ഭക്ഷണം കഴിക്കാനെത്തി; ഒരു വയസുള്ള കുട്ടിയെ ഹോട്ടലിൽ മറന്ന് വെച്ച് കുടുംബം

കണ്ണൂർ: ഭക്ഷണം കഴിച്ച് മടങ്ങവേ ഒരു വയസുള്ള കുട്ടിയെ ഹോട്ടലിൽ മറന്ന് വെച്ച് കുടുംബം. തളിപ്പറമ്പിലെ ഏഴാം മൈലിലുള്ള ഹോട്ടലിലായിരുന്നു സംഭവം. ഹോട്ടൽ അധികൃതർ പോലീസ് സ്‌റ്റേഷനിൽ ഏൽപ്പിച്ച കുട്ടിയെ പിന്നീട് രക്ഷിതാക്കൾക്ക് കൈമാറുകയായിരുന്നു. ചപ്പാരക്കടവ് ഭാഗത്ത് നിന്നും രണ്ട് വാഹനങ്ങളിലായാണ് കുടുംബം ഹോട്ടലിൽ ഭക്ഷണം കഴിക്കാനായെത്തിയത്. ഈ സമയം ഒരു വയസുള്ള ആൺകുട്ടി കുടുംബത്തിലെ മുതിർന്നയാളുടെ മുതിർന്നയാളുടെ കയ്യിലായിരുന്നു. ഭക്ഷണം കഴിച്ചതിന് ശേഷം കൈ കഴുകുന്നതിനായി ഇയാൾ കുട്ടിയെ താഴെ നിർത്തി. എന്നാൽ പിന്നീട് കുട്ടിയെ എടുക്കാതെ ഇവർ തിരികെ വാഹനങ്ങളിൽ കയറി പോകുകയായിരുന്നു.ഇവർ പോയതിന് പിന്നാലെ ഹോട്ടൽ കൗണ്ടറിന് സമീപം കുട്ടിയെ കണ്ടെത്തിയ ജീവനക്കാർ സിസിടിവി ദൃശ്യങ്ങൾ പരിശോധിച്ചപ്പോഴാണ് കുട്ടിയുടെ കൂടെ ഉണ്ടായിരുന്ന കുടുംബത്തെ തിരിച്ചറിയുന്നത്. ഉടൻ തന്നെ ഹോട്ടലുകാർ പോലീസിൽ വിവരമറിയിക്കുകയായിരുന്നു. പോലീസുകാർ എത്തി കുട്ടിയെ തളിപ്പറമ്പ് സ്റ്റേഷനിൽ എത്തിച്ചു.കിലോമീറ്ററുകൾക്ക് ശേഷമാണ് കുട്ടിയെ കാണാതായ വിവരം വീട്ടുകാർ അറിയുന്നത്. തുടർന്ന് ഉടൻ തന്നെ ഇവർ തളിപ്പറമ്പിലെ ബന്ധുക്കളോട് വിവരം പറഞ്ഞു. പിന്നാലെ ബന്ധുക്കൾ ഹോട്ടലിൽ എത്തി വിവരം തിരക്കി. ഹോട്ടൽ ജീവനക്കാരിൽ നിന്നും ലഭിച്ച നിർദ്ദേശാനുസരണം ബന്ധുക്കൾ പോലീസ് സ്‌റ്റേഷനിലെത്തിയെങ്കിലും കുട്ടിയെ വിട്ട് കിട്ടിയില്ല. അച്ഛനും അമ്മയും നേരിട്ടെത്തിയ ശേഷമാണ് കുട്ടിയെ കൈമാറിയത്.കുട്ടിയെ അശ്രദ്ധമായി ഹോട്ടലിൽ ഉപേക്ഷിച്ചതിന് പോലീസ് വീട്ടുകാരെ ശകാരിക്കുകയും ചെയ്തു.