India

മുംബൈ: വായ്പാ തട്ടിപ്പ് നടത്തി രാജ്യം വിട്ട വജ്ര വ്യാപാരി നീരവ് മോദിയുടെ ആഢംബര ബംഗ്ലാവ് മഹാരാഷ്ട്ര സര്‍ക്കാര്‍ സ്ഫോടക വസ്തുക്കള്‍ ഉപയോഗിച്ച്‌ തകര്‍ത്തു.ഒന്നരയേക്കറില്‍ കോടികള്‍ ചെലവഴിച്ച്‌ നീരവ് മോദി കെട്ടി ഉയര്‍ത്തിയ ഒഴിവുകാല വസതിയാണ് ഇതോടെ തകർന്നത്.കയ്യേറ്റങ്ങളും നി‍ര്‍മ്മാണ ചട്ടലംഘനവും കണ്ടെത്തിയതോടെയാണ് ബംഗ്ലാവ് പൊളിച്ചുമാറ്റുന്നതിന് ബോംബൈ ഹൈക്കോടതി ഉത്തരവിട്ടത്. 33,000 ചതുരശ്ര അടിയില്‍ കെട്ടി ഉയര്‍ത്തിയിരിക്കുന്ന ‘രൂപാന’ എന്ന ബംഗ്ലാവ് അലിബാഗ് കടല്‍ത്തീരത്തിന് അഭിമുഖമായാണ് സ്ഥിതിചെയ്യുന്നത്. 25 കോടി രൂപ ചെലവിട്ടാണ്  നീരവ് മോദി ബംഗ്ലാവ് കെട്ടിപ്പടുത്തതെന്നാണ് വിവരം. ഒട്ടേറെ മുറികള്‍, അത്യാഡംബര പ്രൈവറ്റ് ബാറുകള്‍ എന്നിവയടങ്ങിയതാണ് ഈ കെട്ടിടം. മുപ്പത് കിലോ സ്ഫോടക വസ്തുക്കള്‍ വിവിധ ഇടങ്ങളില്‍ നിറച്ചാണ് കെട്ടിടം പൊളിച്ചത്. തീരത്തെ സ്ഥലം എന്‍ഫോഴ്സമെന്‍റ് ഡയറക്ടറേറ്റ് ഏറ്റെടുത്തു കഴിഞ്ഞു. അകത്തെ മൂല്യമേറിയ വസ്തുക്കളും ലേലത്തില്‍ വയ്ക്കും.പഞ്ചാബ് നാഷണല്‍ ബാങ്കില്‍ നിന്ന് 13,000കോടില്‍ പരം രൂപ വായ്പയെടുത്ത് രാജ്യംവിട്ട മോദി ബംഗ്ലാവ് നഷ്ടപ്പെടാതിരിക്കാന്‍ വലിയ ശ്രമങ്ങള്‍ നടത്തിയിരുന്നു. അവസാനം വരെയും ബംഗ്ലാവ് കൈവിട്ടു പോകാതിരിക്കാന്‍ നീരവ് പോരാട്ടം നടത്തിയെങ്കിലും പരാജയപ്പെട്ടുകയായിരുന്നു.

ജമ്മു:ജമ്മുവിലെ ബസ് സ്റ്റാന്‍ഡില്‍ ഉണ്ടായ ഗ്രനേഡ് ആക്രമണത്തിൽ രണ്ടുപേർ മരിച്ചു.27 പേർക്ക് പരിക്കേറ്റു.ഉത്തരാഖണ്ഡ് ഹരിദ്വാർ സ്വദേശി മുഹമ്മദ് ഷരീഖ്(17),അനന്തനാഗ് സ്വദേശി മുഹമ്മദ് റിയാസ് എന്നിവരാണ് മരിച്ചത്.മുഹമ്മദ് ഷരീഖ് ഇന്നലെ സംഭവസ്ഥലത്ത് വെച്ചുതന്നെ മരണപ്പെട്ടിരുന്നു.ജമ്മുവിലെ സർക്കർ മെഡിക്കൽ കോളേജിൽ ചികിത്സയിലായിരുന്ന മുഹമ്മദ് റിയാസ് ഇന്ന് പുലർച്ചയോടെയാണ് മരണത്തിനു കീഴടങ്ങിയത്. ജമ്മു നഗരത്തിലെ ബസ്സ്റ്റാൻഡിൽ ഇന്നലെ ഉച്ചയോടെയാണ് ആക്രമണം ഉണ്ടായത്.ബസ്റ്റാന്റിൽ നിര്‍ത്തിയിട്ടിരുന്ന ഒരു ബസ്സിനടിയിലേക്കാണ് ഗ്രനേഡ് എറിഞ്ഞത്.ആക്രമണത്തില്‍ പിന്നില്‍ ഹിസ്‍ബുല്‍ മുജാഹിദീനെന്ന് പൊലീസ് വ്യക്തമാക്കി.ഗ്രനേഡ് എറിഞ്ഞ യാസീന്‍ ഭട്ടെന്നയാളെ പൊലീസ് അറസ്റ്റ് ചെയ്തു. ഹിസ്‍ബുല്‍ മുജാഹിദീന്‍ കമാന്‍ററുടെ നിര്‍ദേശപ്രകാരമാണ് ഭട്ട് ഗ്രനേഡ് എറിഞ്ഞതെന്ന് പൊലീസ് അറിയിച്ചു.മേഖലയില്‍ സുരക്ഷ ശക്തമാക്കി.ആളുകളുടെ ശ്രദ്ധ തിരിച്ചുവിട്ട് ആക്രമണം നടത്താനുള്ള ഭീകരരുടെ പദ്ധതിയാണിതെന്ന് സംശയിക്കുന്നതായി ജമ്മു ഐജി എം.കെ സിൻഹ പറഞ്ഞു.

മുംബൈ:രാജ്യത്തെ ഏറ്റവും വലിയ മാലിന്യ നിക്ഷേപ സ്ഥലമായ ദേവ്നാറിൽ മാലിന്യക്കൂമ്പാരം കത്തുന്നു.വ്യാഴാഴ്ച ഉച്ചയോടെയാണ് മാലിന്യകൂമ്പാരത്തിൽ നിന്നും തീയുയരുന്നത് കണ്ടത്.തീപിടിത്തത്തെ തുടർന്നുണ്ടായ വിഷപ്പുക നഗരത്തിന് ഭീഷണിയായിട്ടുണ്ട്.മൂന്നുകോടി ജനസംഘ്യയുള്ള പ്രദേശമാകെ കറുത്ത പുകയില മൂടിയിരിക്കുകയാണ്.ഫയർ എൻജിനുകൾ തീകെടുത്താനുള്ള ശ്രമത്തിലാണ്.7000 മുതൽ 9000 മെട്രിക് ടൺ വരെയുള്ള മാലിന്യമാണ് ദിവസവും ഇവിടെയെത്തുന്നത്.തീപടരാനുള്ള കാരണം വ്യക്തമല്ല.

ന്യൂഡൽഹി:അയോദ്ധ്യ കേസിൽ മധ്യസ്ഥരെ നിയോഗിക്കുന്നത് സംബന്ധിച്ച കേസ് സുപ്രിം കോടതി വിധി പറയാനായി മാറ്റി.മധ്യസ്ഥരെ നിയോഗിക്കുന്നത് സംബന്ധിച്ച വാദപ്രതിവാദം ഒന്നരമണിക്കൂര്‍ നീണ്ടിരുന്നു. ഇതിന് ശേഷമാണ് കേസ് വിധി പറയാനായി മാറ്റിയത്.വിശ്വാസവും വൈകാരികവുമായ പ്രശ്നമാണിതെന്നും അതിനാൽ മധ്യസ്ഥതയ്ക്കുള്ള ചെറിയ സാധ്യത പോലും പരിഗണിക്കണമെന്നും കോടതി വ്യക്തമാക്കി.അയോധ്യയിൽ ബാബറി മസ്ജിദ് നിലനിന്നിരുന്ന 2 ഏക്കര്‍77 സെന്‍റ് ഭൂമിയുടെ മേലുള്ള തര്‍ക്കത്തിലാണ് സുപ്രിം കോടതിയുടെ മധ്യസ്ഥ ശ്രമം. അയോദ്ധ്യ കേസുമായി ബന്ധപ്പെട്ട് വ്യക്തമായ കാഴ്ചപ്പാടുണ്ടെന്നും തര്‍ക്കം പരിഹരിക്കാന്‍ കോടതി മേല്‍നോട്ടത്തില്‍ മധ്യസ്ഥചര്‍ച്ചകള്‍ നടന്നില്ലെന്നും ചൂണ്ടിക്കാട്ടിയാണ് സുപ്രീംകോടതിയുടെ ഈ നീക്കം.ചീഫ്ജസ്റ്റിസ് രഞ്ജന്‍ ഗോഗോയ്, ജഡ്ജിമാരായ എസ്.എ ബോബ്‌ഡെ, ഡി.വൈ ചന്ദ്രചൂഡ്, അശോക് ഭൂഷണ്‍, എസ്. അബ്ദുല്‍ നസീര്‍ എന്നിവരടങ്ങുന്ന അഞ്ചംഗ ബെഞ്ചാണ് ഇന്നു കേസ് പരിഗണിച്ചത്. എന്നാൽ മധ്യസ്ഥതയെ ഹിന്ദു സംഘടനകൾ എതിർത്തു.പൊതുജനങ്ങൾ മധ്യസ്ഥത അംഗീകരിക്കില്ലെന്ന് ഹിന്ദു മഹാസഭ വാദിച്ചു.മധ്യസ്ഥതയ്ക്ക് ഉത്തരവിടും മുൻപ് പൊതുജനങ്ങളുടെ അഭിപ്രായം കേൾക്കണമെന്നും ഹിന്ദു മഹാസഭ പറഞ്ഞു.എന്നാൽ നിങ്ങൾ ഇതിനെ മുൻവിധികളോടെയാണോ കാണുന്നതെന്ന് ഹിന്ദു സംഘടനകളോട് ജസ്റ്റിസ് എസ്.എ ബോബ്‌ഡെ ചോദിച്ചു.പരാജയപ്പെട്ടാലും കോടതി മധ്യസ്ഥതയുമായി മുന്നോട്ട് പോവുകയാണെന്നും അദ്ദേഹം അറിയിച്ചു.