India

ന്യൂഡല്‍ഹി:കൊറോണ വൈറസിന്റെ പുതിയ വകഭേദമായ ‘ഒമിക്രോണ്‍’ വ്യാപനത്തിന്റെ ആശങ്ക നിലനിൽക്കുന്ന പശ്ചാത്തലത്തില്‍ പ്രായമായവര്‍ക്കും പ്രതിരോധശേഷി കുറഞ്ഞവര്‍ക്കും വാക്സിന്റെ മൂന്നാം ഡോസ് നല്‍കുന്നകാര്യം പരിഗണനയില്‍.പ്രതിരോധ കുത്തിവെപ്പുമായി ബന്ധപ്പെട്ട ദേശീയ സാങ്കേതികസമിതി ഇക്കാര്യത്തില്‍ ഉടനെ ശുപാര്‍ശ നല്‍കിയേക്കും.അന്തിമതീരുമാനം എടുക്കേണ്ടത് ആരോഗ്യമന്ത്രാലയമാണ്. കോവിഡ് മൂലം മരിച്ചവരില്‍ കൂടുതലും വാക്സിന്‍ എടുക്കാത്തവരാണ്. വൈറസിന്റെ വകഭേദത്തെ പ്രതിരോധിക്കാന്‍ ബൂസ്റ്റര്‍ ഡോസിന് സാധിക്കുമെന്നാണ് കരുതുന്നത്. രോഗത്തിന്റെ തീവ്രതയും മരണവും തടയുന്നതിന് ബൂസ്റ്റര്‍ ഡോസ് പ്രയോജനപ്പെടും.രണ്ടുഡോസുകളിലൂടെ ലഭിച്ച പ്രതിരോധശേഷി കുറച്ചു മാസങ്ങള്‍ കഴിയുമ്പോൾ കുറഞ്ഞുവരും. മറ്റുരോഗങ്ങള്‍ ഉള്ളവരിലും പ്രായമേറിയവരിലുമാണ് പ്രതിരോധശേഷി വേഗം കുറയുന്നത്. ഈ സാഹചര്യത്തിലാണ് ബൂസ്റ്റര്‍ ഡോസ് അനിവാര്യമാകുന്നത്. അതേസമയം, ചില രാജ്യങ്ങള്‍ ഇതിനോടകം തന്നെ ബൂസ്റ്റര്‍ ഡോസ് നല്‍കിത്തുടങ്ങി. ഇസ്രയേലാണ് ഇക്കാര്യത്തില്‍ ഏറ്റവും മുന്നില്‍. 18 വയസ്സില്‍ താഴെയുള്ള കുട്ടികള്‍ക്ക് വാക്സിന്‍ നല്‍കാനുള്ള അന്തിമതീരുമാനവും കേന്ദ്രസര്‍ക്കാര്‍ ഉടനെ എടുത്തേക്കും. കുട്ടികള്‍ക്ക് വാക്സിന്‍ നല്‍കാന്‍ പദ്ധതി തയ്യാറാക്കിയിട്ടുണ്ടെങ്കിലും എന്നു തുടങ്ങണമെന്ന് തീരുമാനിച്ചിട്ടില്ല. രോഗമുള്ള കുട്ടികള്‍ക്കും പ്രതിരോധശേഷി കുറഞ്ഞവര്‍ക്കുമാണ് മുന്‍ഗണന.

അഹമ്മദാബാദ്: ഗുജറാത്തിലെ കച്ച്‌ തീരത്ത് ചരക്കുകപ്പലുകള്‍ കൂട്ടിയിടിച്ച്‌ അപകടം.ദ്വാരക ജില്ലയിലെ കടലിൽ 10 മൈൽ അകലെ രണ്ട് നോട്ടിക്കൽ മൈൽ അകലെയാണ് അപകടമുണ്ടായത്. രണ്ട് വിദേശ ചരക്കു കപ്പലുകളാണ് കൂട്ടിയിടിച്ചത്.എംവീസ് ഏവിയേറ്റര്‍, അറ്റ്ലാന്‍റിക് ഗ്രേസ് എന്നീ ചരക്കുകപ്പലുകളാണ് കൂട്ടിയിടിച്ചത്. കപ്പല്‍ ജീവനക്കാര്‍ക്ക് പരിക്കുകളോ മറ്റ് അപകടങ്ങളോ റിപ്പോര്‍ട്ട് ചെയ്തിട്ടില്ല.സംഭവസ്ഥലത്തേക്ക് കോസ്റ്റ് ഗാർഡിന്റെ ഒരു സംഘവും ഹെലികോപ്റ്റർ ഉൾപ്പെടെയുള്ള സംഘവും രക്ഷാപ്രവർത്തനത്തിനായി പുറപ്പെട്ടു.അപകട സ്ഥലത്ത് കോസ്റ്റ് ഗാർഡ് സംഘം പരിശോധന നടത്തുന്നുണ്ട്. കൂട്ടിയിടിയില്‍ ചെറിയ തോതിലുള്ള എണ്ണ ചോര്‍ച്ച ഉണ്ടായതായാണ് റിപ്പോര്‍ട്ടുകള്‍. അപകടസ്ഥലം നിരീക്ഷണത്തിലാണ്.സംഭവസ്ഥലത്ത് മലിനീകരണ നിയന്ത്രണത്തിനുള്ള കപ്പലും സജ്ജമാക്കിയിട്ടുണ്ട്.

ന്യൂദല്‍ഹി: ലോക റെയില്‍ ഭൂപടത്തില്‍ പുതുചരിത്രം കൂട്ടിച്ചേർത്ത് ഇന്ത്യ. ലോകത്തെ ഡ്രൈവറില്ലാത്ത ഏറ്റവും വലിയ നാലാമത്തെ ട്രെയിന്‍ സര്‍വീസുമായി ഡൽഹി മെട്രോ.ഡൽഹി മെട്രോയിലെ മജ്‌ലിസ് പാര്‍ക്ക് മുതല്‍ ശിവ വിഹാര്‍ വരെയുള്ള, 59 കിലോമീറ്റര്‍ പിങ്ക് ലൈനിലും ഇന്നലെ രാവിലെ മുതല്‍ ലോക്കോ പൈലറ്റില്ലാത്ത ട്രെയിനുകള്‍ ഓടിത്തുടങ്ങി. ഇതോടെ ഡൽഹി മെട്രോയുടെ 96.7 കിലോമീറ്ററും ഓട്ടോമേറ്റഡായി. 2020 ഡിസംബറില്‍ പ്രധാനമന്ത്രി നരേന്ദ്ര മോദി മെട്രോയുടെ 37.7 കിലോമീറ്ററില്‍ ഡ്രൈവറില്ലാ ട്രെയിന്‍ ഉദ്ഘാടനം ചെയ്തിരുന്നു.രാജ്യം ചരിത്ര നേട്ടം സ്വന്തമാക്കിയതായി ഉദ്ഘാടന പ്രസംഗത്തില്‍ നഗര വികസന മന്ത്രി ഡോ. ഹര്‍ദീപ് സിങ് പുരി ചൂണ്ടിക്കാട്ടി. ഡിഎംആര്‍സിക്കു മാത്രമല്ല രാജ്യത്തിനു തന്നെ അഭിമാനകരമാണ് ഈ നേട്ടമെന്നും അദ്ദേഹം പറഞ്ഞു. ഡിടിഒ അഥവാ ഡ്രൈവര്‍ലസ് ട്രെയിന്‍ ഓപ്പറേഷന്‍സ് ദല്‍ഹി മെട്രോയിലെ തൊണ്ണൂറ്റിയേഴ് കിലോമീറ്ററും ഡ്രൈവറില്ലാത്ത ട്രെയിനുകള്‍ ഓടുന്ന പാതയായി. ഇതോടെ ട്രെയിനുകളുടെ ഓട്ടം കൂടുതല്‍ സുഗമമായി.ട്രെയിന്‍ രാവിലെ ഓടിത്തുടങ്ങും. മുന്‍പ് എന്‍ജിനുകളും കോച്ചുകളും പരിശോധിക്കുന്നതും സെല്‍ഫ് ടെസ്റ്റുകളായി. അതിനാല്‍ കൃത്യത വളരെക്കൂടുതലാണ്.