തിരുവനന്തപുരം:തിരുവനന്തപുരത്ത് നിന്നും കാണാതായ യു.എ.ഇ കോണ്‍സുലേറ്റിലെ ഗണ്‍മാന്‍ ജയഘോഷിനെ കണ്ടെത്തി. വീടിന് പുറകിലുള്ള കാട്ടില്‍ നിന്നാണ് കണ്ടെത്തിയത്.കയ്യിലെ ഞരമ്പ് മുറിച്ച നിലയിലായിരുന്നു ഇയാള്‍. ആത്മഹത്യക്ക് ശ്രമിച്ചതാണെന്നാണ് സൂചന. ഗണ്‍മാനെ ഒരു സംഘം ഭീഷണിപ്പെടുത്തിയിരുന്നുവെന്ന് ബന്ധു അജിത്കുമാര്‍ പറഞ്ഞു. ബൈക്കിലെത്തിയ ഒരു സംഘം ഭീഷണിപ്പെടുത്തി. ഫോണ്‍ ചെയ്യാനായി വീടിന് പുറത്തിറങ്ങിയ ജയഘോഷിനെ കാണാതാകുകയായിരുന്നുവെന്നും അജിത്കുമാര്‍ പറഞ്ഞു.ഭാര്യയ്ക്കും മക്കള്‍ക്കും ഒപ്പം വട്ടിയൂര്‍ക്കാവില്‍ താമസിക്കുകയായിരുന്നു ജയ്ഘോഷ്.വ്യാഴാഴ്ച വൈകീട്ട് കുടുംബത്തെ കരിമണലിലെ വീട്ടിലേക്ക് മാറ്റിയ ശേഷമാണ് ഇദ്ദേഹത്തെ കാണാതാവുന്നത്. അനുവദിച്ചിരുന്ന പിസ്റ്റള്‍ വട്ടിയൂര്‍ക്കാവ് പൊലീസ് സ്റ്റേഷനില്‍ തിരികെ ഏല്‍പ്പിച്ച ശേഷമാണ് ഇയാളെ കാണാതാവുന്നത്. മൊബൈല്‍ ഫോണും സ്വിച്ച്‌ ഓഫ് ചെയ്ത നിലയിലായതോടെയാണ് ഇയാള്‍ക്കായുള്ള തിരച്ചില്‍ ശക്തമാക്കുകയായിരുന്നു. പൊലീസും നാട്ടുകാരും ചേര്‍ന്ന് നടത്തിയ പരിശോധനയില്‍ വീടിനോട് ചേര്‍ന്ന പറമ്പിലാണ് ഇദ്ദേഹത്തെ കണ്ടെത്തിയത്.ഞരമ്പ് മുറിച്ച ജയ്‌ഘോഷിനെ ആശുപത്രിയില്‍ പ്രവേശിപ്പിച്ചു. ജൂലൈ അഞ്ചിന് തിരുവനന്തപുരം യുഎഇ കോണ്‍സുലേറ്റിലേക്ക് 30 കിലോ സ്വര്‍ണം കണ്ടത്തിയ കേസില്‍ കസ്റ്റംസ് അറസ്റ്റ് ചെയ്ത സ്വപ്നാ സുരേഷിന്റെ കാള്‍ ലിസ്റ്റില്‍ ജയ്‌ഘോഷിന്റെ നമ്പറുണ്ടായിരുന്നു.ജൂലൈ 3,4,5 തീയതികളില്‍ സ്വപ്നാ സുരേഷ് പല തവണയായി ജയാഘോഷിനെ വിളിച്ചു എന്ന വാര്‍ത്തകള്‍ വന്നിരുന്നു.
