ചെന്നൈ: തഞ്ചാവൂരില്‍ നവജാത ശിശുവിനെ കൊന്ന് ടോയ്ലറ്റ് ഫ്ലഷ് ടാങ്കില്‍ തള്ളിയ സംഭവത്തിൽ അമ്മ അറസ്റ്റിൽ.തഞ്ചാവൂര്‍ അളകുടി സ്വദേശിയായ 23 കാരി പ്രിയദര്‍ശിനി ആണ് അറസ്റ്റിലായത്.തഞ്ചാവൂര്‍ മെഡിക്കല്‍ കോളേജിലെ ടോയ്‌ലറ്റിലെ ഫ്ലഷ് ടാങ്കിലാണ് കുഞ്ഞിനെ കൊലപ്പെടുത്തിയ ശേഷം യുവതി ഉപേക്ഷിച്ചത്.ഡിസംബര്‍ നാലിനാണ് സംഭവം.ശുചിമുറി വൃത്തിയാക്കുന്നതിനിടെ തൊഴിലാളികള്‍ ടോയ്‌ലറ്റുകള്‍ ഫ്ലഷ് ചെയ്യാന്‍ ശ്രമിച്ചെങ്കിലും ഫ്ലഷ് ശരിയായി പ്രവര്‍ത്തിച്ചില്ല. തുടര്‍ന്ന് ടാങ്ക് തുറന്ന് നടത്തിയ പരിശോധനയിലാണ് കുഞ്ഞിന്റെ മൃതദേഹം കണ്ടെത്തിയത്.ആശുപത്രി അധികൃതര്‍ പോലീസില്‍ വിവരമറിയിച്ചു. പോലീസ് സ്ഥലത്തെത്തുകയും കേസെടുത്ത് അന്വേഷണം ആരംഭിച്ചു. ആശുപത്രിയിലെ സിസിടിവി ദൃശ്യങ്ങള്‍ പോലീസ് പരിശോധിക്കുകയും ഡിസംബര്‍ 3 ന് തമിഴ്നാട് ആക്‌സിഡന്റ് ആന്റ് എമര്‍ജന്‍സി കെയര്‍ ഇനീഷ്യേറ്റീവ് വാര്‍ഡിന്റെ ടോയ്‌ലറ്റിന് സമീപം ഒരു സ്ത്രീ നടക്കുന്നത് ശ്രദ്ധയില്‍പ്പെടുകയും ചെയ്തു. സിസിടിവി ദൃശ്യങ്ങളുടെ അടിസ്ഥാനത്തില്‍ യുവതിക്കായി അന്വേഷണം ആരംഭിക്കുകയും പിന്നീട് അറസ്റ്റ് ചെയ്യുകയുമായിരുന്നു.വിവാഹേതര ബന്ധത്തെത്തുടര്‍ന്നാണ് യുവതി ഗര്‍ഭിണിയായതെന്ന് ചോദ്യം ചെയ്യലില്‍ വ്യക്തമായി. ഗര്‍ഭം വീട്ടുകാരെ അറിയിക്കാതെ കുഞ്ഞിന് ജന്മം നല്‍കാന്‍ ശ്രമിച്ച യുവതി ചെറിയ വയറുവേദനയെ തുടര്‍ന്ന് ഒറ്റയ്ക്ക് ആശുപത്രിയില്‍ എത്തുകയായിരുന്നു.
