ന്യൂഡൽഹി:ഡല്‍ഹിയിലെ സർക്കാർ ബസ്സുകളില്‍ ഇന്ന് മുതല്‍ സ്ത്രീകള്‍ക്ക് സൗജന്യയാത്ര. ആം ആദ്മി പാര്‍ട്ടി സര്‍ക്കാരിന്‍റെ സ്ത്രീ സുരക്ഷ മുന്‍കരുതലിന്‍റെ ഭാഗമായാണ് പദ്ധതി. ഇത് പ്രകാരം 10 രൂപയുടെ പിങ്ക് ടിക്കറ്റ് വനിത യാത്രക്കാര്‍ക്ക് കണ്ടക്ടര്‍മാര്‍ നല്‍കും. നല്‍കിയ ടിക്കറ്റുകളുടെ കണക്ക് പരിശോധിച്ച ശേഷം സര്‍ക്കാര്‍ ട്രാന്‍സ്പോര്‍ട്ടേഴ്സിന് പണം നല്‍കും. ഡല്‍ഹി സര്‍ക്കാര്‍ സര്‍വ്വീസിലെയോ ലോക്കല്‍ സര്‍വ്വീസിലെയോ മറ്റ് സര്‍ക്കാര്‍ സ്ഥാപനങ്ങളിലെയോ സ്ത്രീകള്‍ ഫ്രീ സര്‍വീസ് ഉപയോഗിച്ചാല്‍ അവര്‍ക്ക് യാത്രാ അലവന്‍സ് ലഭിക്കില്ല.സ്ത്രീ സുരക്ഷക്കായി 13,000 ഉദ്യോഗസ്ഥരെയും നിയമിച്ചിട്ടുണ്ട്.ഇതില്‍ 6,000 പേര്‍ സിവില്‍ ഡിഫന്‍സ് ഉദ്യോഗസ്ഥര്‍, എക്‌സ് സര്‍വീസ്‌മെന്‍, ഹോംഗാര്‍ഡ് വിഭാഗങ്ങളില്‍നിന്നുള്ളവരാണ്. ത്യാഗ്രാജ് സ്‌റ്റേഡിയത്തില്‍ സംഘടിപ്പിച്ച പരിപാടിയില്‍ രോഗികളെ സഹായിക്കുന്നതിനും യാത്രയ്ക്കിടെ അടിയന്തര സാഹചര്യങ്ങള്‍ എങ്ങനെ നേരിടണമെന്നത് സംബന്ധിച്ചും സുരക്ഷാ ഉദ്യോഗസ്ഥര്‍ക്ക് പരിശീലനം നല്‍കി.വീടുകളില്‍ എങ്ങനെയാണോ അതുപോലെ സര്‍ക്കാര്‍ ബസ്സുകളിലും സ്ത്രീകള്‍ക്ക് സുരക്ഷിതമായി യാത്ര ചെയ്യാനുള്ള സാഹചര്യമൊരുക്കണമെന്ന് മുഖ്യമന്ത്രി അരവിന്ദ് കെജ്‌രിവാള്‍ നിര്‍ദേശിച്ചു. ജൂണിലാണ് ബസ്സുകളിലും ഡല്‍ഹി മെട്രോ ട്രെയിനുകളിലും സ്ത്രീകള്‍ക്ക് സൗജന്യയാത്ര എന്ന പദ്ധതി മുഖ്യമന്ത്രി പ്രഖ്യാപിച്ചത്. സാങ്കേതികപ്രശ്‌നമുള്ളതിനാല്‍ മെട്രോയിലെ സൗജന്യയാത്രാ പദ്ധതി നടപ്പാക്കാന്‍ കൂടുതല്‍ സമയമെടുക്കും.സൗജന്യയാത്രാ പദ്ധതിക്കായി 290 കോടി രൂപയുടെ ബജറ്റാണ് തയ്യാറാക്കിയത്. ഇതില്‍ ഡിടിസി ബസ്സുകള്‍ക്ക് 90 കോടിയും ക്ലസ്റ്റര്‍ ബസ്സുകള്‍ക്ക് 50 കോടിയും മെട്രോ ട്രെയിനുകള്‍ക്ക് 150 കോടിയുമാണ് നീക്കിവച്ചിരുന്നത്.
