മുംബൈ : മലയാളി യുവതിക്ക് വിമാനത്തിനുള്ളില്‍ സുഖ പ്രസവം. ദമാമില്‍ നിന്ന് കൊച്ചിയിലേക്ക് വന്ന ജെറ്റ് എയര്‍വെയ്‌സ് വിമാനത്തിനുള്ളിലാണ് യുവതി പ്രസവിച്ചത്. ഇതിനെ തുടര്‍ന്ന് വിമാനം അടിയന്തിരമായി മുംബൈ വിമാനത്താവളത്തില്‍ ഇറക്കി.വിമാനത്തില്‍ സഞ്ചരിക്കുന്നതിനിടയില്‍ പ്രസവ വേദന അനുഭവപ്പെട്ട യുവതിക്ക് വിമാനക്കമ്പനി ജീവനക്കാരും, യാത്രക്കാരിയായ നഴ്‌സും ചേര്‍ന്നാണ് പരിചരണം നല്‍കിയത്.വിമാനം പാകിസ്താന് മുകളിലൂടെ പറക്കുമ്പോഴാണ് യുവതി കുഞ്ഞിന് ജന്മം നല്‍കിയതെന്ന് ജീവനക്കാര്‍ അറിയിച്ചു.വിമാനത്താവളത്തിലെ ആംബുലന്‍സിൽ യുവതിയെയും കുഞ്ഞിനെയും മുംബൈയിലെ ആശുപത്രിയിലേക്കു മാറ്റി.യുവതിക്കും കുഞ്ഞിനും ആരോഗ്യപരമായ ബുദ്ധിമുട്ടുകളില്ലെങ്കിലും യാത്രതുടരുന്നത് സുരക്ഷിതല്ലാത്തതിനാല്‍ അത് ഒഴിവാക്കുകയായിരുന്നു.വിമാനത്തിൽ ജനിക്കുന്ന ഇത്തരം കുട്ടികള്‍ക്ക് വലിയ വിമാനക്കമ്പനികള്‍ ആജീവനാന്ത സൗജന്യ യാത്ര അനുവദിക്കാറുണ്ട്.