തിരുവനന്തപുരം: കെഎസ്‌ആര്‍ടിസി സ്റ്റാന്‍ഡുകളില്‍ ബെവ്‌കോ ഔട്ട്‌ലറ്റുകള്‍ സ്ഥാപിക്കുന്നത് സംബന്ധിച്ച്‌ ചര്‍ച്ച തുടരുകയാണെന്ന് ഗതാഗതമന്ത്രി ആന്റണി രാജു നിയമസഭയിൽ അറിയിച്ചു.കെഎസ്‌ആര്‍ടിസി ഡിപ്പോകളും സ്റ്റാന്‍ഡുകളും ഇല്ലാതെ ഒഴിഞ്ഞു കിടക്കുന്ന സ്ഥലങ്ങളില്‍ ഔട്ട്‌ലറ്റിനുള്ള സാധ്യത പരിശോധിക്കുകയാണെന്നും മന്ത്രി അറിയിച്ചു. ഡിപ്പോകളിൽ ബെവ്‌കോ ഔട്ട്‌ലെറ്റുകൾ സ്ഥാപിക്കാനുള്ള തീരുമാനത്തിനെതിരെ വ്യാപക പ്രതിഷേധമാണ് ഉയർന്നിരുന്നത്. ഇതിന് ശേഷം ഇതുമായി ബന്ധപ്പെട്ട വിവരങ്ങൾ ഒന്നും തന്നെ പുറത്തുവന്നിരുന്നില്ല. ഈ സാഹചര്യത്തിൽ തീരുമാനത്തിൽ നിന്നും സർക്കാർ പിന്തിരിഞ്ഞുവെന്നായിരുന്നു കണക്കാക്കിയിരുന്നത്.അതേസമയം കെഎസ്‌ആര്‍ടിസി ഗ്രാമവണ്ടികള്‍ ആരംഭിക്കുമെന്നും മന്ത്രി പ്രഖ്യാപനം നടത്തി. 150 കിലോമീറ്ററാണ് ഗ്രാമവണ്ടി സര്‍വീസ് നടത്തുക. ഒരു പഞ്ചായത്തില്‍ ഇത്രയും ദൂരപരിധി ഇല്ലെങ്കില്‍ സമീപ പഞ്ചായത്തുകളുമായി ചേര്‍ന്ന് സര്‍വീസ് നടത്താം. സ്വകാര്യ വ്യക്തിക്കും സ്ഥാപനങ്ങള്‍ക്കും ഗ്രാമവണ്ടിയുടെ സ്‌പോണ്‍സര്‍ഷിപ്പ് ഏറ്റെടുക്കാം.കെഎസ്‌ആര്‍ടിസി നിലവില്‍ നല്‍കുന്ന എല്ലാ ഇളവുകളും ഗ്രാമവണ്ടികളിലും ഉണ്ടാകുമെന്ന് മന്ത്രി പറഞ്ഞു. കെഎസ്‌ആര്‍ടിസിയിലെ ഇപ്പോഴത്തെ ടിക്കററ് നിരക്ക് തന്നെയായിരിക്കും ഗ്രാമവണ്ടികളിലെന്നുമെന്നും മന്ത്രി വ്യക്തമാക്കി.