ജയ്‌പൂർ:ഇൻഡിഗോ വിമാനത്തിന് ബോംബ് ഭീഷണിയെന്ന് വ്യാജസന്ദേശം നൽകിയ യാത്രക്കാരൻ പിടിയിൽ.സമയത്ത് എത്തിച്ചേരാന്‍ കഴിയില്ലെന്ന് കരുതിയാണ് ഇയാൾ വ്യാജസന്ദേശം നൽകിയത്.സംഭവവുമായി ബന്ധപ്പെട്ട് ജയ്പുരില്‍ നിന്നും മുംബൈയിലേക്ക് യാത്ര ചെയ്യേണ്ടിയിരുന്ന നൃത്തസംവിധായകനാണ് പോലീസ് പിടിയിലായത്.പുലർച്ചെ അഞ്ചരമണിയോടെ ഇന്‍ഡിഗോ എയര്‍ലൈന്‍സിന്റെ കോൾസെന്ററിൽ വിളിച്ചാണ് ഇയാള്‍ ബോംബ് ഭീഷണി മുഴക്കിയത്.തുടര്‍ന്ന് വിമാനത്താവളത്തില്‍ സുരക്ഷ ശക്തമാക്കി.ബോംബ് ഭീഷണി വിശകലന സമിതി സന്ദേശം വ്യാജമാണെന്ന് കണ്ടെത്തിയതോടെ വിമാന സര്‍വീസ് ഉടന്‍ തന്നെ സാധാരണ നിലയിലായി.വിമാനം പുറപ്പെടുന്നതിന് മുൻപ് എത്താന്‍ കഴിയാതിരുന്ന മോഹിത് കുമാര്‍ തങ്ക് എന്ന യാത്രക്കാരനെ കമ്പനി നേരിട്ട് വിളിച്ച്‌ തൊട്ടടുത്ത വിമാനത്തില്‍ യാത്ര ഉറപ്പു നല്‍കി. ഇയാള്‍ വിമാനത്താവളത്തില്‍ എത്തിയപ്പോള്‍ സി.ഐ.എസ്.എഫ് ഉദ്യോഗസ്ഥര്‍ ഇയാളെ ചോദ്യം ചെയ്തു. ഇതോടെ താനാണ് ബോംബ് ഭീഷണിക്ക് പിന്നില്‍ എന്ന് തുറന്നു പറയുകയായിരുന്നു. റിയാലിറ്റി ഷോകള്‍ക്കും മറ്റും നൃത്തസംവിധാനം ചെയ്യുന്നയാളാണ് താനെന്ന് തങ്ക് പോലീസിനോട് പറഞ്ഞു. ഇയാളെ ചോദ്യം ചെയ്തു വരുന്നു.