ന്യൂഡൽഹി:ആർബിഐ ഗവർണ്ണർ ഊർജിത് പട്ടേൽ രാജിവെച്ചു.ആർബിഐയും കേന്ദ്രസർക്കാരും തമ്മിൽ രൂക്ഷമായ തർക്കം നിലനിൽക്കുന്നതിനിടെയാണ് ഊർജിതിന്റെ രാജി.ആർബിഐയുടെ കരുതൽ ധനത്തിൽ നിന്നും 3.6 ലക്ഷം കോടി രൂപ സർക്കാർ ആവശ്യപ്പെട്ടിരുന്നു.എന്നാൽ ആർബിഐ ഈ ആവശ്യം നിരസിച്ചിരുന്നു.ഇതേതുടർന്ന് കേന്ദ്രവും ആർബിഐയും തമ്മിൽ തർക്കം നിലനിന്നിരുന്നു.ഇതിനു പിന്നാലെയാണ് ഗവർണ്ണറുടെ രാജി.
ദുബായ്:വ്യാപാര വിനിമയം നടത്തുന്നതിനായി ഇന്ത്യക്കും യുഎഇയ്ക്കും ഇനി ഡോളറിനെ ആശ്രയിക്കേണ്ട.സ്വന്തം കറൻസിയിൽ തന്നെ വ്യാപാര വിനിമയം നടത്തുന്നതിനുള്ള കറന്‍സി സ്വാപ് കരാറില്‍ ഇരു രാജ്യങ്ങളും ഒപ്പുവെച്ചു.ഇതോടെ മറ്റൊരു കറന്‍സിയുടേയും മധ്യസ്ഥം ഇല്ലാതെ ഇരുരാജ്യങ്ങള്‍ക്കും വ്യാപാര വിനിമയം നടത്താം. അതുകൊണ്ടു തന്നെ ഡോളറിന്റെ വിലയിലുണ്ടാകുന്ന ഏറ്റക്കുറച്ചിലുകള്‍ ഇരുരാജ്യങ്ങളുടേയും വിനിമയത്തെ ബാധിക്കില്ല.കേന്ദ്ര വിദേശകാര്യ മന്ത്രി സുഷമ സ്വരാജും യുഎഇ വിദേശകാര്യ മന്ത്രി ശൈഖ് അബ്ദുല്ല ബിന്‍ സായിദ് അല്‍ നഹ്യാനും ഇത് സംബന്ധിച്ച ധാരണാ പത്രം കൈമാറി.യുഎസ് ഡോളര്‍ ഉള്‍പ്പെടെയുള്ള വിദേശകറന്‍സികളെ ഒഴിവാക്കി രൂപയിലും ദിര്‍ഹത്തിലും പരസ്പരം നേരിട്ടുള്ള വ്യാപാരം സാധ്യമാക്കുന്നതാണ് കറന്‍സി സ്വാപ് കരാര്‍.50 ബില്യണ്‍ ഡോളറിന്റെ ഉഭയകക്ഷ കരാറില്‍ ഒപ്പുവച്ചിട്ടുള്ള ഇന്ത്യയും യുഎഇയും സ്വന്തം കറന്‍സിയില്‍ ഇടപാടുകള്‍ നടത്താന്‍ തീരുമാനിച്ചത് കയറ്റുമതി ഇറക്കുമതി മേഖലകള്‍ക്ക് ഏറെ സഹായകമാകും.വിവിധ സമയങ്ങളില്‍ ഡോളറിന്റെ മൂല്യത്തിലുണ്ടാകുന്ന ഉയര്‍ച്ചയും താഴ്‌ച്ചയും ഇന്ത്യയും യുഎഇയും തമ്മിലുള്ള വിനിമയത്തെ ബാധിക്കില്ലെന്നതാണ് കരാറിന്റെ നേട്ടം. ഇന്ത്യ യുഎഇയുമായി സഹകരിച്ച്‌ ആഫ്രിക്കയില്‍ വികസന പ്രവര്‍ത്തനം നടത്താനുള്ള കരാറിലും വിദേശകാര്യ മന്ത്രി സുഷമാ സ്വരാജ് ഒപ്പുവച്ചിട്ടുണ്ട്.ഊര്‍ജം, ബഹിരാകാശം, നിക്ഷേപം, സുരക്ഷ, വ്യാപാരം തുടങ്ങിയ മേഖലകളില്‍ സഹകരണം വര്‍ധിപ്പിക്കാനും ധാരണയായിട്ടുണ്ട്.
മുംബൈ:എക്സൈഡ്, എക്സികോം, ആമറോൺ, ഗ്രീൻ ഫ്യൂവൽ എനർജി സൊല്യൂഷൻസ്, ട്രോൻടെക്,കോസ്‌ലൈറ്റ്‌ ഇന്ത്യ, നാപിനൊ ഓട്ടോ ആൻഡ് ഇലക്ട്രോണിക്സ്, അമരാ രാജ ബാറ്ററീസ്, BASF കാറ്റലിസ്റ്റ്, ട്രിനിറ്റി എനർജി സിസ്റ്റംസ്, വെർസാറ്റൈൽ ഓട്ടോ തുടങ്ങിയവ കമ്പനികൾ പ്രാദേശികമായി ലിഥിയം അയോൺ ബാറ്ററികൾ നിർമിക്കാനുള്ള പദ്ധതിയുമായി രംഗത്ത്.പ്രകൃതി സൗഹൃദ വാഹനങ്ങൾ പ്രോത്സാഹിപ്പിക്കുക എന്ന ലക്ഷ്യത്തോടെ ഇന്ത്യ ഗവണ്മെന്റ് ആരംഭിച്ച ഫെയിം(FAME-Faster Adoption and Manufacturing of Hybrid and Electric Vehicles) ന്റെ രണ്ടാം ഘട്ടത്തിനായി അനുവദിച്ചിട്ടുള്ള ആനുകൂല്യത്തിൽ ഏറിയപങ്കും ലിഥിയം അയോൺ ബാറ്റെറികളുടെ പ്രാദേശിക നിർമാണത്തെ സഹായിക്കാനാണ് ഉപയോഗിക്കുക എന്ന പ്രധാനമന്ത്രിയുടെ ഓഫീസിന്റെ പ്രഖ്യാപനത്തെ തുടർന്നാണ് കമ്പനികൾ പദ്ധതിയുമായി മുന്നോട്ട് വന്നിരിക്കുന്നത്. ഇന്ത്യയിലെ ഒരു ഡസനിലേറെ വരുന്ന വാഹന നിർമാണ കമ്പനികൾ ഇപ്പോൾ തന്നെ ചൈന ,തായ്‌വാൻ,കൊറിയ എന്നിവിടങ്ങളിൽ നിന്നും ലിഥിയം അയോൺ ബാറ്ററികൾ ഇറക്കുമതി ചെയ്യാൻ ആരംഭിച്ചിട്ടുണ്ട്.പ്രാദേശികമായി ഇത്തരം ബാറ്ററികൾ നിർമിക്കുന്നതിന് ചിലവ് കൂടുതലാണെങ്കിലും ചൈനയിൽ നിന്നും മറ്റും ഇറക്കുമതി ചെയ്യുന്ന ബാറ്ററികളെക്കാൾ ഇവയ്ക്ക് ഗുണനിലവാരം കൂടുതലായിരിക്കുമെന്ന് സൊസൈറ്റി ഓഫ് മാനുഫാക്ച്ചററേഴ്സ് ഓഫ് ഇലക്ട്രിക്ക് വെഹിക്കിൾസ്(SMEV) ന്റെ ഡയറക്റ്റർ ജനറൽ സോഹിന്ദർ ഗിൽ അഭിപ്രായപ്പെട്ടു.ഉയർന്ന ചിലവിന്റെയും ബാറ്ററി ചാർജ് ചെയ്യുന്നതിനുള്ള അടിസ്ഥാന സൗകര്യങ്ങളുടെയും അഭാവം കാരണം ഇലക്ട്രിക്ക് വാഹനങ്ങളുടെ വിൽപ്പന കഴിഞ്ഞ കാലങ്ങളിൽ തടസ്സപ്പെട്ടിരുന്നു. ഇത് പ്രാദേശികമായി ബാറ്ററി ഉല്പാദിപ്പിക്കുന്നതിലൂടെ പൂർണ്ണമായും മറികടക്കാനാവും. പ്രധാനമന്ത്രിയും ബന്ധപ്പെട്ട മന്ത്രാലയങ്ങളും ഇലക്ട്രിക്ക് വാഹനങ്ങളുടെ ഉത്പാദനത്തിനും പ്രചാരണത്തിനും വലിയ പ്രാധാന്യമാണ് നൽക്കുന്നതെന്ന് ഇലക്ട്രിക്ക് വാഹന വസായരംഗത്തുള്ളവർ അഭിപ്രായപ്പെടുന്നു.
ബെംഗളൂരു:എച് ഐ വി ബാധിതയായ യുവതി ചാടി ജീവനൊടുക്കിയ തടാകം നാട്ടുകാരുടെ ആവശ്യത്തെ തുടര്‍ന്ന് അധികൃതര്‍ വറ്റിച്ചു. കര്‍ണാടക ഹുബ്ബള്ളിയിലെ മൊറാബ് ഗ്രാമത്തിലെ 32 ഏക്കർ വിസ്തൃതിയുള്ള തടാകമാണ് ബുധനാഴ്ച വറ്റിച്ചത്. 20 സിഫോണുകളും നാലു മോട്ടോര്‍ പമ്പുകളും തടാകം വറ്റിക്കാന്‍ ഉപയോഗിച്ചു. കഴിഞ്ഞ മാസം 29-നാണ് എച്ച്‌ഐവി ബാധിതയായ പെണ്‍കുട്ടിയുടെ മൃതദേഹം തടാകത്തില്‍നിന്നു കണ്ടെടുത്തത്. പാതി മീന്‍ കൊത്തിയ നിലയിലായിരുന്നു മൃതദേഹം. പ്രദേശത്തെ ജനങ്ങള്‍ ഈ തടാകത്തില്‍നിന്നാണ് വെള്ളമെടുക്കുന്നത്. എന്നാല്‍ മൃതദേഹം കണ്ടെത്തിയതോടെ തടാകം വറ്റിക്കണമെന്ന ആവശ്യവുമായി നാട്ടുകാര്‍ രംഗത്തെത്തി. തടാകത്തിലെ ജലത്തില്‍ എച്ച്‌ഐവി വൈറസ് കലര്‍ന്നിട്ടുണ്ടാകുമെന്നാണു ഇവരുടെ വാദം.നാട്ടുകാരുടെ ആവശ്യത്തിനു വഴങ്ങാതെ മറ്റു മാര്‍ഗങ്ങളില്ലായിരുന്നെന്ന് നവാല്‍ഗുണ്ട് തഹസീല്‍ദാര്‍ നവീന്‍ ഹുള്ളുര്‍ പറഞ്ഞു.വറ്റിച്ച തടാകം ശുദ്ധീകരിച്ചശേഷം സമീപത്തെ മലാപ്രഭ കനാലില്‍നിന്ന് വെള്ളം എത്തിച്ച്‌ തടാകം നിറയ്ക്കാനാണ് അധികൃതരുടെ ശ്രമം. ഈ മാസം ഇരുപതോടെ തടാകം നിറയ്ക്കാനാകുമെന്നാണ് പ്രതീക്ഷിക്കപ്പെടുന്നത്. അതേസമയം, നാട്ടുകാരുടെ ഭയത്തിനു യാതൊരു ശാസ്ത്രീയ അടിസ്ഥാനവുമില്ലെന്ന് രാജീവ് ഗാന്ധി ഇന്‍സ്റ്റിറ്റ്യൂട്ട് ഓഫ് ചെസ്റ്റ് ആന്‍ഡ് കമ്മ്യൂണിക്കബിള്‍ ഡിസീസ് ഡയറക്ടര്‍ ഡോ.നാഗരാജ് പറഞ്ഞു. എച്ച്‌ഐവി വൈറസിന് എട്ടു മണിക്കൂറില്‍ കൂടുതല്‍ വെള്ളത്തെ അതിജീവിക്കാന്‍ കഴിയില്ലെന്നും 25 ഡിഗ്രി സെന്‍റിഗ്രേഡില്‍ കൂടുതല്‍ താപനിലയില്‍ വസിക്കില്ലെന്നും അദ്ദേഹം വ്യക്തമാക്കി.
ന്യൂഡൽഹി:ബ്രോയ്‌ലർ ചിക്കനിൽ കുത്തിവയ്ക്കുന്ന കോളിസ്റ്റിന്‍ ആന്റിബയോട്ടിക് രാജ്യത്ത് നിരോധിച്ചേക്കും.കോഴിയില്‍ വ്യാപകമായി മരുന്ന് ഉപയോഗിക്കുന്നത് മനുഷ്യരില്‍ ആന്റിബയോട്ടികിന് പ്രതിരോധം സൃഷ്ടിക്കുന്നതായി കണ്ടെത്തിയതോടെയാണ് നടപടി. മനുഷ്യരില്‍ ആന്റിബയോട്ടിക്കിന് പ്രതിരോധം സൃഷ്ടിക്കപ്പെടുന്നതിനാല്‍ പലരോഗങ്ങള്‍ക്കും ചികിത്സ ഫലപ്രദമാകുന്നില്ലെന്ന് പൊതുജനാരോഗ്യ പ്രവര്‍ത്തകര്‍ വ്യക്തമാക്കുന്നു.ലണ്ടന്‍ ആസ്ഥാനമായി പ്രവര്‍ത്തിക്കുന്ന ബ്യൂറോ ഓഫ് ഇന്‍വെസ്റ്റിഗേറ്റീവ് ജേണലിസം ഇന്ത്യയില്‍ നടത്തിയ അന്വേഷണത്തില്‍ കോഴിയില്‍ അതിശക്തമായ ആന്റിബയോട്ടിക്കിന്റെ സാന്നിധ്യം കണ്ടെത്തിയിരുന്നു.മൃഗസംരക്ഷണ വകുപ്പ്, ഡയറി ആന്റി ഫിഷറീസ്, ഫുഡ് സേഫ്റ്റി ആന്റ് സ്റ്റാന്റേര്‍ഡ് അതോറിറ്റി ഓഫ് ഇന്ത്യ, മിനിസ്ട്രി ഓഫ് അഗ്രിക്കള്‍ച്ചര്‍ ആന്റ് ഫാമേഴ്‌സ് വെല്‍ഫെയര്‍, മിനിസ്ട്രി ഓഫ് ഹെല്‍ത്ത് ആന്റ് ഫാമിലി വെല്‍ഫെയര്‍, ഡ്രഗ് കണ്‍ട്രോളര്‍ തുടങ്ങിയ സര്‍ക്കാര്‍ വകുപ്പുകള്‍ ഇക്കാര്യത്തെക്കുറിച്ച്‌ അന്വേഷണം നടത്തി കോളിസ്റ്റിന്‍ ആന്റിബയോട്ടിക് ഉപയോഗിക്കരുതെന്ന് ശുപാര്‍ശ ചെയ്തിരുന്നു. നവംബര്‍ 29ന് ചേര്‍ന്ന ഡ്രഗ് അഡൈ്വസറി ബോഡി യോഗം മൃഗങ്ങളില്‍ ഈ ആന്റിബയോട്ടിക് ഉപയോഗിക്കുന്നത് നിരോധിക്കുകയും ചെയ്തു. ഇതേതുടര്‍ന്ന് തീരുമാനം ഉടനെ സര്‍ക്കാര്‍ നടപ്പാക്കിയേക്കും.
ഗോൺജോ: ചൈനയിലെ പല നഗരങ്ങളിലും ടിബറ്റിലും പെട്രോൾ / ഡീസൽ ഉപയോഗിക്കുന്ന വാഹങ്ങൾ പ്രത്യേകിച്ചും ബൈക്ക് ടാക്സികൾ വെറും പഴയ കാല ചിത്രങ്ങൾ മാത്രമായി മാറിയിരിക്കുന്നു.
ലോകപ്രശസ്ത സഞ്ചാരിയും സഫാരി ചാനലിന്റെ ഉടമസ്ഥനുമായ സന്തോഷ് ജോർജ്ജ് കുളങ്ങര തന്റെ ലോക പര്യടനത്തിന്റെ അനുഭവങ്ങൾ പ്രേക്ഷകരുമായി പങ്കുവെക്കുന്ന സഞ്ചാരിയുടെ ഡയറി കുറിപ്പുകൾ എന്ന പരിപാടിയിലാണ് താൻ നേരിട്ട് കണ്ടറിഞ്ഞ വിവരങ്ങൾ മലയാളി പ്രേക്ഷകർക്കായി സഫാരി ചാനലിലൂടെ പങ്കുവെച്ചത്.
ആഗോള താപനത്തിനും വായു ശബ്ദ മലിനീകരണത്തിനും എതിരെ ലോകരാജ്യങ്ങളെല്ലാം തന്നെ ഫോസിൽ ഇന്ധനങ്ങളുടെ ഉപയോഗം പരമാവധി കുറച്ച് കൊണ്ടുവരാനും സൗരോർജ്ജ മാർഗ്ഗം സ്വീകരിക്കാനും ഇലക്ക്ട്രിക്ക് വാഹനങ്ങളടെ ഉത്പാദനം കൂട്ടാനും ബോധവൽക്കരണങ്ങൾ നടത്തുന്നുണ്ട്.
2030ൽ ഇന്ത്യയിലെ പെട്രോൾ ഡീസൽ വാഹനങ്ങളുടെ ഉത്പാദനത്തിലും റെജിസ്ട്രേഷനലിലും നിയന്ത്രണം കൊണ്ടുവരുമെന്ന് കേന്ദ്ര സർക്കാർ പ്രഖ്യാപിച്ച് കഴിഞ്ഞിരിക്കുന്നു. മഹാരാഷ്ട്ര ഉൾപ്പടെ പല സംസ്ഥാനങ്ങളും ഇതിന്റെ ചുവട് പിടിച്ച് ഇലക്ക്ട്രിക്ക് വാഹനങ്ങൾക്ക് പൂർണ്ണ നികുതിയിളവും മറ്റ് സൗകര്യങ്ങളും നൽകി തുടങ്ങി. 2020 ന്റ ആദ്യ പകുതിയിൽ തന്നെ ഇന്ത്യൻ വിപണിയിൽ ഇലക്ട്രക്ക് വാഹനങ്ങളുടെ കുത്തൊഴുക്ക് പ്രതീക്ഷിക്കാമെന്നാണ് വാഹന വിപണിയിലെ വിദഗ്ദർ അഭിപ്രായപ്പെടുന്നത്.
കടപ്പാട് : സഫാരി ചാനൽ
ന്യൂഡൽഹി:ലോക വനിതാ ബോക്സിങ് ചാംപ്യൻഷിപ്;ഇന്ത്യയുടെ മേരികോമിന് സ്വർണ്ണം.48 കിലോഗ്രാം വിഭാഗം ഫൈനലില്‍ ഉക്രൈന്റെ ഹന്ന ഒകാതയെ ഇടിച്ചിട്ടാണ് മേരികോം സ്വര്‍ണം കരസ്ഥമാക്കിയത്.ഇതോടെ ലോക ചാംപ്യന്‍ഷിപ്പില്‍ ആറു സ്വര്‍ണം നേടുന്ന ആദ്യ വനിതാ ബോക്സറായി ഈ മണിപ്പൂരുകാരി.അതോടൊപ്പം ഏറ്റവും കൂടുതല്‍ വിജയം സ്വന്തമാക്കിയ ബോക്‌സറെന്ന പദവി പുരുഷ ബോക്‌സിങിലെ ഇതിഹാസ താരമായ ക്യൂബയുടെ ഫെലിക്‌സ് സാവനൊപ്പം പങ്കിടുകയും ചെയ്തു.2010ല്‍ ഒരു ലോക ചാംപ്യന്‍ഷിപ്പില്‍ ജേതാവായതില്‍ പിന്നെ എട്ടുവര്‍ഷത്തിനു ശേഷമാണ് മേരികോം വീണ്ടും ലോക ചാംപ്യനാവുന്നത്. ഇതിനു മുൻപ് അഞ്ചു സ്വര്‍ണമെഡലും ഒരു വെങ്കലവുമായി ഐറിഷ് ബോക്സിങ് ഇതിഹാസം കാതി ടെയിലറുടെ ഒപ്പമായിരുന്നു മേരികോം.ഏഴ‌് വര്‍ഷത്തെ ഇടവേള കഴിഞ്ഞ‌് ലോക വേദിയില്‍ എത്തിയ മേരി ആദ്യ റൗണ്ട‌് മുതല്‍ ആധികാരിക പ്രകടനം പുറത്തെടുത്തു. ഫൈനലില്‍ ഒകോട്ടയ‌്ക്കെതിരെ തുടക്കംമുതല്‍ ആക്രമിച്ചു. കൃത്യതയുള്ള പഞ്ചുകളായിരുന്നു. ഇടയ‌്ക്ക‌് പിന്‍വലിഞ്ഞും, എതിരാളി മുന്നോട്ടായുമ്ബോള്‍ കടുത്ത പ്രഹരം നല്‍കിയും മേരി മുന്നേറി. അവസാന റൗണ്ടില്‍ ഒകോട്ടയ‌്ക്ക‌് പിടിച്ചുനില്‍ക്കാന്‍പോലുമായില്ല.മൂന്ന് കുട്ടികളുടെ അമ്മയാണ് മേരി. 2001 ലെ ലോകചാമ്ബ്യന്‍ഷിപ്പില്‍ നിന്നും 2018 ലെ ആറാം കിരീടത്തിലേക്ക് എത്തുമ്ബോഴേക്കും താരമെന്ന നിലയിലും അമ്മയെന്ന നിലയിലും നേടിയ അനുഭവ സമ്ബത്തും കരുത്തും മേരിയ്ക്ക് മുന്നോട്ടുള്ള വഴികളില്‍ വെളിച്ചമായി മാറി. രാജ്യത്തിന്റെ അഭിമാനം ഒരിക്കല്‍ കൂടി ഉയര്‍ത്തിയ മേരിയെ തേടി അഭിനന്ദനങ്ങളുടെ പ്രവാഹമാണ്.
മണിപ്പൂരിലെ അത്ര വികസിതമല്ലാത്ത മോയിറാം ലാംഖായിയിലെ കംഗാതെയി ഗ്രാമത്തിൽ കർഷകത്തൊഴിലാളികളായ മാങ്ഗതെ തോൻപാ കോമിന്റെയും അഖം കോമിന്റെയും മകളായി 1982 നവംബർ 24 ന് ആണ് മേരികോമിന്റെ ജനനം.എന്നാൽ കടുത്ത ദാരിദ്രം മൂലം പഠനം പാതിവഴിയിൽ ഉപേക്ഷിച്ച് മാതാപിതാക്കളോടൊപ്പം പാടത്ത് പണിക്ക് പോകേണ്ട സാഹചര്യമായിരുന്നു മേരികോമിന്.സ്കൂൾ പഠനകാലത്ത് സ്പോർട്സിൽ മേരി താൽപ്പര്യം കാണിച്ചിരുന്നുണെകിലും പഠനം പാതിവഴിയിൽ ഉപേക്ഷിക്കേണ്ടി വന്നതോടെ മേരിയുടെ കായിക സ്വപ്നങ്ങളും പൊലിഞ്ഞു.പാടത്ത് പണിചെയ്തുവരുന്ന കാലത്താണ് മേരിയുടെ ജീവിതത്തെ മാറ്റിമറിച്ച സംഭവം നടന്നത്.1998 ലെ ഏഷ്യൻ ഗെയിംസിൽ ഡീൻഗോ സിംഗ് ബോക്സിങ്ങിൽ സ്വർണ്ണ മെഡൽ നേടിയത്ത് മേരിയെ ഏറെ സ്വാധീനിച്ചു.ഇതോടെ ഒരു ബോക്സറായി തീരാനുള്ള ആഗ്രഹം മേരിയിൽ ഉടലെടുത്തു.എന്നാൽ കുടുംബത്തിലെ യാഥാസ്ഥിതിക മനോഭാവവും സാമ്പത്തിക ബുദ്ധിമുട്ടുകളും കാരണം മേരിക്ക് വീട്ടുകാരിൽ നിന്നും യാതൊരുവിധ പിന്തുണയും ലഭിച്ചിരുന്നില്ല.എങ്കിലും മേരി തന്റെ ഇഷ്ട്ട കായിക വിനോദത്തിലുള്ള പരിശീലനം ആരംഭിച്ചു.വളരെ ചുരുങ്ങിയ കാലങ്ങൾക്കുള്ളിൽ തന്നെ ബോക്സിങ്ങിൽ തന്റെ കഴിവ് തെളിയിക്കാൻ മേരിക്ക് സാധിച്ചു.2000 ത്തിൽ മേരികോം ആദ്യമായി ബോക്സിങ്ങിൽ ബെസ്റ്റ് ബോക്‌സർ അവാർഡ് നേടിക്കൊണ്ട് തന്റെ ജൈത്രയാത്രയ്ക്ക് തുടക്കം കുറിച്ചു.മാതാപിതാക്കളിൽ നിന്നും മേരി ഇക്കാര്യങ്ങൾ മറച്ചുവെച്ചിരുന്നെങ്കിലും പത്രത്തിൽ പടം വന്നതോടെ എല്ലാവരും ഇക്കാര്യങ്ങൾ അറിഞ്ഞു.ഇവർ മേരിയെ ഇതിൽ നിന്നും പിന്തിരിപ്പിക്കാൻ ശ്രമിച്ചെങ്കിലും പിന്നീടും മേരിയെ തേടി നിരവധി വിജയങ്ങൾ എത്തി.2000 മുതൽ 2005 വരെ അഞ്ച് ഇന്ത്യൻ ചാപ്യൻഷിപ്പുകളിൽ മേരി കിരീടം സ്വന്തമാക്കി. ഹിസാറിൽ നടന്ന രണ്ടാം ഏഷ്യൻ വനിതാ ചാമ്പ്യൻഷിപ്പ് മുതലാണ് മേരികോമിന്റെ അന്താരാഷ്ട്ര സ്വർണ്ണ നേട്ടം തുടങ്ങുന്നത്.2001 ഇൽ അമേരിക്കയിൽ നടന്ന ലോക വനിതാ ബോക്സിങ് ചാമ്പ്യൻഷിപ്പിൽ 48 കിലോ വിഭാഗത്തിൽ പങ്കെടുത്തുകൊണ്ടാണ് ലോകപോരാട്ടങ്ങളുടെ റിങ്ങിലേക്ക് മേരിയുടെ അരങ്ങേറ്റം.അന്ന് 18 കാരിയായിരുന്ന മേരി മത്സരത്തിൽ വെള്ളി നേടി.എന്നാൽ പരാജയത്തിൽ നിന്നും പാഠമുൾക്കൊണ്ട മേരി കൂടുതൽ പരിശീലനത്തിലൂടെ അടുത്ത തവണ തുർക്കിയിലെ ആന്റില്ല്യയിൽ കിരീടം സ്വന്തമാക്കി.2003 ഇൽ ഹിസാറിലെ ഏഷ്യൻ വനിതാ ചാപ്യൻഷിപ്പിൽ 46 കിലോയിൽ കിരീടം നേടി.തന്നെ മത്സരങ്ങളിൽ നിന്നും പിന്തിരിപ്പിക്കാൻ ശ്രമിച്ച പിതാവിന്റെ സാന്നിധ്യത്തിലാണ് മേരി ഇവിടെ സമ്മാനം സ്വീകരിച്ചത്.
നോർവേയിൽ 46 കിലോ വിഭാഗത്തിൽ ലോക കിരീടം,ഹങ്കറിയിൽ നടന്ന വിച്ച് കപ്പ് ടൂർണമെന്റ് കിരീടം,തായ്‌വാനിൽ ഏഷ്യൻ വനിതാ ബോക്സിങ് കിരീടം തുടങ്ങിയവ നേടി 2004 മേരി തന്റെ നേട്ടങ്ങളുടെ വർഷമാക്കി മാറ്റി.2006 ഇൽ ന്യൂഡൽഹിയിലെ തൽക്കത്തോര ഇൻഡോസ്റ്റേഡിയത്തിൽ നടന്ന മത്സരത്തിൽ മേരി കിരീടം നേടി.കിരീട നേട്ടത്തിന് ശേഷം തന്റെ ആരാധകർക്കായി റിങ്ങിൽ മേരികോം നടത്തിയ മണിപ്പൂരി നൃത്തം ആരും മറന്നുകാണാനിടയില്ല. വിവാഹത്തോടെ കായികരംഗത്ത് നിന്നും പിന്മാറുന്ന മാറ്റ് താരങ്ങളുടെ പതിവ് മേരി തെറ്റിച്ചു.ഫുട്ബോൾ കളിക്കാരനായ കരുങ് ഓൺലർ ആണ് മേരിയുടെ ഭർത്താവ്. 2007 ഇൽ ഇരട്ടക്കുട്ടികൾക്ക് ജന്മം നൽകിയതോടെ മേരി പിൻവാകുമെന്ന വിമർശകരുടെ വാക്കിന്റെ മുനയൊടിച്ചുകൊണ്ട് മേരി വീണ്ടും തിരിച്ചെത്തി.2009 ഇൽ ഏഷ്യൻ ഇൻഡോർ ഗെയിംസിൽ സ്വർണ്ണം നേടി മേരി തിരിച്ചുവരവ് ഗംഭീരമാക്കി.2010 ഇൽ കസാഖിസ്ഥാനിൽ നടന്ന ഏഷ്യൻ വനിതാ ചാമ്പ്യൻഷിപ്പിലും മേരി സ്വർണ്ണം നേടി.2013 ഇൽ മേരി മൂന്നാമത്തെ കുഞ്ഞിന് ജന്മം നൽകി.ഒരുവർഷം തികയുന്നതിന് മുൻപ് 2004 ഇൽ ഏഷ്യൻ ഗെയിംസിലും മേരി സ്വർണ്ണം നേടി.മേരിയുടെ കരിയറിലെ ആറാമത്തെ സ്വർണ്ണമാണ് 2018 ഇൽ നേടിയത്.2003 ഇൽ അർജുന അവാർഡ്,2009 ഇൽ രാജീവ് ഗാന്ധി ഖേൽരത്ന അവാർഡ്,2010 ഇൽ പദ്മശ്രീ,2013 ഇൽ പത്മഭൂഷൺ എന്നിവ നൽകി രാജ്യം മേരികോമിനെ ആദരിച്ചു.പുരുഷന്മാരുടെ സാമ്രാജ്യം എന്നി വിശേഷിപ്പിക്കപ്പെട്ടിരുന്ന ബോക്സിങ്ങിൽ നിരവധി പ്രതിബന്ധങ്ങൾ തരണം ചെയ്താണ് മേരി ഈ നേട്ടങ്ങൾ സ്വന്തമാക്കിയത്.ഇതിനിടയിൽ തന്റെ മുടങ്ങിയിരുന്ന പഠനം തുടരാന് ഓപ്പൺസ്കൂളിൽ പരീക്ഷ എഴുതി മെട്രികുലേഷൻ പാസാകാനും മേരിക്ക് സാധിച്ചു.പിന്നീട് ചുരാചാന്ദ്പൂർ കോളേജിൽ നിന്നും ബിരുദവും സ്വന്തമാക്കി.’അൺ ബ്രേക്കബിൾ’ എന്ന പേരിൽ തന്റെ ജീവിത യാഥാർഥ്യങ്ങൾ വരച്ചു കാട്ടുന്ന ആത്മകഥയും മേരി രചിച്ചു.ഇത് അതെ പേരിൽ തന്നെ സഞ്ജയ് ലീല ബൻസാലി സിനിമയാക്കുകയും ചെയ്തു.പ്രിയങ്ക ചോപ്രയാണ് ഇതിൽ മേരികോമിനെ അവതരിപ്പിച്ചത്.
കർണാടക:മാണ്ഡ്യയില്‍ സ്വകാര്യ ബസ് കനാലിലേക്ക് മറിഞ്ഞ് 25 പേർ മരിച്ചു.മാണ്ഡ്യയില്‍ നിന്നും പാണ്ഡവപുരയിലേക്കു പോയ ബസ്സാണ് അപകടത്തില്‍ പെട്ടത്. ബെംഗളൂരു- മൈസൂരു പാതയിലെ കനാലിലേക്ക് ബസ് മറിയുകയായിരുന്നു. ശനിയാഴ്ച്ച ഉച്ചക്കാണ് അപകടം നടന്നത്. ബസ് മുഴുവനായും കനാലില്‍ മുങ്ങിക്കിടക്കുകയാണ്. കനാലിലേക്ക് മറിഞ്ഞയുടന്‍ ബസ് മുഴുവനായി മുങ്ങിപ്പോയതും വാതിലുകള്‍ അടിഭാഗത്തായിപ്പോയതുമാണ് മരണസംഖ്യ ഉയര്‍ത്തിയത്. മുഖ്യമന്ത്രി എച്ച്‌.ഡി.കുമാരസ്വാമി മറ്റു പരിപാടികളെല്ലാം റദ്ദാക്കി സംഭവ സ്ഥലത്തേക്കു തിരിച്ചു.അപകടകാരണം ഇനിയും വ്യക്തമായിട്ടില്ല.സ്കൂള്‍ വിദ്യാര്‍ഥികള്‍ ഉള്‍പ്പെടെ മുപ്പതിലധികം പേരാണ് ബസില്‍ ഉണ്ടായിരുന്നതെന്ന് പോലീസ് അറിയിച്ചു.
ചെന്നൈ:തമിഴ്‌നാട്ടിൽ ഗജ ചുഴലിക്കാറ്റ് വീശിയടിക്കുന്നു.വ്യാഴാഴ്ച അര്‍ധരാത്രിയോടെ മണിക്കൂറില്‍ 100 കിലോമീറ്റര്‍ വേഗതയിൽ വീശിയ ചുഴലിക്കാറ്റിൽ മരിച്ചവരുടെ എണ്ണം ആറായി.ടലൂരില്‍ പൊട്ടിവീണ വൈദ്യുതി ലൈനില്‍ തട്ടി ഒരാള്‍ മരിച്ചു.വിരുതാചലത്ത് മതില്‍ ഇടിഞ്ഞു വീണ് സ്ത്രീ മരിച്ചു.ശക്തമായ കാറ്റില്‍ വീടുതകര്‍ന്നുവീണ് പുതുക്കോട്ടയില്‍ നാലുപേരും മരിച്ചു. നാഗപട്ടണത്തെ വിദ്യാഭ്യാസ സ്ഥാപനങ്ങള്‍ക്ക് അവധി പ്രഖ്യാപിച്ചിട്ടുണ്ട്. ചുഴലിക്കാറ്റ് മുന്നില്‍ കണ്ട് തമിഴ്‌നാട് തീരത്തുനിന്ന് 75,000 ത്തിലധികം പേരെ ഒഴിപ്പിച്ചു. ആറായിരം ദുരിതാശ്വാസ ക്യാമ്ബുകള്‍ ആരംഭിച്ചിട്ടുണ്ട്.ആവശ്യമെങ്കില്‍ സൈന്യത്തിന്റെ സഹായം തേടുമെന്ന് തമിഴ്‌നാട് സര്‍ക്കാര്‍ വ്യക്തമാക്കിയിട്ടുണ്ട്. കേരളത്തിലും ശക്തമായ മഴയ്ക്ക് സാദ്ധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചിട്ടുണ്ട്. ഇടുക്കിയില്‍ ഇന്ന് ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്. കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, പാലക്കാട്, തൃശൂര്‍ ജില്ലകളില്‍ ഇന്ന് യെല്ലോ അലര്‍ട്ട് പ്രഖ്യാപിച്ചിരിക്കുകയാണ്.
ബംഗളൂരു:കേന്ദ്ര പാര്‍ലിമെന്ററികാര്യ മന്ത്രി അനന്ത്കുമാര്‍ (59) അന്തരിച്ചു. അര്‍ബുദ രോഗ ബാധയെ തുടര്‍ന്ന് ബംഗളൂരു ബസവനഗുഡിയിലെ ശ്രീ ശങ്കരാചാര്യ ക്യാന്‍സര്‍ സെന്ററില്‍ ചികിത്സയിലായിരുന്നു. ഇന്ന് പുലര്‍ച്ചെ 1.40ഓടെയായിരുന്നു അന്ത്യം.ലണ്ടനില്‍ വിദഗ്ധ ചികിത്സക്ക് ശേഷം കഴിഞ്ഞ മാസം 20നാണ് അദ്ദേഹം ബംഗളൂരുവില്‍ തിരിച്ചെത്തിയത്. പാര്‍ലിമെന്ററികാര്യത്തിന് പുറമെ രാസവള വകുപ്പിന്റെ ചുമതലയും അനന്ത്കുമാര്‍ വഹിച്ചിരുന്നു. എബിവിപിയിലൂടെ രാഷ്ട്രീയത്തില്‍ പ്രവേശിച്ച അദ്ദേഹം പിന്നീട് ബിജെപിയില്‍ സജീവമായി.1996 മുതല്‍ ലോക്‌സഭയില്‍ തെക്കന്‍ ബംഗളൂരു മണ്ഡലത്തെ പ്രതിനിധീകരിച്ചുവരുന്നു. തുടര്‍ച്ചയായി ആറ് തവണയാണ് അദ്ദേഹം തിരഞ്ഞെടുക്കപ്പെട്ടത്. അടല്‍ ബിഹാരി വാജ്പയ് മന്ത്രിസഭയില്‍ സിവില്‍ ഏവിഷേയന്‍ മന്ത്രിയായി പ്രവര്‍ത്തിച്ചു. ബിജെപി കര്‍ണാടക സംസ്ഥാന പ്രസിഡന്റ്, ദേശീയ ജനറല്‍ സെക്രട്ടറി, എബിവിപി ദേശീയ പ്രസിഡന്റ്, ഭാരതീയ ജനതാ യുവമോര്‍ച്ച സംസ്ഥാന പ്രസിഡന്റ് തുടങ്ങിയ പദവികള്‍ വഹിച്ചിട്ടുണ്ട്.