കണ്ണൂര്‍: കണ്ണൂരില്‍ വാക്‌സിന്‍ കുത്തിവയ്‌പ്പില്‍ ഗുരുതര പിഴവ്. ഒന്നാം ഡോസ് കോവാക്‌സിന്‍ എടുത്ത വ്യക്തിക്ക് രണ്ടാം ഡോസായി നല്‍കിയത് കോവിഷീല്‍ഡ് വാക്‌സിന്‍. മലബാര്‍ പഞ്ചായത്തിലെ കുടുംബാരോഗ്യ കേന്ദ്രത്തിലാണ് വാക്‌സിന്‍ മാറി നല്‍കിയത്. വാക്‌സിൻ സ്വീകരിച്ച 50 വയസുകാരന്‍ ജില്ലാ മെഡിക്കല്‍ ഓഫീസര്‍ക്ക് പരാതി നല്‍കി.സംഭവം മൂന്നംഗ മെഡിക്കല്‍ സംഘം അന്വേഷിക്കുമെന്ന് ജില്ലാ മെഡിക്കല്‍ ഓഫീസര്‍ മാദ്ധ്യമങ്ങളെ അറിയിച്ചു. ജൂലായ് മൂന്നിനാണ് സംഭവം നടക്കുന്നത്. എന്നാല്‍ പരാതിക്കാരന് ഇതേവരെ ആരോഗ്യ പ്രശ്‌നങ്ങള്‍ ഒന്നും റിപ്പോര്‍ട്ട് ചെയ്തിട്ടില്ലെന്നും ആരോഗ്യ വിഭാഗം വ്യക്തമാക്കി. അതേസമയം മൂന്നാം ഡോസ് നല്‍കണമോ എന്ന കാര്യത്തി ല്‍ തീരുമാനമായിട്ടില്ല. ഇയാളുടെ ആന്റിബോഡി പരിശോധന നടത്തിയതിന് ശേഷമേ മൂന്നാം ഡോസ് നല്‍കണമോ വേണ്ടയോ എന്ന കാര്യത്തില്‍ തീരുമാനമെടുക്കുമെന്നും അധികൃതര്‍ അറിയിച്ചു.