പാലക്കാട്: കുതിരാൻ തുരങ്കത്തിലെ ലൈറ്റുകൾ തകർത്ത ലോറി കണ്ടെത്തി. ഇരുമ്പുപാലം സ്വദേശിയുടേതാണ് ലോറി. പീച്ചി പോലീസാണ് ലോറി കസ്റ്റഡിയിലെടുത്തത്. ദേശീയ പാത നിർമാണത്തിന് കരാറുള്ള ലോറിയാണിത്.പത്ത് ലക്ഷം രൂപയുടെ നാശനഷ്ടം ഉണ്ടായിരുന്നു. ലോറിയുടെ പിൻഭാഗം ഉയർത്തി ഓടിച്ചതാണ് ലൈറ്റുകൾ തകരാൻ കാരണമായത്. വ്യാഴാഴ്ച രാത്രിയോടെയായിരുന്നു സംഭവം. തുരങ്കത്തിന്റെ ആദ്യ ഭാഗത്തെ ലൈറ്റുകളാണ് തകർത്തത്. തുരങ്കത്തിന്റെ 90 മീറ്ററോളം ദൂരം നാശനഷ്ടങ്ങൾ സംഭവിച്ചിട്ടുണ്ട്. ആകെ 104 ലൈറ്റുകൾ തകർന്നുവെന്നാണ് കണക്ക്. ഇതുകൂടാതെ ക്യാമറകളും സെൻസറുകളും തകർന്നിട്ടുണ്ട്. സംഭവത്തിന് പിന്നാലെ സിസിടിവി ദൃശ്യങ്ങൾ കേന്ദ്രീകരിച്ച് പോലീസ് അന്വേഷണം ആരംഭിച്ചിരുന്നു.
