News Desk

കൊച്ചി: സംസ്ഥാനത്ത് വരുംദിവസങ്ങളിൽ അതിശക്തമായ മഴ പെയ്യുമെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നൽകി.ജൂണ്‍ 10 വരെ ശക്തമായ മഴയും ജൂണ്‍ 11ന് അതിശക്തമായ മഴയും ലഭിക്കുമെന്നാണ് മുന്നറിയിപ്പ്. തുടർച്ചയായി മഴ ലഭിച്ചാൽ പെട്ടെന്നുള്ള വെള്ളപ്പൊക്കം, ഉരുൾപൊട്ടൽ, മണ്ണിടിച്ചിൽ എന്നിവയ്ക്ക് കാരണമാകാമെന്ന് സംസ്ഥാന അടിയന്തിരഘട്ട കാര്യനിർവഹണ കേന്ദ്രം അറിയിച്ചു.ജലനിരപ്പ് ഉയരുവാൻ സാധ്യതയുള്ളതിനാൽ പുഴകളിലും, ചാലുകളിലും,വെള്ളകെട്ടിലും മഴയത്ത് ഇറങ്ങരുതെന്ന ജാഗ്രതാ നിർദേശം നല്കി. മരങ്ങൾക്ക് താഴെ വാഹനം പാർക്ക് ചെയ്യാതിരിക്കുവാൻ ശ്രദ്ധിക്കണം. ഉരുൾപൊട്ടൽ സാധ്യത ഉള്ളതിനാൽ രാത്രി ഏഴു മുതൽ രാവിലെ ഏഴു വരെ മലയോരമേഖലയിലേക്കുള്ള യാത്ര പരിമിതപ്പെടുത്തണമെന്ന് നിർദേശിച്ചിട്ടുണ്ട്. ഇതു സംബന്ധിച്ച് പോലീസിനു നിർദേശം നല്കി. ബീച്ചുകളിൽ വിനോദ സഞ്ചാരികൾ കടലിൽ ഇറങ്ങാതിരിക്കുവാൻ നടപടിയെടുക്കാൻ ഡിടിപിസിക്കു നിർദേശം നല്കി.

തിരുവനന്തപുരം:ജൂൺ 18 മുതൽ കെഎസ്ആർടിസി ഇലക്ട്രിക്ക് ബസ് സർവീസ് ആരംഭിക്കും. പരീക്ഷണാടിസ്ഥാനത്തില്‍ തിരുവനന്തപുരം നഗരത്തില്‍ 15 ദിവസം ബസോടിക്കും.ഇതു വിജയിക്കുകയാണെങ്കില്‍ സംസ്ഥാനത്ത് മുന്നൂറോളം വൈദ്യുത ബസുകള്‍ സര്‍വീസിനിറക്കാനാണ് കെ.എസ്.ആര്‍.ടി.സിയുടെ തീരുമാനം.40 പുഷ് ബാക്ക് സീറ്റുകളോടു കൂടിയ ബസില്‍ സിസിടിവി ക്യാമറ, ജിപിഎസ്, വിനോദ സംവിധാനങ്ങള്‍ തുടങ്ങിയ സൗകര്യങ്ങളും ഉണ്ടാകും. കര്‍ണാടക,ആന്ധ്ര,ഹിമാചല്‍പ്രദേശ്, മഹാരാഷ്ട്ര,തെലുങ്കാന എന്നിവിടങ്ങളില്‍ സര്‍വീസ് നടത്തുന്ന ഗോള്‍ഡ് സ്റ്റോണ്‍ ഇന്‍ഫ്രാടെക് ലിമിറ്റഡ് എന്ന കമ്പനിയാണ് തലസ്ഥാനത്തും പരീക്ഷണ സര്‍വീസ് നടത്തുക. ഒരു ചാര്‍ജിങ്ങില്‍ 250 കിലോമീറ്റര്‍ വരെ ഓടാവുന്ന ബസുകളാണു നിലവില്‍ സര്‍വീസ് നടത്തുക.ഇലക്‌ട്രിക് ബസുകളുടെ വില വരുന്നത് 1.5 കോടി മുതലാണ്.വില കൂടുതലായതിനാല്‍ നേരിട്ടു ബസ് വാങ്ങുന്നതിനു പകരം ഇലക്‌ട്രിക് ബസുകള്‍ വാടകയ്‌ക്കെടുത്ത് ഓടിക്കാന്‍ കെ.എസ്.ആര്‍.ടി.സി നേരത്തേ തീരുമാനിച്ചിരുന്നതാണ്.കിലോമീറ്റര്‍ നിരക്കില്‍ വാടകയും വൈദ്യുതിയും കണ്ടക്ടറെയും കെ.എസ്.ആര്‍.ടി.സി നൽകും.ബസിന്റെ മുതല്‍മുടക്കും അറ്റകുറ്റപ്പണിയും ഡ്രൈവറും ഉള്‍പ്പെടെയുള്ളവ കരാര്‍ ഏറ്റെടുക്കുന്ന കമ്പനിയാണ് വഹിക്കേണ്ടത്.നേരത്തെ ഇലക്‌ട്രിക് ബസുകള്‍ വാങ്ങി സര്‍വീസ് നടത്താനാണ് കെ.എസ്.ആര്‍.ടി.സി ആലോചിച്ചിരുന്നത്. എന്നാല്‍ കേന്ദ്രസര്‍ക്കാരിന്റെ സബ്‌സിഡി കൂടി പ്രയോജനപ്പെടുത്തിയാലും വന്‍ സാമ്പത്തിക ബാധ്യത വരുമെന്നതിനാല്‍ ഈ ശ്രമം മുന്നോട്ടുപോയില്ല.

കോട്ടയം: തനിക്ക് മാനസിക രോഗമുണ്ടെന്ന് വരുത്തി തീര്‍ക്കാന്‍ ശ്രമിക്കുന്ന പിതാവ് ചാക്കോക്കെതിരെ നീനു. തനിക്ക് മാനസിക പ്രശ്നമുണ്ടെന്ന് വരുത്തി തന്നെ കെവിന്റെ വീട്ടില്‍ നിന്നും പുറത്താക്കാന്‍ ശ്രമിക്കുകയാണ് മാതാപിതാക്കളെന്ന് നീനു ആരോപിച്ചു.കുറച്ചുനാളു മുൻപ് മാതാപിതാക്കള്‍ തന്നെ കൗണ്‍സിലിംഗിന് കൊണ്ടുപോയിരുന്നു. അപ്പോള്‍ തനിക്ക് കൗണ്‍സിലിങ് തന്ന ഡോക്ടര്‍ പറഞ്ഞത് ചികിത്സ വേണ്ടത് തന്റെ മാതാപിതാക്കള്‍ക്കാണെന്നാണ്. എന്നിട്ടു തന്റെ മേല്‍ മാനസിക രോഗം കെട്ടിവെക്കാന്‍ ശ്രമിക്കുകയാണെന്നും നീനു പറഞ്ഞു. കെവിനെ കൊല്ലാന്‍ നടത്തിയ ഗൂഢാലോചനയില്‍ തന്റെ അമ്മയ്ക്കും പങ്കുണ്ട്. കെവിനെ കൊന്ന ആള്‍ക്കാരുടെ ഇനി പോകില്ലെന്നും കെവിന്റെ വീട്ടുകാർ സമ്മതിക്കുന്നതുവരെ കെവിന്റെ വീട്ടിൽ തുടരുമെന്നും നീനു പറഞ്ഞു.നീനു മാനസികാസ്വാസ്ഥ്യത്തിന് ചികിത്സയിലായിരുന്നെന്നും അതിനാല്‍ കെവിന്റെ വീട്ടില്‍ നിന്ന് മാറ്റിപ്പാര്‍പ്പിക്കണമെന്ന് കാട്ടി കഴിഞ്ഞ ദിവസം നീനുവിന്റെ അച്ഛന്‍ ഹരജി നല്‍കിയിരുന്നു. തിരുവനന്തപുരം അനന്തപുരി ആശുപത്രിയിലാണ് ചികിത്സ നടത്തിയിരുന്നതെന്നും പിതാവ് ഹര്‍ജിയില്‍ ചൂണ്ടിക്കാട്ടിയത്. ഇപ്പോള്‍ വീട് മാറി നില്‍ക്കുന്നതിനാല്‍ ചികിത്സ മുടങ്ങിയിരിക്കുകയാണ്. തുടര്‍ ചികിത്സ നടത്താന്‍ കോടതി ഇടപെടണമെന്നും അദ്ദേഹം കോടതിയില്‍ നല്‍കിയ ഹര്‍ജിയില്‍ ആവശ്യപ്പെടുന്നു. അനന്തപുരി ആശുപത്രിയിലെ ഡോ. വൃന്ദയുടെ ചികിത്സയിലായിരുന്നു നീനു എന്നാണ് ഹര്‍ജിയില്‍ ചാക്കോ പ്രധാനമായും ചൂണ്ടിക്കാട്ടിയത്.എന്നാല്‍ ഇത് കെട്ടിച്ചമച്ചതാണെന്നും കെവിന്റെ ജീവനെടുത്തവരുടെ സംരക്ഷണം തനിക്ക് വേണ്ടെന്നും നീനു പറഞ്ഞു.കെവിന്‍ വധക്കേസിലെ അഞ്ചാം പ്രതിയാണ് പിതാവ് ചാക്കോ ജോണ്‍.

പാപ്പിനിശ്ശേരി:ദേശീയപാത വികസനത്തിന്റെ ഭാഗമായി കുടിയൊഴിപ്പിക്കൽ ഭീഷണി നേരിടുന്ന തുരുത്തി കോളനിയിലെ വിദ്യാർഥികൾ ഇന്നലെ പഠനം മുടക്കി പട്ടിണി സമരം  നടത്തി.രാവിലെ മുതൽ വൈകുന്നേരം വരെ പത്തു വിദ്യാർത്ഥികളാണ് സമരപന്തലിൽ പട്ടിണി സമരം നടത്തിയത്.അരോളി ഗവ.ഹൈ സ്കൂളിലെ ആറാം ക്ലാസ് വിദ്യാർത്ഥിനി പൂജ, കെ.അനുച്ചന്ദ്‌,ഏഴാം ക്ലാസ് വിദ്യാർത്ഥിനി മരിയ മാത്യൂസ്,ശോണിമ,പത്താം ക്ലാസ് വിദ്യാർഥിനികളായ പി.അഭിരാം, കെ.അശ്വതി,അനശ്വര,അമൽ,സ്നോവ്യ,പ്ലസ് ടു വിദ്യാർത്ഥിനി കെ.നിമ,കെ.എം.സി.ടി മെഡിക്കൽ കോളേജ് വിദ്യാർത്ഥിനി അനുപമ അനിൽ കുമാർ എന്നിവരാണ് സമരത്തിൽ പങ്കാളികളായത്.എസ്.ഡി.പി.ഐ സംസ്ഥാന ജനറൽ സെക്രെട്ടറി കെ.കെ ജബ്ബാർ സമരം ഉൽഘാടനം ചെയ്തു.അനുപമ അനിൽകുമാർ അധ്യക്ഷത വഹിച്ചു.പദ്മനാഭൻ മൊറാഴ,പി.എസ് രമേശൻ,പനയൻ കുഞ്ഞിരാമൻ,സതീശൻ പള്ളിപ്രം,സണ്ണി അമ്പാട്ട്,ജെ.ആർ പ്രസീത എന്നിവർ പ്രസംഗിച്ചു.