News Desk

തിരുവനന്തപുരം:കൂടുതൽ കോവിഡ് കേസുകൾ റിപ്പോർട്ട് ചെയ്യപ്പെട്ട സാഹചര്യത്തിൽ കോട്ടയം,ഇടുക്കി ജില്ലകളെ ഗ്രീൻ സോണിൽ നിന്നും റെഡ് സോണിലേക്ക് മാറ്റി.കോട്ടയത്ത് 6 പേർക്കും ഇടുക്കിയിൽ 4 പേർക്കും കഴിഞ്ഞ ദിവസം കോവിഡ് സ്ഥിരീകരിച്ചിരുന്നു.കോട്ടയം ജില്ലയിൽ 3 ദിവസം അവശ്യ സേവനങ്ങൾ മാത്രമേ അനുവദിക്കൂ. ഇടുക്കിയിൽ വാഹനങ്ങൾ, വ്യാപാര സ്ഥാപനങ്ങൾ,യാത്ര തുടങ്ങിയവ പൂർണമായി നിയന്ത്രിക്കും. ഹോട്സ്പോട്ടുകളിൽ ഡബിൾ ലോക്ഡൗൺ ഏർപ്പെടുത്തി.എറണാകുളം– കോട്ടയം ജില്ലാ അതിർത്തി അടയ്ക്കാൻ കലക്ടർ എസ്.സുഹാസ് ഉത്തരവിട്ടു. പ്രത്യേക അനുമതിയില്ലാതെ ആരെയും കോട്ടയത്ത് നിന്നും എറണാകുളം ജില്ലയിലേക്ക് പ്രവേശിപ്പിക്കുകയില്ല.അതിർത്തികളിൽ ശക്തമായ പൊലീസ് പിക്കറ്റ് ഏർപ്പെടുത്തി. വാഹനങ്ങൾ തടയാൻ ബാരിക്കേഡും നിരത്തി.കോട്ടയത്ത് മാർക്കറ്റിലെ ചുമട്ടു തൊഴിലാളിയായ മുട്ടമ്പലം സ്വദേശി, കുഴിമറ്റം സ്വദേശി വീട്ടമ്മ, മണർകാട് സ്വദേശി ലോറി ഡ്രൈവർ, ചങ്ങനാശേരിയിലുള്ള തമിഴ്നാട് സ്വദേശി, മേലുകാവുമറ്റം സ്വദേശി ബാങ്ക് ഉദ്യോഗസ്ഥ,വടവാതൂർ സ്വദേശി ആരോഗ്യ പ്രവർത്തകൻ എന്നിവർക്കാണ് രോഗം.ആരോഗ്യ പ്രവർത്തകനും ചുമട്ടു തൊഴിലാളിക്കും മാർക്കറ്റിൽ നേരത്തേ രോഗം സ്ഥിരീകരിച്ച ചുമട്ടു തൊഴിലാളിയുടെ സമ്പർക്കത്തിലൂടെയാണ് രോഗബാധയുണ്ടായത്.തമിഴ്നാട് സ്വദേശി തൂത്തുക്കുടിയിൽ പോയിരുന്നു.ബാങ്ക് ഉദ്യോഗസ്ഥ സേലത്തു നിന്നു മടങ്ങിയതാണ്. അതേ സമയം നേരത്തെ രോഗം സ്ഥിരീകരിച്ച ചുമട്ടു തൊഴിലാളിയുടെ ഭാര്യ, രണ്ടു മക്കൾ, ഭാര്യാ സഹോദരൻ, 3 ചുമട്ടു തൊഴിലാളികൾ എന്നിവർക്കു രോഗ ബാധയില്ല.മണര്‍കാട് സ്വദേശി കോഴിക്കോട് ജില്ലയില്‍ പോയിരുന്നു.ഇടുക്കിയിൽ തൊടുപുഴ തെക്കുംഭാഗത്ത് യുഎസിൽ നിന്നു മാർച്ച് 22 ന് വന്ന 17 വയസ്സുകാരി, തിരുപ്പൂരിൽ നിന്ന് ഏപ്രിൽ 11 ന് വന്ന ദേവികുളം സ്വദേശി(38),ചെന്നൈയിൽ നിന്ന് ഏപ്രിൽ 14 ന് മാതാപിതാക്കളോടൊപ്പം കരുണാപുരം പോത്തുകണ്ടത്ത് എത്തിയ പെൺകുട്ടി (14),മൂന്നാർ പൊലീസ് സ്റ്റേഷനു സമീപം താമസിക്കുന്ന 60 വയസ്സുകാരൻ എന്നിവർക്കാണ് കോവിഡ് സ്ഥിരീകരിച്ചത്.

കണ്ണൂർ:ജില്ലയ്ക്ക് ആശ്വാസമായി ഇന്നലെ കോവിഡ് പോസിറ്റീവ് കേസുകൾ ഒന്നും റിപ്പോർട്ട് ചെയ്തില്ല.ആകെയുള്ള 112 കൊറോണ ബാധിതരിൽ ഒരാൾകൂടി രോഗം ഭേദമായി ആശുപത്രി വിട്ടു.അഞ്ചരക്കണ്ടി കോവിഡ് ആശുപത്രിയിൽ ചികിത്സയിലായിരുന്ന ചെറുവാഞ്ചേരി സ്വദേശിയായ 24 കാരനാണ് ആശുപത്രി വിട്ടത്.ഇതോടെ ജില്ലയിൽ രോഗമുക്തി നേടിയവരുടെ എണ്ണം 58 ആയി.54 പേരാണ് നിലവിൽ ചികിത്സയിലുള്ളത്.നിലവിൽ 55 പേർ കണ്ണൂർ ഗവ. മെഡിക്കൽ കോളേജിലും 21 പേർ കണ്ണൂർ ജില്ലാ ആശുപത്രിയിലും 6 പേർ തലശ്ശേരി ജനറൽ ആശുപത്രിയിലും 32 പേർ അഞ്ചരക്കണ്ടി കോവിഡ് ആശുപത്രിയിലും 2606 പേർ വീടുകളിലുമായി മൊത്തം 2720 പേരാണ് ജില്ലയിൽ നിരീക്ഷണത്തിലുള്ളത്.ഇതുവരെ 2851 സാമ്പിളുകൾ പരിശോധനയ്ക്കയച്ചതിൽ 2571 എന്നതിന്റെ ഫലം ലഭ്യമായി.മാത്രമല്ല സമൂഹവ്യാപന സാധ്യത അറിയുന്നതിനുള്ള രണ്ടാംഘട്ട പരിശോധനയും തുടരുകയാണ്.വിവിധ ഭാഗങ്ങളിൽ നിന്നുള്ള 30 പേരുടെ സാമ്പിളുകളാണ് പരിശോധനയ്ക്കായി അയച്ചത്.വൈറസ് വ്യാപന സാധ്യതയുള്ള വിഭാഗങ്ങളിൽ പെട്ടവരെയാണ് രണ്ടാംഘട്ടത്തിൽ സ്രവപരിശോധനയ്ക്ക് വിധേയമാക്കുന്നത്.

ഇടുക്കി:ഇന്നലെ പുതുതായി ആറ് കോവിഡ് കേസുകൾ റിപ്പോർട്ട് ചെയ്യപ്പെട്ടതോടെ ഇടുക്കി ജില്ല അതീവ ജാഗ്രതയിൽ. ഏലപ്പാറയിലെ പ്രാഥമിക ആരോഗ്യ കേന്ദ്രത്തിലെ വനിതാ ഡോക്ടർക്കും കോവിഡ് സ്ഥിരീകരിച്ചതോടെ ജില്ലാ ഭരണകൂടം ആശങ്കയിലാണ്. ഇന്നലെ രോഗം സ്ഥിരീകരിക്കപ്പെട്ട ആറ് പേരെയും ഇടുക്കി മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ഏലപ്പാറ പ്രാഥമിക ആരോഗ്യ കേന്ദ്രത്തിലെ ഡോക്ടർക്ക് കോവിഡ് സ്ഥിരീകരിച്ചതോടെ ആശുപത്രി താൽക്കാലികമായി അടച്ചുപൂട്ടി.ഏലപ്പാറയിൽ മൂന്നു ദിവസം മുമ്പ് രോഗം സ്ഥിരീകരിക്കപ്പെട്ട മകനെയും അമ്മയെയും ചികിൽസിച്ചതിനെ തുടർന്നാണ് ഡോക്ടർക്കും രോഗം പിടിപെട്ടതെന്നാണ് കരുതുന്നത്. ഏപ്രിൽ 15ന് ശേഷം ഏലപ്പാറ പ്രാഥമിക ആരോഗ്യ കേന്ദ്രത്തിൽ ചികിത്സ തേടി എത്തിയവരുടെ വിവരങ്ങൾ ജില്ലാ ഭരണകൂടം ശേഖരിച്ചു തുടങ്ങി.ഏലപ്പാറയിൽ ശനിയാഴ്ച ഡോക്ടർ പങ്കെടുത്ത അവലോകന യോഗത്തിൽ പങ്കെടുത്തവരുടെയും പേര് വിവരങ്ങൾ ശേഖരിച്ചു വരികയാണ്.തമിഴ്നാട്ടിൽ നിന്ന് തിരിച്ചെത്തിയ അച്ഛനും ഏഴ് വയസുള്ള മകൾക്കുമാണ് വണ്ടിപ്പെരിയാറിൽ രോഗം സ്ഥിരീകരിച്ചത്. വണ്ടൻമേട്ടിൽ മലപ്പുറത്തു നിന്ന് എത്തിയ 24കാരനും ഇരട്ടയാറിൽ ജർമനിയിൽ നിന്ന് വന്ന വിദ്യാർത്ഥിക്കുമാണ് കോവിഡ് ബാധിച്ചത്. രണ്ട് പേരും നിരീക്ഷണ കാലാവധി പൂർത്തിയാക്കിയവരാണ്. ജില്ലയിൽ കോവിഡ് രോഗം ബാധിച്ച് ഇപ്പോൾ ചികിത്സയിലുള്ള 10 പേരുടെയും ആരോഗ്യനില തൃപ്തികരമാണെന്ന് ജില്ലാ മെഡിക്കൽ ഓഫീസർ വ്യക്തമാക്കി. ഏലപ്പാറ, വണ്ടൻമേട്, ഇരട്ടയാർ, വണ്ടിപ്പെരിയാർ പഞ്ചായത്തുകളിൽ മെയ് 3 വരെ സമ്പൂർണ്ണ ലോക് ഡൗൺ ആയിരിക്കുമെന്ന് ജില്ലാ കലക്ടർ അറിയിച്ചു.