India

ന്യൂഡൽഹി:ഈ മാസം ഭാരത് ബന്ദിന് കർണിസേന ആഹ്വാനം ചെയ്തു.സഞ്ജയ് ലീല ബൻസാലി ചിത്രം ‘പത്മാവത്’ റിലീസ് ചെയ്യുന്ന ജനുവരി 25 നാണ് ഭാരത് ബന്ദിന് ആഹ്വാനം ചെയ്തിരിക്കുന്നത്. സിനിമ പ്രദർശിപ്പിക്കുന്ന തീയേറ്ററുകൾ കത്തിക്കുമെന്നും നഷ്ട്ടം സഹിക്കാൻ ഉടമകൾ തയ്യാറാകണമെന്നും കർണിസേന മേധാവി ലോകേന്ദ്ര സിംഗ് മുന്നറിയിപ്പ് നൽകി.ചിത്രം പ്രദർശിപ്പിച്ചാൽ‌ ജൗഹർ അനുഷ്ഠിക്കുമെന്നും കർണി സേന ഭീഷണി ഉയർത്തിയിട്ടുണ്ട്. മധ്യകാല ഇന്ത്യയിലെ രജപുത്ര സ്ത്രീകൾ അനുഷ്ഠിച്ചുവന്ന കൂട്ട ആത്മഹത്യയാണ് ജൗഹർ. യുദ്ധത്തിൽ തോൽവി ഉറപ്പാവുന്ന ഘട്ടത്തിൽ സ്ത്രീകൾ വലിയ ചിതകൂട്ടി കൂട്ടമായി ജീവനൊടുക്കുകയും പുരുഷന്മാർ ഒന്നടങ്കം യുദ്ധഭൂമിയിൽ മരണം വരിക്കുകയും ചെയ്യുന്നതാണ് ജൗഹർ.ബന്ദ് ശക്തമാക്കാൻ താൻ മുഴുവൻ സമയവും മുംബൈയിൽ ഉണ്ടാകുമെന്നും ലോകേന്ദ്ര സിംഗ് പറഞ്ഞു.ചിത്രത്തിന്റെ സംവിധായകൻ സഞ്ജയ് ലീല ബൻസാലി,നായിക ദീപിക പദുക്കോൺ എന്നിവർക്കെതിരെ വധഭീഷണി പുറപ്പെടുവിച്ചതും ലോകേന്ദ്രയാണ്.എന്നാൽ പദ്മാവതിന് സെൻസർ ബോർഡ് നൽകിയ സർട്ടിഫിക്കറ്റ് റദ്ദാക്കണമെന്നാവശ്യപ്പെട്ടു സമർപ്പിച്ച ഹർജി സുപ്രീംകോടതി കഴിഞ്ഞ ദിവസം തള്ളിയിരുന്നു. വിഷയം അടിയന്തരമായി പരിഗണിക്കണം എന്നാവശ്യപ്പെട്ടു നൽകിയ ഹർജിയാണു ചീഫ് ജസ്റ്റീസ് ദീപക് മിശ്ര അധ്യക്ഷനായ ബെഞ്ച് തള്ളിയത്. സിനിമയുടെ പ്രദർശനം ക്രമസമാധാനത്തിനു പുറമേ ജീവനും സ്വത്തിനും വലിയ ഭീഷണി ഉണ്ടാക്കുമെന്ന വാദവും കോടതി പരിഗണിച്ചില്ല. ഇതോടെയാണ് കർണി സേന ബന്ദുമായി രംഗത്തുവന്നിരിക്കുന്നത്.

ന്യൂഡൽഹി:ഡൽഹിയിലെ ബാവ്ന വ്യവസായ മേഖലയിലെ പ്ലാസ്റ്റിക്ക് ഫാക്റ്ററിയിലുണ്ടായ തീപിടുത്തത്തിൽ 17 പേർ മരിച്ചു.ഇതിൽ 10 പേർ സ്ത്രീകളാണ്. ഇന്നലെ വൈകുന്നേരം ആറരയോടെയായിരുന്നു തീപിടുത്തം ഉണ്ടായത്.കാർപെറ്റ് ഫാക്റ്ററിയുടെ താഴത്തെ നിലയിലാണ് തീപിടുത്തം ഉണ്ടായത്.തീ പിന്നീട് കെട്ടിടത്തിന്റെ വിവിധ ഭാഗങ്ങളിലേക്ക് പടരുകയായിരുന്നു.തീപിടുത്തം നടന്നയുടനെ അഗ്നിശമന സേന സ്ഥലത്തെത്തി രക്ഷാപ്രവർത്തനങ്ങൾ നടത്തിയിരുന്നു.നിരവധിപേരെ കെട്ടിടത്തിൽ നിന്നും രക്ഷപ്പെടുത്തി.മരിച്ചവരിൽ മിക്കവരും തൊഴിലാളികളാണ്.അഗ്‌നിശമന സേനയുടെ 12 യൂണിറ്റുകൾ മണിക്കൂറുകൾ നീണ്ട പ്രവർത്തനത്തിനൊടുവിലാണ് തീ നിയന്ത്രണ വിധേയമാക്കിയത്.ചൈനീസ് പടക്കങ്ങൾ പായ്ക്കു ചെയ്യുന്ന യൂണിറ്റും കെട്ടിടത്തിൽ പ്രവർത്തിക്കുന്നുണ്ട്. ഇതാണ് തീ നിയന്ത്രണാതീതമാകാൻ വൈകിയത്.അപകടത്തിൽ മരിച്ചവരുടെ ബന്ധുക്കൾക്ക് മുഖ്യമന്ത്രി അരവിന്ദ് കെജ്‌രിവാൾ അഞ്ചു ലക്ഷം രൂപ ധനസഹായം പ്രഖ്യാപിച്ചു.

പനാജി:ഗോവയിൽ അമോണിയം കയറ്റിവന്ന ടാങ്കർ ലോറി മറിഞ്ഞ് വാതകം ചോർന്നതിനെ തുടർന്ന് നൂറിലധികം കുടുംബങ്ങളെ മാറ്റി താമസിപ്പിച്ചു.പനാജി-വാസ്കോ സിറ്റി ഹൈവേയിൽ വെള്ളിയാഴ്ച പുലർച്ചെ മൂന്നു മണിയോടെയാണ് ടാങ്കർ മറിഞ്ഞത്.ഉടൻ തന്നെ സമീപപ്രദേശത്തെ വീടുകളിൽ നിന്നും ആളുകളെ ഒഴിപ്പിച്ചു.ഈ റോഡിലൂടെയുള്ള ഗതാഗതവും നിരോധിച്ചിരിക്കുകയാണ്. വിഷ വാതകം നിർവീര്യമാക്കാനുള്ള നടപടികൾ പുരോഗമിക്കുകയാണ്.

ന്യൂഡൽഹി:ഹജ്ജ് തീർത്ഥാടകർക്കായി കേന്ദ്രം നൽകിവരുന്ന സബ്‌സിഡി കേന്ദ്രം നിർത്തലാക്കി. പകരം ഈ തുക മുസ്ലിം ന്യൂനപക്ഷങ്ങൾക്കായി ചെലവഴിക്കാനാണ് തീരുമാനം. കേന്ദ്ര മന്ത്രി മുക്താർ അബ്ബാസ് നഖ്വിയാണ് ഇക്കാര്യം വ്യക്തമാക്കിയത്.700 കോടി രൂപയാണ് ഹജ്ജ് സബ്സിഡിക്കായി നീക്കിവെച്ചിരുന്നത്.സബ്സിഡി നൽകുന്നത് ഘട്ടം ഘട്ടമായി നിർത്തലാക്കണമെന്ന സുപ്രീംകോടതി നിർദേശത്തിന്‍റെ പശ്ചാത്തലത്തിലാണ് കേന്ദ്ര സർക്കാർ തീരുമാനം.2022ഓടെ സബ്സിഡി നൽകുന്നത് ഘട്ടം ഘട്ടമായി നിർത്തലാക്കണമെന്നായിരുന്നു ഉത്തരവ്. ഇതിന്‍റെ ചുവടുപിടിച്ചാണ് നാലുവർഷം ബാക്കി നിൽക്കെ ഒറ്റയടിക്ക് കേന്ദ്രസർക്കാർ സബ്സിഡി നിർത്തലാക്കിയത്.

മുംബൈ:ബോംബൈ ഹൈയിലെ ഓയിൽ റിങ്ങിലേക്ക് പോയ ഹെലികോപ്റ്റർ തകർന്നുള്ള അപകടത്തിൽ കാണാതായ ഒരാളുടെ മൃതദേഹം കൂടി കണ്ടെത്തി. ഇതോടെ ദുരന്തത്തിൽ കാണാതായ ഏഴിൽ ആറുപേരുടെ മൃതദേഹവും കണ്ടെടുത്തു.ഇവരിൽ അഞ്ചുപേരുടെ മൃതദേഹങ്ങൾ തിരിച്ചറിഞ്ഞിട്ടുണ്ട്. ഒഎൻജിസി ജീവനക്കാരായ തൃശൂർ സ്വദേശി പി.എൻ ശ്രീനിവാസൻ,കോതമംഗലം സ്വദേശി ജോസ് ആന്റണി,ആർ.ശരവണൻ,പങ്കജ് ഗാർഗ്,പൈലറ്റ് ക്യാപ്റ്റൻ ആർ.ഓഹ്കാർ എന്നിവരുടെ മൃതദേഹമാണ്  തിരിച്ചറിഞ്ഞത്.ശനിയാഴ്ചയാണ് ഒഎൻജിസി പ്രവർത്തകരുമായി പോയ ഹെലികോപ്റ്റർ അപകടത്തിൽപ്പെട്ടത്. കാണാതായ ആൾക്ക് വേണ്ടിയുള്ള തിരച്ചിൽ പുരോഗമിക്കുകയാണെന്ന് നാവികസേന അറിയിച്ചു. ഐഎൻഎസ് ടറസ,ഐഎൻഎസ് ടെഗ്ഗ് എന്നീ അതിവേഗ ഇന്റർസെപ്റ്റർ ക്രാഫ്റ്റുകളാണ് തിരച്ചിലിലുള്ളത്. തീരരക്ഷാസേനയുടെ സമുദ്ര പ്രഹരി,ആച്ചൂക്ക്,ആഗ്രി എന്നീ കപ്പലുകളും ഇവയ്‌ക്കൊപ്പമുണ്ട്.അപകടത്തെ കുറിച്ച് ഡയറക്റ്ററേറ്റ് ജനറൽ ഓഫ് സിവിൽ ഏവിയേഷൻസ് അന്വേഷണം ആരംഭിച്ചിട്ടുണ്ട്.