കൊച്ചി:നടിയെ ആക്രമിച്ചകേസില്‍ ദിലീപ് ഉള്‍പ്പടെയുള്ള പത്ത് പ്രതികള്‍ ഇന്ന് വിചാരണ കോടതിയില്‍ ഹാജരാകും.സുപ്രിം കോടതി നിര്‍ദേശപ്രകാരം കേസിലെ നടപടികള്‍ വേഗത്തിലാക്കുന്നതിന്റെ ഭാഗമായാണ് ദിലീപടക്കമുള്ള പ്രതികളോട് ഹാജരാകണമെന്ന് കോടതി കര്‍ശന നിര്‍ദേശം നല്‍കിയത്. പ്രതികളെ കുറ്റപത്രം വായിച്ചുകേള്‍പ്പിക്കുന്ന നടപടിയാണ് ഇന്നുണ്ടാകുക.നടിയെ അക്രമിച്ച കേസിലെ എട്ടാംപ്രതിയാണ് ദിലീപ്. ദിലീപ് ഉള്‍പ്പടെ 10 പ്രതികളാണ് കേസിലുള്‍പ്പെട്ടിട്ടുള്ളത്. ഒന്നാംപ്രതി പള്‍സര്‍ സുനി, രണ്ടാം പ്രതി മാര്‍ട്ടിന്‍ ആന്റണി, മൂന്നാം പ്രതി മണികണ്ഠന്‍ , നാലാം പ്രതി വിജേഷ്, ആറാം പ്രതി പ്രദീപ്, ഒമ്ബതാം പ്രതി സനല്‍കുമാര്‍. എന്നിവരാണ് റിമാന്റിലുള്ളത്. അഞ്ചാം പ്രതി സലിമിനും എട്ടാം പ്രതി ദിലീപിനും ഹൈക്കോടതിയും, ഏഴാം പ്രതി ചാര്‍ളിക്കും പത്താം പ്രതി വിഷ്ണുവിനും കീഴ്‌കോടതിയും ജാമ്യം അനുവദിച്ചിട്ടുണ്ട്. ഇതിനിടെ പ്രതിപ്പട്ടികയില്‍ നിന്നൊഴിവാക്കണമെന്ന ആവശ്യം തള്ളിയതിനെതിരെ ദിലീപ് അടുത്ത ദിവസം തന്നെ ഹൈക്കോടതിയില്‍ അപ്പീല്‍ സമര്‍പ്പിക്കും.
