India

ജയ്‌പൂർ:ഇൻഡിഗോ വിമാനത്തിന് ബോംബ് ഭീഷണിയെന്ന് വ്യാജസന്ദേശം നൽകിയ യാത്രക്കാരൻ പിടിയിൽ.സമയത്ത് എത്തിച്ചേരാന്‍ കഴിയില്ലെന്ന് കരുതിയാണ് ഇയാൾ വ്യാജസന്ദേശം നൽകിയത്.സംഭവവുമായി ബന്ധപ്പെട്ട് ജയ്പുരില്‍ നിന്നും മുംബൈയിലേക്ക് യാത്ര ചെയ്യേണ്ടിയിരുന്ന നൃത്തസംവിധായകനാണ് പോലീസ് പിടിയിലായത്.പുലർച്ചെ അഞ്ചരമണിയോടെ ഇന്‍ഡിഗോ എയര്‍ലൈന്‍സിന്റെ കോൾസെന്ററിൽ  വിളിച്ചാണ് ഇയാള്‍ ബോംബ് ഭീഷണി മുഴക്കിയത്.തുടര്‍ന്ന് വിമാനത്താവളത്തില്‍ സുരക്ഷ ശക്തമാക്കി.ബോംബ് ഭീഷണി വിശകലന സമിതി സന്ദേശം വ്യാജമാണെന്ന് കണ്ടെത്തിയതോടെ വിമാന സര്‍വീസ് ഉടന്‍ തന്നെ സാധാരണ നിലയിലായി.വിമാനം പുറപ്പെടുന്നതിന് മുൻപ് എത്താന്‍ കഴിയാതിരുന്ന മോഹിത് കുമാര്‍ തങ്ക് എന്ന യാത്രക്കാരനെ കമ്പനി നേരിട്ട് വിളിച്ച്‌ തൊട്ടടുത്ത വിമാനത്തില്‍ യാത്ര ഉറപ്പു നല്‍കി. ഇയാള്‍ വിമാനത്താവളത്തില്‍ എത്തിയപ്പോള്‍ സി.ഐ.എസ്.എഫ് ഉദ്യോഗസ്ഥര്‍ ഇയാളെ ചോദ്യം ചെയ്തു. ഇതോടെ താനാണ് ബോംബ് ഭീഷണിക്ക് പിന്നില്‍ എന്ന് തുറന്നു പറയുകയായിരുന്നു. റിയാലിറ്റി ഷോകള്‍ക്കും മറ്റും നൃത്തസംവിധാനം ചെയ്യുന്നയാളാണ് താനെന്ന് തങ്ക് പോലീസിനോട് പറഞ്ഞു. ഇയാളെ ചോദ്യം ചെയ്തു വരുന്നു.

ബെംഗളൂരു:തന്റെ മതത്തെ രക്ഷിക്കാനാണ് മുതിര്‍ന്ന മാധ്യമപ്രവര്‍ത്തക ഗൗരിലങ്കേഷിനെ കൊലപ്പെടുത്തിയതെന്ന് പ്രതി പരശുറാം വാഗ്മോറിന്റെ കുറ്റസമ്മതം.കൊലപാതകവുമായി ബന്ധപ്പെട്ട് ഇയാളെ അന്വേഷണ സംഘം അറസ്റ്റ് ചെയ്‌തതിന്‌ ശേഷം നടത്തിയ ചോദ്യം ചെയ്യലിനിടെയാണ് കുറ്റസമ്മതം.’ആരെയാണ് താന്‍ കൊലപ്പെടുത്തിയതെന്ന് അറിയില്ലായിരുന്നു. 2017 മെയ് മാസത്തിലാണ് തന്നെ ചിലര്‍ കൊലയ്ക്കായി നിയോഗിച്ചത്. ഹിന്ദുമതത്തെ രക്ഷിക്കാന്‍ ഒരു കൊലപാതകം നടത്തണമെന്ന് ആവശ്യപ്പെടുകയായിരുന്നു. ഞാനത് സമ്മതിക്കുകയും ചെയ്തു. കൊലപാതകം നടത്തിയ ശേഷമാണ് അത് ഗൗരിലങ്കേഷ് ആണെന്ന് മനസ്സിലായത്.’ അവരെ കൊല്ലരുതായിരുന്നുവെന്ന് ഇപ്പോള്‍ തോന്നുന്നുവെന്ന്‌ പരശുറാം കുറ്റസമ്മതം നടത്തിയതായും ദേശീയ മാധ്യമങ്ങള്‍ റിപ്പോര്‍ട്ട് ചെയ്തു. സെപ്റ്റംബര്‍ മൂന്നിന് തന്നെ ബെംഗളൂരുവില്‍ എത്തിക്കുകയും കൊലയ്ക്കുള്ള പരിശീലനം നൽകുകയും ചെയ്തു.ബെംഗളൂരുവിലെത്തി മുറിയെടുത്ത ശേഷം ബൈക്കിലെത്തിയ മറ്റൊരാള്‍ കൊല നടത്തേണ്ട വീട് കാണിച്ച്‌ തന്നു. പിറ്റെ ദിവസം മറ്റൊരു മുറിയിലെത്തുകയും സെപ്റ്റംബര്‍ അഞ്ചിന് ആര്‍.ആര്‍ നഗറിലെ ഗൗരി ലങ്കേഷിന്റെ വീടിന് മുന്നിലെത്തിച്ചു.ഗൗരിലങ്കേഷ് വീടിന് മുന്നിലെത്തിയ സമയത്ത് തന്നെയാണ് ഞങ്ങളും അവിടെയെത്തിയത്. ഗേറ്റിന് മുന്നിലെത്തിയ ഗൗരി കാറില്‍ നിന്നും ഇറങ്ങി. തുടര്‍ന്ന് തന്റെ നേരെ നടന്ന് വരികയായിരുന്ന ഗൗരിക്ക് നേരെ നാല് വട്ടം വെടിയുതിര്‍ത്തു. കൊലപാതകം നടത്തി അന്ന് രാത്രി തന്നെ നഗരം വിട്ടുവെന്നും ഇയാള്‍ അന്വേഷണ ഉദ്യോഗസ്ഥര്‍ക്ക് മുന്നില്‍ വ്യക്തമാക്കിയിട്ടുണ്ട്.

ലക്‌നൗ:ഉത്തർപ്രദേശിലെ മെയിൻപുരി ജില്ലയിൽ ഇന്ന് രാവിലെയുണ്ടായ ബസ്സപകടത്തിൽ 17 യാത്രക്കാർ മരിച്ചു.35 പേർക്ക് പരിക്കേറ്റു. അമിത വേഗതയിൽ വന്ന സ്വകാര്യബസ് ഡിവൈഡറിൽ ഇടിച്ച് മറിയുകയായിരുന്നു. രാജസ്ഥാനിലെ ജയ്പൂരിൽനിന്നും ഉത്തർപ്രദേശിലെ ഫറുഖാബാദിലേക്ക് വരികയായിരുന്ന വോൾവോ ബസാണ് അപകത്തിൽപ്പെട്ടത്. ഏകദേശം 80 മുതൽ 90 പേർ ബസിലുണ്ടായിരുന്നതായാണ് പ്രാഥമിക വിവരം.അപകടത്തിൽ പരിക്കേറ്റവരെ സമീപത്തെ ആശുപത്രിയിൽ പ്രവേശിപ്പിച്ചു. ഇതിൽ മൂന്ന് പേരുടെ നില ഗുരുതരമാണ്.ഡ്രൈവറുടെ അശ്രദ്ധയും അമിത വേഗവുമാണ് അപകടത്തിനു കാരണമെന്ന് യാത്രക്കാർ പറഞ്ഞു. ബസ് നിറുത്താൻ ആവശ്യപ്പെട്ടിരുന്നുവെങ്കിലും ഡ്രൈവർ അനുസരിച്ചില്ലെന്നും യാത്രക്കാർ ആരോപിച്ചു.

ന്യൂഡൽഹി: മുൻ പ്രധാനമന്ത്രി എ.ബി.വാജ്പേയിയെ ദേഹാസ്വാസ്ഥ്യത്തെത്തുടര്‍ന്ന് ആശുപത്രിയിൽ പ്രവേശിപ്പിച്ചു. ഡൽഹിയിലെ എയിംസ് ആശുപത്രിയിലാണ് അദ്ദേഹത്തെ പ്രവേശിപ്പിച്ചിരിക്കുന്നത്.നിരവധി പ്രമുഖർ അദ്ദേഹത്തെ ആശുപത്രിയിൽ സന്ദർശിച്ചു.ഇന്നലെ വൈകുന്നേരത്തോടെ കോണ്‍ഗ്രസ്‌ അദ്ധ്യക്ഷന്‍ രാഹുല്‍ ഗാന്ധി അദേഹത്തെ സന്ദര്‍ശിച്ചിരുന്നു.പ്രധാനമന്ത്രി നരേന്ദ്രമോദിയും ആശുപത്രിയിലെത്തി.വാജ്പേയിയെ സന്ദര്‍ശിച്ച പ്രധാനമന്ത്രി ഡോക്ടര്‍മാരോട് അദ്ദേഹത്തിന്‍റെ ആരോഗ്യനിലയെപ്പറ്റി അന്വേഷിക്കുകയും ചെയ്തു. ഏകദേശം 50 മിനിട്ടോളം എയിംസില്‍ ചിലവഴിച്ച പ്രധാനമന്ത്രി അദ്ദേഹത്തിന്‍റെ കുടുംബാംഗങ്ങളോട് സംസാരിക്കുകയും ചെയ്തു. സാധാരണ പരിശോധനകളുടെ ഭാഗമായാണ് അദ്ദേഹത്തെ ആശുപത്രിയില്‍ പ്രവേശിപ്പിച്ചതെന്നും ആശങ്കപ്പെടേണ്ടതില്ലെന്നും എയിംസ് മീഡിയ പ്രോട്ടോക്കോള്‍ ഡിവിഷന്‍ മേധാവി ആരതി വിജ് പറഞ്ഞു.എയിംസ് ഡയറക്ടര്‍ ഡോ. രണ്‍ദീപ് ഗുലേറിയയുടെ നേതൃത്വത്തിലുള്ള സംഘമാണ് വാജ്‌പേയിയെ പരിചരിക്കുന്നത്.