കൊച്ചി:കൊച്ചിയിൽ ബ്യൂട്ടി പാർലറിന് നേരെ നടന്ന വെടിവെയ്പ്പ് കേസുമായി ബന്ധപ്പെട്ട് പാർലർ ഉടമയും നടിയുമായ ലീന മരിയ പോളിന് വന്ന ഫോൺ കോളിന്റെ ശബ്ദരേഖ പൊലീസിന് ലഭിച്ചു.തിങ്കളാഴ്ച നടിയുടെ മൊഴി രേഖപ്പെടുത്തിയതിനു പിന്നാലെയാണു ശബ്ദരേഖ പൊലീസ് ശേഖരിച്ചത്. മുബൈയിലെ കുപ്രസിദ്ധ കുറ്റവാളി രവി പൂജാരിയുടെ ശബ്ദവുമായി ഇത് ഒത്തുനോക്കാന്‍ ശ്രമം തുടങ്ങി.അന്വേഷണം മുംബൈയിലേക്കു വ്യാപിപ്പിക്കാന്‍ തീരുമാനിച്ചതായി ഉന്നത പൊലീസ് കേന്ദ്രങ്ങള്‍ വ്യക്തമാക്കി.കഴിഞ്ഞ രണ്ടുവര്‍ഷത്തിനിടെ പലവട്ടം രവി പൂജാരിയുടെ പേരില്‍ ഫോണ്‍ വിളികള്‍ വന്നിരുന്നു. കാര്യമായ ഭീഷണിയല്ല, സൗഹൃദരൂപത്തില്‍ ആയിരുന്നു സംസാരം. എന്നാല്‍ ആവശ്യപ്പെട്ടത് 25 കോടിയാണെന്നാണു ലീന അന്വേഷണ സംഘത്തിനു നല്‍കിയ മൊഴി. നിരന്തരം വിളികള്‍ വന്നപ്പോള്‍ താന്‍ ഫോണ്‍ നമ്ബർ മാറ്റി.പിന്നീട് സ്ഥാപനത്തിലെ നമ്പറിലേക്ക് വിളിക്കാൻ തുടങ്ങി.തന്റെ മാനേജര്‍ ആണ് പിന്നീട് സംസാരിച്ചത്.പണം ആരു വഴി, എങ്ങനെ എവിടെ നല്‍കണം എന്ന വിവരങ്ങളൊന്നും പറഞ്ഞിട്ടില്ല, ആ ഘട്ടത്തിലേക്ക് സംസാരം താന്‍ കൊണ്ടുപോയില്ല എന്നാണ് നടി പറയുന്നത്. ഇതിനിടെയാണ് ഇരുവരും തമ്മിലുള്ള ഫോണ്‍ സംഭാഷണത്തിന്റെ ശബ്ദരേഖ അന്വേഷണസംഘം ശേഖരിച്ചത്. ഇംഗ്ലീഷിലാണ് സംസാരം. എന്നാല്‍ ശബ്ദം രവി പൂജാരിയുടേത് ആണോയെന്ന് ഉറപ്പിക്കാന്‍ തല്‍കാലം വഴിയില്ല.രവി പൂജാരിയുടെ വിവരങ്ങള്‍ ശേഖരിക്കാന്‍ മുംബൈ പൊലീസിന്റെ സഹായം തേടും.