തിരുവനന്തപുരം:തിരുവനന്തപുരത്ത് ശ്രീചിത്ര ആശുപത്രിയിലെ ഡോക്ടര്‍ക്ക് കൊറോണ സ്ഥിരീകരിച്ചു.പഠനക്യാമ്പിൽ പങ്കെടുക്കാന്‍ സ്‌പെയിനില്‍ പോയി തിരിച്ചെത്തിയ ഡോക്റ്റർക്കാണ് രോഗബാധ സ്ഥിരീകരിച്ചിരിക്കുന്നത്.മാര്‍ച്ച്‌ രണ്ടിന് ഇദ്ദേഹം നാട്ടിലെത്തിയപ്പോള്‍ വിമാനത്താവളത്തില്‍ നടത്തിയ പരിശോധനയില്‍ രോഗലക്ഷണങ്ങള്‍ കണ്ടെത്തുകയും വീട്ടില്‍ തന്നെ കഴിയാന്‍ ഇദ്ദേഹത്തോട് അധികൃതര്‍ നിര്‍ദ്ദേശിക്കുകയും ആയിരുന്നു. എന്നാല്‍ ഏഴാം തീയതി ഇദ്ദേഹം തിരികെ ജോലിയില്‍ പ്രവേശിച്ചു.പതിനൊന്നാം തീയതിയോടെ ഇദ്ദേഹത്തിന്റെ ആരോഗ്യനില വഷളാവുകയായിരുന്നു.ഈ ദിവസങ്ങളില്‍ ഇദ്ദേഹം രോഗികളെ പരിശോധിച്ചു എന്നതാണ് ഇപ്പോള്‍ ആശങ്ക ഉയര്‍ത്തിയിരിക്കുന്നത്. ഈ ആളുകളെ കണ്ടെത്താന്‍ തീവ്രശ്രമം നടക്കുകയാണ് ഇപ്പോള്‍.നിലവിൽ ഇദ്ദേഹത്തെ തിരുവനന്തപുരം മെഡിക്കല് കോളജ് ആശുപത്രിയില്‍ ഐസൊലേഷന്‍ വാര്‍ഡില്‍ പ്രവേശിപ്പിച്ചിരിക്കുകയാണ്.അതേസമയം, രോഗബാധിതനായ ഡോക്ടര്‍ ജോലി ചെയ്തിരുന്ന ആശുപത്രിയിലെ അഞ്ച് വിഭാഗങ്ങളിലെ 25 ഡോക്ടര്‍മാരോട് അവധിയില്‍ പ്രവേശിക്കാന്‍ നിര്‍ദ്ദേശം നല്‍കി. ആശുപത്രി ജീവനക്കാരും നിരീക്ഷണത്തിലാണ്. സംസ്ഥാനത്ത് ആദ്യമായാണ് ഒരു ഡോക്ടറിന് കൊറോണ സ്ഥിരീകരിക്കുന്നത്. ആശുപത്രിയില്‍ അതീവ ജാഗ്രതാ നിര്‍ദ്ദേശമാണ് നല്‍കിയിട്ടുള്ളത്.ഇത്രയും ഡോകട്ര്‍മാരുടെ അവധി ആശുപത്രിയുടെ പ്രവര്‍ത്തനങ്ങളെ ബാധിക്കുന്നതിനെ വിലയിരുത്തുന്നതിനും മറ്റുമുന്‍കരുതലുകള്‍ സ്വീകരിക്കുന്നതിനുമായി ആരോഗ്യവകുപ്പ് അധികൃതര്‍ ആശുപത്രിയില്‍ ആലോചനായോഗം നടത്തുകയാണ്.ഡോക്ടറുമായി ബന്ധപ്പെട്ടവരുടെ റൂട്ട്മാപ്പ് ഇന്ന് തന്നെ തയ്യാറാക്കുമെന്ന് ആരോഗ്യവകുപ്പ് അറിയിച്ചു.
