾപ്പെടുന്നു. മരിച്ചവരെല്ലാം സ്ത്രീകളും കുട്ടികളുമാണ്.ദുരന്തത്തിൽ സർക്കാർ ഉന്നതതല അന്വേഷണം പ്രഖ്യാപിച്ചു. മരിച്ചവരുടെ കുടുംബങ്ങൾക്കു 10 ലക്ഷം രൂപ വീതം നഷ്ടപരിഹാരം നൽകുമെന്നു സർക്കാർ അറിയിച്ചു.

അഹമ്മദാബാദ്:ഗുജറാത്തിൽ കെമിക്കൽ ഫാക്റ്ററിയിലുണ്ടായ അഗ്‌നിബാധയിൽ ഒരാൾ മരിച്ചു.അഞ്ചുപേർക്ക് പരിക്കേറ്റു.ഇന്നലെ നറോളിൽ നാഫ്ത തിന്നർ ഫാക്റ്ററിയിലായിരുന്നു തീപിടുത്തമുണ്ടായത്.ഫാക്റ്ററി ഉടമ പോക്കർ റാം ബിഷ്‌ണോയി ആണ് മരിച്ചത്.അഗ്‌നിശമനസേനാംഗങ്ങൾക്കാണ് പരിക്കേറ്റത്.മുപ്പതു ഫയർ എൻജിനുകൾ ഏഴുമണിക്കൂർ ശ്രമപ്പെട്ടാണ് തീയണച്ചത്.പരിക്കേറ്റ സേനാംഗങ്ങളെ എൽജി ആശുപത്രിയിൽ പ്രവേശിപ്പിച്ചു.