കണ്ണൂർ:ലോക്ക് ഡൌൺ കാലത്ത് പുറത്തിറങ്ങാൻ പറ്റാതെ അവശ്യ സാധനങ്ങൾ വാങ്ങാന്‍ ബുദ്ധിമുട്ടുന്നവരെ സഹായിക്കാന്‍ കണ്ണൂരില്‍ കോള്‍ സെന്റര്‍ പ്രവര്‍ത്തനം തുടങ്ങി.ജില്ലാ പഞ്ചായത്തിലാണ് കോൾ സെന്റർ പ്രവർത്തനമാരംഭിച്ചിരിക്കുന്നത്. രാവിലെ 10 മുതല്‍ വൈകിട്ട് അഞ്ചുമണി വരെയാണ് പ്രവര്‍ത്തന സമയം.കോള്‍ സെന്ററില്‍ വിളിച്ചു സാധനങ്ങളുടെ ലിസ്റ്റ് പറഞ്ഞു കൊടുത്താല്‍ മതി 24 മണിക്കൂറിനുള്ളില്‍ സാധനങ്ങള്‍ വീട്ടിലെത്തിക്കും.സാധനങ്ങളുടെ മാർക്കറ്റ് വിലമാത്രമേ ഈടാക്കൂ. സര്‍വീസ് ചാര്‍ജും നല്‍കേണ്ടതില്ല. അൻപതോളം വളണ്ടിയര്‍മാരെ ഡെലിവറിക്കായി നിയമിച്ചിട്ടുണ്ട്.മാസ്‌ക്ക്, സാനിറ്റൈസര്‍, ഗ്ലൗസ് തുടങ്ങിയ സുരക്ഷാ മാര്‍ഗങ്ങള്‍ ഉപയോഗിച്ചാവും ഡെലിവറി ബോയ്‌സ് വീടുകളിലെത്തുക.തുക ഗുഗിള്‍പേ വഴിയാണ് പണം നല്‍കേണ്ടത്. അതില്ലാത്തവര്‍ക്ക് സാധാരണ നിലയിലും പണം നല്‍കാം.അവശ്യ വസ്തുക്കളായ പലവ്യഞ്ജനങ്ങള്‍, പച്ചക്കറി എന്നിവയ്ക്ക് പുറമെ കുട്ടികളുടെ ഭക്ഷണങ്ങളും മരുന്നുകളും കോള്‍സെന്റര്‍ വഴി ലഭ്യമാക്കും. ഗ്രാമങ്ങളിലുള്ളവര്‍ ആവശ്യപ്പെടുകയാണെങ്കില്‍ ആ വിവരങ്ങള്‍ കുടുംബശ്രീക്ക് കൈമാറി അവര്‍ മുഖേന അവശ്യവസ്തുക്കള്‍ വീടുകളിലെത്തിക്കും.പാകം ചെയ്ത ഭക്ഷണത്തിന് ആവശ്യം വരികയാണെങ്കില്‍ അതത് പ്രദേശത്തെ കമ്യൂണിറ്റി കിച്ചന്‍ സെന്ററിനെ വിവരമറിയിച്ച്‌ ഭക്ഷണം ലഭ്യമാക്കും.പരമാവധി ഒരാഴ്ചത്തേക്ക് വേണ്ട സാധനങ്ങളാണ് വീടുകളിലെത്തിക്കുക.