കണ്ണൂർ:സെന്റ് മൈക്കിള്‍സ് ആംഗ്ലോ ഇന്ത്യന്‍ ഹയര്‍ സെക്കന്‍ഡറി സ്കൂളിലേക്കുള്ള വഴി കന്റോണ്‍മെന്റ് അധികൃതര്‍ വീണ്ടും അടച്ചു.സ്കൂളിനു മുന്‍പില്‍ ഡിഎസ്‌സി ഉടമസ്ഥതയിലുള്ള മൈതാനം പൂര്‍ണമായും കമ്പിവേലി കൊണ്ട് പട്ടാളം അടച്ചിരുന്നു. മൈതാനത്തിന് കിഴക്കു ഭാഗത്ത് നിന്ന് മാത്രം വാഹനങ്ങള്‍ക്ക് സ്കൂളിനു മുന്നിലേക്ക് വരാന്‍ സ്കൂള്‍ മതിലിനോട് ചേര്‍ന്ന് വഴി അനുവദിച്ചിരുന്നു.ഈ വഴിയാണ് ഇന്നലെ രാവിലെ അടച്ച നിലയില്‍ കണ്ടത്. രണ്ട് കോണ്‍ക്രീറ്റ് തൂണുകള്‍, ഇവയ്ക്ക് മധ്യത്തിലായി മൈതാനത്തിലേക്ക് പ്രവേശിക്കരുത് എന്ന ബോര്‍ഡ് സ്ഥാപിച്ചാണ് പട്ടാളം വഴി അടച്ചിട്ടുള്ളത്. വിദ്യാര്‍ഥികള്‍ക്ക് സ്കൂളിലേക്ക് നടന്നു പോകാന്‍ മാത്രമുള്ള വഴിയാണ് നിലവില്‍ ഉള്ളത്. ഇനി സ്കൂള്‍ വാഹനങ്ങള്‍ റോഡില്‍ തന്നെ നിര്‍ത്തി കുട്ടികളെ ഇറക്കുകയും കയറ്റുകയും ചെയ്യണം.ഇത് തിരക്കേറിയ പ്രഭാത് ജംക്‌ഷന്‍-പയ്യാമ്പലം റോഡില്‍ ഗതാഗതക്കുരുക്കും അപകട ഭീഷണിയും ഉണ്ടാക്കും.