News Desk

കോഴിക്കോട്:കോഴിക്കോട് റാം മനോഹർ റോഡിൽ മണ്ണിടിഞ്ഞ് വീണുണ്ടായ അപകടത്തിൽ രണ്ടുപേർ മരിച്ചു.ബീഹാർ സ്വദേശി കിസ്മത്ത്,ഹരിയാന സ്വദേശി ജബ്ബാർ എന്നിവരാണ് മരിച്ചത്.ഏഴുപേരാണ് അപകടത്തിൽപ്പെട്ടത്.ഇന്ന് വൈകുന്നേരം നാലുമണിയോടുകൂടിയാണ് അപകടം നടന്നത്.എതിർപ്പ് അവഗണിച്ച് മണ്ണെടുത്തതാണ് അപകടത്തിന് കാരണമായതെന്ന് തൊഴിലാളികൾ പറഞ്ഞു.മഴയത്ത് നനഞ്ഞ മണ്ണ് ജെസിബി ഉപയോഗിച്ച് മാറ്റരുതെന്ന് തൊഴിലാളികൾ അറിയിച്ചിരുന്നു.

കാസർകോഡ്:ചരിത്ര സ്മാരകവും ഇന്ത്യയിലെ പ്രശസ്തമായ വിനോദസഞ്ചാര കേന്ദ്രങ്ങളിലൊന്നുമായ ബേക്കൽ കോട്ട കോർപറേറ്റുകൾക്ക് വിൽക്കുന്നതിനെതിരെ പ്രതിഷേധം ശക്തമാകുന്നു.’സേവ് ബേക്കൽ ഫോർട്ട്,സേവ് ഹെറിറ്റേജ്’ എന്ന മുദ്രാവാക്യമുയർത്തി ഡിവൈഎഫ്ഐ കാസർകോഡ് ജില്ലാ കമ്മിറ്റിയുടെ നേതൃത്വത്തിൽ മെയ് അഞ്ചിന് വൈകുന്നേരം നാലുമണിക്ക് ബേക്കൽ കോട്ടയ്ക്ക് മുൻപിൽ പ്രതിഷേധക്കോട്ട തീർക്കും.പ്രശസ്ത ചരിത്രകാരനും കോഴിക്കോട് സർവകലാശാല മുൻ വൈസ് ചാന്സിലറുമായ ഡോ.കെ.കെ.എൻ കുറുപ്പ് പ്രതിഷേധസംഗമം ഉൽഘാടനം ചെയ്യും.ചടങ്ങിൽ പ്രമുഖ ചരിത്രകാരന്മാരും സാംസ്ക്കാരിക നായകരും പങ്കെടുക്കും.ബേക്കൽ കോട്ടയടക്കം പുരാവസ്തു വകുപ്പിന്റെ കീഴിലുള്ള 95 ചരിത്ര സ്മാരകങ്ങൾ വിൽപ്പനയ്ക്ക് വയ്ക്കാനാണ് കേന്ദ്രസർക്കാരിന്റെ നീക്കം.കേരളത്തിന്റെ ടൂറിസം പെരുമയുടെ മുഖമുദ്രയായ ബേക്കൽ കോട്ട ഏറ്റവും നന്നായി സംരക്ഷിക്കപ്പെടുന്ന ചരിത്ര സ്മാരകവുമാണ്.ഈ ബേക്കൽ കോട്ടയെ വാണിജ്യ താല്പര്യത്തിനായി കൈമാറുന്ന നടപടി അത്യന്തം പ്രതിഷേധാർഹമാണെന്ന് ഡിവൈഎഫ്ഐ കുറ്റപ്പെടുത്തി.

മൈസൂരു:മൈസൂരു വൃന്ദാവൻ ഗാർഡൻസിൽ കനത്ത മഴയിലും കാറ്റിലും  മരംപൊട്ടിവീണ്‌ പട്ടുവം സ്വദേശി ഉൾപ്പെടെ മൂന്നുപേർ മരിച്ചു.തളിപ്പറമ്പ് പട്ടുവം കാവുങ്കാലിലെ പരേതനായ നീലാങ്കോൽ കുഞ്ഞമ്പുവിന്റെ മകൻ കെ.വി വിനോദ്(43),പട്ടാമ്പി സ്വദേശി ഹിലർ(35), തമിഴ്‌നാട് സ്വദേശി രാജശേഖരൻ(35) എന്നിവരാണ് മരിച്ചത്.ചൊവ്വാഴ്ച രാത്രി ഏഴുമണിക്കുള്ള ലേസർ ഷോ കാണാനെത്തിയതായിരുന്നു ഇവർ.പെട്ടെന്ന് കാറ്റും മഴയും വന്നതോടെ മരങ്ങൾക്ക് കീഴിലേക്ക് മാറിനിന്നു.പെട്ടെന്ന് മരക്കൊമ്പ് ഇവരുടെ ദേഹത്തേക്ക് പൊട്ടിവീഴുകയായിരുന്നു. പട്ടുവം ഗവണ്മെന്റ് ഹൈസ്കൂളിലെ പൂർവ്വ വിദ്യാർത്ഥികളുടെ സംഘടനയായ ‘കാറ്റാടിത്തണലിലെ’അംഗമായ വിനോദ് മറ്റ് അംഗങ്ങൾക്കൊപ്പം മൈസൂരുവിലേക്ക് വിനോദയാത്ര പോയതായിരുന്നു.മറ്റു സ്ഥലങ്ങൾ സന്ദർശിച്ച ശേഷം അവസാനത്തെയിടമായിരുന്നു വൃന്ദാവൻ ഗാർഡൻ.വൈകുന്നേരം നടന്ന ലൈറ്റ് ആൻഡ് സൗണ്ട് ഷോ കാണാനായി എല്ലാവരും കൂടി ആ ഭാഗത്തേക്ക് നീങ്ങിയതായിരുന്നു.ശക്തമായ കാറ്റും മഴയും വന്നതോടെ സ്ത്രീകളും കുട്ടികളും പരസ്പ്പരം കെട്ടിപ്പിടിച്ചു നിന്നു.ഇതിനിടെ ഐസ് കട്ടകൾ ദേഹത്തുവീണ് പലർക്കും  വേദനിച്ചു.ഇതോടെ എല്ലാവരും രക്ഷാസ്ഥാനം നോക്കി മാറി നിന്നു.ഇതിനിടെ വൈദ്യുതി ബന്ധവും താറുമാറായി.ഇതോടെ യാത്രാംഗങ്ങളെല്ലാം തങ്ങളുടെ വാഹനത്തിനു സമീപം എത്തിയിരുന്നു.എന്നാൽ  ഏറെ കാത്തിരുന്നിട്ടും വിനോദ് മാത്രം എത്തിയില്ല.തുടർന്ന് ഇവർ പോലീസുമായി ബന്ധപ്പെട്ടു. പൊലീസാണ് മരം വീണ് ആളുകൾ അപകടത്തിൽപ്പെട്ട വിവരം ഇവരെ അറിയിച്ചത്.പിന്നീട് പോലീസിന്റെ സഹായത്തോടെ നടത്തിയ തിരച്ചിലിലാണ് ആശുപത്രിയിൽ ഉള്ളവരുടെ വിവരങ്ങൾ ശേഖരിച്ചതും വിനോദിന്റെ മരണം സ്ഥിതീകരിച്ചതും.ബുധനാഴ്ച വൈകുന്നേരത്തോടെ മൃതദേഹം പട്ടുവത്തെ വീട്ടിലെത്തിച്ചു.സ്വകാര്യ സ്ഥാപനത്തിൽ ഡ്രൈവറായി ജോലിചെയ്യുന്ന വിനോദ് അവിവാഹിതനാണ്.