കണ്ണൂർ:ചന്ദനക്കാംപാറയിൽ സ്‌കൂള്‍ വിദ്യാര്‍ത്ഥിനികളെ പീഡിപ്പിച്ച കായിക അദ്ധ്യാപകന്‍ അറസ്റ്റില്‍.ചന്ദനക്കംപാറ ചെറുപുഷ്പം ഹൈസ്‌കൂള്‍ കായികാദ്ധ്യാപകന്‍ പാട്ടത്തില്‍ സജിയെ 46 ആണ് ഇന്ന് രാവിലെ എട്ടുമണിയോടുകൂടി പയ്യാവൂര്‍ എസ്‌ഐ രമേശനും സംഘവും ഓടി രക്ഷപെടാനുള്ള ശ്രമത്തിനിടെ വീട്ടിൽ നിന്നും അതിസാഹസികമായി പിടികൂടിയത്. പ്രതി മുന്‍പ് ആര്‍മിയില്‍ സേവനം ചെയ്തിരുന്നതായി പൊലീസ് പറഞ്ഞു.പീഡനവിവരം പുറത്തായതോടെ പൊലീസ് അന്വേഷണം ആരംഭിച്ചു എന്നറിഞ്ഞ പ്രതി നാട്ടില്‍ നിന്നും മുങ്ങിയിരുന്നു. ഇന്ന് പുലർച്ചയോടെ കോട്ടയം ചന്ദനക്കാംപാറ റൂട്ടിലോടുന്ന ബസില്‍ വീട്ടിലെത്തിയതായിരുന്നു പ്രതി. തുടര്‍ന്ന് വീട് വളഞ്ഞ പൊലീസ് പ്രതിയെ പിടികൂടാനുള്ള ശ്രമത്തിനിടയില്‍ പിന്‍വാതില്‍ വഴി കുതറി ഓടി രക്ഷപെടുകയായിരുന്നു. പ്രതിയെ പിന്തുടര്‍ന്ന പൊലീസ് സംഘം സമീപത്തുള്ള പ്രതിയുടെ ബന്ധുവിന്റെ വീട്ടില്‍ നിന്ന് മല്‍പ്പിടുത്തത്തിലൂടെ പിടികൂടുകയായിരുന്നു.എസ്‌ഐ രമേശന്‍, എഎസ്‌ഐമാരായ സുനില്‍, സത്യന്‍ സിവില്‍ പൊലീസ് ഓഫീസര്‍മാരായ രാധാകൃഷ്ണന്‍, സജീഷ് ഡ്രൈവര്‍ രമേശന്‍ തുടങ്ങിയവരടങ്ങുന്ന ടീമാണ് പ്രതിയെ കീഴ്‌പ്പെടുത്തിയത്.
ഈ അടുത്ത ദിവസങ്ങളിലാണ് വിദ്യാര്‍ത്ഥികള്‍ ലൈംഗിക ചൂഷണത്തിന് ഇരയായ വിവരം പുറത്തറിയുന്നത്. തുടര്‍ന്ന് ചെറുപുഷ്പം സ്‌കൂള്‍ മാനേജ് മെന്റിന്റെ നേതൃത്വത്തില്‍ സംഭവം ഒത്ത് തീര്‍പ്പാക്കി ഒതുക്കി തീര്‍ക്കുകയായിരുന്നു. ഇതിന് മുന്‍പും പ്രതി ഇത്തരം കേസുകള്‍ ചെയ്തിട്ടുണ്ടെങ്കിലും എല്ലാം ഒത്തുതീര്‍പ്പാക്കുകയായിരുന്നതിനാല്‍ പ്രതി ഇതുവരെയും പിടിക്കപ്പെട്ടിരുന്നില്ല.നിരവധി കുട്ടികള്‍ പരാതി പറഞ്ഞതിന്റെ അടിസ്ഥാനത്തില്‍ നാട്ടുകാര്‍ ചൈല്‍ഡ് ലൈനില്‍ വിവരമറിയിക്കുകയും തുടര്‍ന്ന് ചൈല്‍ഡ് പ്രൊട്ടക്ഷന്‍ ഫോഴ്‌സിന്റ നേതൃത്വത്തില്‍ സബ് ജഡ്ജി ഉള്‍പ്പെടുന്ന ടീം ചന്ദനക്കാംപാറ ചെറുപുഷ്പം ഹൈസ്‌കൂളില്‍ കുട്ടികള്‍ക്കായി കൗണ്‍സലിങ് നടത്തുകയായിരുന്നു.ഈ കൗണ്‍സലിംഗിലാണ് കുട്ടികള്‍ ഞെട്ടിക്കുന്ന വിവരങ്ങള്‍ ചൈല്‍ഡ് ലൈന്‍ പ്രവര്‍ത്തകരുമായി പങ്കു വച്ചത്.സംഭവത്തിന്റെ ഗൗരവം മനസ്സിലാക്കിയ സബ് ജഡ്ജി പ്രതിയെ പിടികൂടാന്‍ കര്‍ശന നിര്‍ദ്ദേശം നല്‍കുകയായിരുന്നു. കായികാദ്ധ്യാപകനില്‍ നിന്നും നിരന്തരം ശാരീരിക പീഡനം നേരിടുന്നതായി കൗണ്‍സിലിംഗില്‍ എട്ടിലധികം വിദ്യാര്‍ത്ഥികള്‍ പരാതിപ്പെടുകയായിരുന്നു.
