India

ന്യൂഡൽഹി: ഇന്ത്യയിലെ വിവിധയിടങ്ങളിൽ അടുത്ത ദിവസങ്ങളിൽ ആക്രമണം നടത്തുമെന്ന് ഇസ്‌ലാമിക് സ്റ്റേറ്റ് സന്ദേശം. തൃശൂർ പൂരവും,കുംഭമേളയും ആക്രമിക്കുമെന്നും ശബ്ദ സന്ദേശത്തിലൂടെ ഐഎസ് മുന്നറിയിപ്പ് നൽകി.പത്ത് മിനിറ്റ് നീണ്ടു നിൽക്കുന്ന സന്ദേശം  മലയാളത്തിലാണ് അയച്ചിരിക്കുന്നതെന്നാണ് വിവരം.ആളുകൾ കൂടുന്ന ആഘോഷ പരിപാടികൾക്കിടെ ആക്രമം നടത്തുമെന്നാണ് മുന്നറിയിപ്പ്.പുരുഷ ശബ്ദത്തിലുള്ള മുന്നറിയിപ്പ് ഐഎസിന്‍റേതായി പുറത്തുവരുന്ന അൻപതാമത്തെ ശബ്ദസന്ദേശമാണെന്നാണ് വിവരം. ലാസ്‌വേഗസിലുണ്ടായ വെടിവയ്പിനു സമാനമായ തരത്തിലുള്ള ആക്രമണം നടത്തുമെന്ന് സന്ദേശത്തിൽ സൂചിപ്പിച്ചിട്ടുണ്ട്. തങ്ങൾ ഇത്തരം ആക്രമണങ്ങൾ രാജ്യത്തിന്‍റെ വിവിധ ഭാഗങ്ങളിൽ നടത്തിട്ടുണ്ടെന്നും ലാസ്‌വേഗസിൽ തങ്ങൾക്ക് ഒരു അനുയായി നഷ്ടമായെന്നും സന്ദേശത്തിൽ പറയുന്നു.അഫ്ഗാനിസ്ഥാനിൽ നിന്നുമാണ് സന്ദേശമെത്തിയതെന്നും കാസർഗോട്ടു നിന്നും ഐഎസിൽ ചേരാനായി പോയ റാഷിദ് അബ്ദുള്ള എന്നയാളുടേതാണ് ശബ്ദമെന്നുമാണ് പ്രാഥമിക നിഗമനമെന്നും പോലീസ് വൃത്തങ്ങൾ അറിയിച്ചു.

ചെന്നൈ:ഞായറാഴ്ച രാത്രി മുതൽ കനത്ത മഴ പെയ്തതോടെ ചെന്നൈയിലെ താഴ്ന്ന പ്രദേശങ്ങൾ വീണ്ടും വെള്ളപ്പൊക്ക ഭീഷണിയിലായി.മഴ ഇന്നും തുടരുമെന്ന മുന്നറിയിപ്പിനെ തുടർന്ന് ചെന്നൈ,തിരുവള്ളൂർ,കാഞ്ചിപുരം എന്നീ ജില്ലകളിലെ വിദ്യാഭ്യാസ സ്ഥാപനങ്ങൾക്ക്  അധികൃതർ അവധി പ്രഖ്യാപിച്ചു.ഒക്ടോബർ അവസാന വാരം പെയ്ത വടക്കുകിഴക്കൻ കാലവർഷവും ചെന്നൈയിൽ അതിശക്തമായിരുന്നു.ഇതേ തുടർന്ന് അടച്ചിട്ട സ്കൂളുകൾ കഴിഞ്ഞ  ചൊവ്വാഴ്ചയാണ് വീണ്ടും പ്രവർത്തനം ആരംഭിച്ചത്.2015 ഇൽ ഉണ്ടായ പ്രളയ ഭീതി നിലനിൽക്കുന്നതിനാൽ കനത്ത ജാഗ്രത നിർദേശമാണ് ചെന്നെയിൽ നൽകിയിരിക്കുന്നത്. ചെന്നൈയിൽ വെള്ളപ്പൊക്കത്തിനുള്ള സാധ്യത ഇപ്പോഴില്ലെന്നു ഇ പളനിസ്വാമി അറിയിച്ചിട്ടുണ്ട്.താഴ്ന്ന പ്രദേശങ്ങളിൽ മാത്രമാണ് വെള്ളപ്പൊക്ക ഭീഷണി നിലനിൽക്കുന്നത്. ജയലളിത മുഖ്യമന്ത്രി ആയിരിക്കുമ്പോൾ നിർമാണം ആരംഭിച്ച വാട്ടർ ഡ്രെയിൻ പദ്ധതി അന്തിമഘട്ടത്തിലാണെന്നും അദ്ദേഹം പറഞ്ഞു.

ന്യൂഡൽഹി:വിമർശനങ്ങൾക്ക് നടുവിൽ ചരക്കുസേവന നികുതിയിൽ മാറ്റങ്ങൾ വരുത്തി ജി എസ് ടി കൗൺസിൽ.117 ഇനങ്ങളുടെ ചരക്കു സേവന നികുതി (ജിഎസ്ടി) 28 ശതമാനത്തിൽനിന്നു 18 ശതമാനമായി കുറച്ചു. ഇന്നു ചേർന്ന ജിഎസ്ടി കൗണ്‍സിലിലാണ് ഇതുസംബന്ധിച്ച തീരുമാനം കൈക്കൊണ്ടത്. ചോക്കലേറ്റ്,ച്യുയിങ്ങ്ഗം,സോപ്പുപൊടി,ആഫ്റ്റർഷെവ് ലോഷൻ,മാർബിൾ, ഷേവിങ്ങ് സ്പ്രേകൾ,ഗ്രാനൈറ്റ്,മേക്കപ്പ് സാധനങ്ങൾ,ഷാംപൂ എന്നിവയ്ക്കാണ് പ്രധാനമായും വിലകുറയുക.പുകയില ഉത്പന്നങ്ങൾ, സിഗരറ്റ്, കോളകൾ, വാഷിംഗ് മെഷീൻ, റഫ്രിജറേറ്റർ, എയർകണ്ടീഷണർ, പെയിന്‍റ്, സിമന്‍റ് എന്നിവയുടെ നികുതിയിൽ മാറ്റമില്ല. ഇവയെ 28 ശതമാനം ജിഎസ്ടിയിൽ തന്നെ നിലനിർത്തി.50 ഉൽപ്പന്നങ്ങൾക്ക് മാത്രം ഇനി ഉയർന്ന നികുതി നൽകിയാൽ മതിയാകും.റിട്ടേണ്‍ ഫയലിംഗ് വൈകിയാലുള്ള പിഴ ദിവസം 200 രൂപയിൽനിന്നു 50 രൂപയായും കുറച്ചു.

ന്യൂഡൽഹി:കനത്ത പുകമഞ്ഞിനെ തുടർന്ന് ഡൽഹിയിൽ പതിനെട്ടു കാറുകൾ ഒന്നിന് പുറകെ ഒന്നായി കൂട്ടിയിടിച്ചു.ഡൽഹി എക്സ്പ്രസ് ഹൈവേയിലാണ് അപകടം.വ്യവസായ ശാലകളിൽ നിന്നും വാഹനങ്ങളിൽ നിന്നുമുള്ള പുകയും നവരാത്രി ആഘോഷങ്ങളുടെ ഭാഗമായുള്ള പടക്കങ്ങൾ പൊട്ടിച്ചപ്പോഴുണ്ടായ പുകയും എല്ലാം ചേർന്ന് ഡൽഹിയിൽ കനത്ത പുകമഞ്ഞ് രൂപപ്പെടുകയായിരുന്നു.ഇരുപതു മീറ്റർ അടുത്തുള്ളയാളെ വരെ കാണാൻ പറ്റാത്ത വിധമാണ് പുകമഞ്ഞ് മൂടിയിരിക്കുന്നു.ഇതിനെ തുടർന്ന് ഡൽഹിയിലെ സ്കൂളുകൾക്ക് സർക്കാർ ഞായറാഴ്ച വരെ അവധി പ്രഖ്യാപിച്ചിരിക്കുകയാണ്.രാവിലെ അത്യന്തം മലിനീകരിക്കപ്പെട്ട വായുവാണ് നേരിടേണ്ടി വരികയെന്നും അതിനാൽ രാവിലെ പുറത്തിറങ്ങിയുള്ള പഠനങ്ങളും  കായിക മത്സരങ്ങളും ഒഴിവാക്കണമെന്നും ഡോക്റ്റർമാർ നിർദേശിച്ചിട്ടുണ്ട്.ജനങ്ങൾ ജാഗ്രത പാലിക്കണമെന്നും നിർദേശമുണ്ട്.

ചണ്ഡീഗഡ്:സ്കൂൾ കുട്ടികൾക്ക് ഇടയിലേക്ക് ട്രക്ക് പാഞ്ഞുകയറി ഒൻപതുപേർ മരിച്ചു.ഏഴുപേർക്ക് ഗുരുതരമായി പരിക്കേറ്റു.പഞ്ചാബിലെ ബാദിൻഡ  ജില്ലയിലാണ് സംഭവം.സംഭവസ്ഥലത്തെ ഫ്‌ളൈഓവറിന്റെ ഓരത്ത് നിൽക്കുകയായിരുന്ന കുട്ടികളുടെ ഇടയിലേക്ക് ട്രക്ക്പാഞ്ഞുകയറുകയായിരുന്നു.മൂടൽ മഞ്ഞ് കാരണം ഡ്രൈവർക്ക് കാഴ്ച മങ്ങിയതാണ് അപകടകാരണം.വിദ്യാർഥികൾ സ്കൂലേക്ക് പോകാനായി കയറിയ ബസ് മറ്റൊരു മിനി ബസുമായി കൂട്ടിയിടിച്ചതിനെ തുടർന്ന് ബേസിൽ നിന്നും ഇറങ്ങി മറ്റൊരു വാഹനത്തിനായി വിദ്യാർഥികൾ കാത്തു നിൽക്കുമ്പോഴാണ് അപകടമുണ്ടായത്.പിന്നിൽ നിന്നും വന്ന ട്രക്ക് വിദ്യാർത്ഥികൾക്ക് ഇടയിലേക്ക് പാഞ്ഞു കയറുകയായിരുന്നുവെന്നാണ് പോലീസ് നൽകുന്ന വിവരം.പരിക്കേറ്റവരെ സമീപത്തെ ആശുപത്രികളിൽ പ്രവേശിപ്പിച്ചു.