News Desk

തിരുവനന്തപുരം:സംസ്ഥാനത്ത് നാല് ദിവസമായി തുടരുന്ന സ്വകാര്യ ബസ് സമരം പിൻവലിച്ചു. ബസ് ഉടമകള്‍ മുഖ്യമന്ത്രിയുമായി നടത്തിയ ചര്‍ചയ്ക്ക് പിന്നാലെയാണ് തീരുമാനം.ഗതാഗത മന്ത്രിയുമായും ബസ് ഉടമകളുടെ സംഘടന ചര്‍ച നടത്തിയിരുന്നു. മാര്‍ച് 30ന് നടക്കുന്ന ഇടതുമുന്നണി യോഗത്തില്‍ ബസ് ചാര്‍ജ് വര്‍ധന സംബന്ധിച്ച്‌ തീരുമാനം ഉണ്ടാകുമെന്ന ഉറപ്പിനെ തുടര്‍ന്നാണ് ബസ് സമരം പിന്‍വലിച്ചത്.ബസ് ചാർജ് വർദ്ധിപ്പിക്കാമെന്ന് മുഖ്യമന്ത്രി ഉറപ്പ് നൽകിയ സാഹചര്യത്തിൽ സമരവുമായി മുന്നോട്ട് പോകുന്നില്ലെന്ന് ബസ് ഉടമകൾ അറിയിച്ചു.മിനിമം ചാര്‍ജ് 12 രൂപയാക്കുക, വിദ്യാര്‍ഥികളുടെ ചാര്‍ജ് ആറ് രൂപയാക്കുക, ഒരു കിലോമീറ്റര്‍ ഓടുന്നതിന് ഒരു രൂപ നിരക്ക് നിശ്ചയിക്കുക, നികുതി ഇളവ് നല്‍കുക തുടങ്ങിയവയാണ് പ്രധാനമായി ഉടമകള്‍ മുന്നോട്ടുവയ്ക്കുന്ന ആവശ്യം.ചാർജ് വർദ്ധന ആവശ്യപ്പെട്ട് ബസ് ഉടമകൾ കഴിഞ്ഞ നാല് ദിവസമായി സമരം തുടരുകയാണ്. ഇതേ തുടർന്ന് ജനങ്ങൾ വലിയ ബുദ്ധിമുട്ട് ആണ് നേരിടുന്നത്. ഇതോടെയാണ് മുഖ്യമന്ത്രി നേരിട്ട് ചർച്ച നടത്തിയത്. അതേസമയം തിങ്കള്‍, ചൊവ്വ ദിവസങ്ങളില്‍ നടക്കുന്ന പൊതു പണിമുടക്കില്‍ പങ്കെടുക്കുമെന്നും ബസ് ഉടമകള്‍ അറിയിച്ചു.

തിരുവനന്തപുരം: ചാർജ് വർദ്ധനവ് ആവശ്യപ്പെട്ട് സംസ്ഥാനത്ത് സ്വകാര്യ ബസ്സുടമകൾ നടത്തുന്ന അനിശ്ചിതകാല സമരം തുടങ്ങി. കുറഞ്ഞനിരക്ക് 12 രൂപയാക്കുക, വിദ്യാര്‍ഥികളുടെ യാത്രാനിരക്ക് ആറുരൂപയാക്കുക, കിലോമീറ്റര്‍ നിരക്ക് ഒരുരൂപ 10 പൈസയാക്കുക തുടങ്ങിയ ആവശ്യങ്ങളുന്നയിച്ചാണ് പണിമുടക്ക്. അടച്ചുപൂട്ടൽ സമയത്തെ നികുതികൾ ഒഴിവാക്കണമെന്നും ബസുടമകൾ ആവശ്യപ്പെടുന്നു. ഏകദേശം ഏഴായിരത്തോളം സ്വകാര്യ ബസുകൾ പണിമുടക്കിന്റെ ഭാഗമായിട്ടുണ്ട്. കെ.എസ്.ആര്‍.ടി.സി. കൂടുതല്‍ ബസുകള്‍ ഓടിക്കാന്‍ തീരുമാനിച്ചെങ്കിലും ആവശ്യത്തിന് ബസും ജീവനക്കാരും ഇല്ലാത്തത് തിരിച്ചടിയാണ്. പരീക്ഷാസമയമായതിനാല്‍ പണിമുടക്കില്‍നിന്നു വിട്ടുനില്‍ക്കണമെന്ന് മന്ത്രി ആന്റണി രാജു അഭ്യര്‍ഥിച്ചു. എന്നാല്‍ , ആവശ്യങ്ങളുന്നയിച്ച്‌ നാലുമാസം കഴിഞ്ഞിട്ടും സര്‍ക്കാര്‍ വാക്കുപാലിക്കാത്തതുകൊണ്ടാണ് സമരത്തിലേക്ക് നീങ്ങിയതെന്ന് ബസ്സുടമകള്‍ വ്യക്തമാക്കുന്നു.

കോഴിക്കോട്:കെ.റെയിൽ പദ്ധതിക്കായി സർവ്വെകല്ല് സ്ഥാപിക്കുന്നതിനിടെ കല്ലായിയിൽ വീണ്ടും സംഘർഷം.സർവ്വെകല്ല് സ്ഥാപിക്കാനെത്തിയ റവന്യൂ ഉദ്യോഗസ്ഥരെ സമരസമിതിക്കാരും നാട്ടുകാരും തടഞ്ഞു. സംഘർഷത്തിൽ യുവമോർച്ച സംസ്ഥാന അധ്യക്ഷൻ പ്രഫുൽകൃഷ്ണയ്‌ക്ക് മർദ്ധനമേറ്റു.വെസ്റ്റ് കല്ലായ്‌ കുണ്ടുങ്ങൽ, പള്ളിക്കണ്ടി ഭാഗത്ത് രാവിലെ പത്തുമണിയോടെ റവന്യൂഅധികൃതരും അസിസ്റ്റന്റ് കമ്മിഷണർ ബിനുരാജിന്റെ നേതൃത്വത്തിൽ പൊലീസും എത്തി സർവ്വെ നടത്താൻ ശ്രമിച്ചു. എന്നാൽ കെ.റെയിൽ വിരുദ്ധസമരക്കാരും നാട്ടുകാരും ബിജെപി, കോൺഗ്രസ് പ്രവർത്തകരും ഉൾപ്പെടെ കല്ലിടുന്നതിനെതിരെ പ്രതിഷേധിച്ചു. റവന്യൂഭൂമിയിൽ കല്ലിട്ടശേഷം സ്വകാര്യഭൂമിയിലേക്ക് കടന്നതോടെ സംഘർഷമുണ്ടായി. പ്രതിഷേധക്കാർ സർവ്വെകല്ല് പിഴുത് കല്ലായി പുഴയിലെറിഞ്ഞു. പ്രതിഷേധം കനത്തതോടെ റവന്യൂ അധികൃതർ പിൻവാങ്ങി.എന്നാൽ ഉച്ചയ്‌ക്കുശേഷം വീണ്ടുമെത്തിയ സംഘം സ്ത്രീകൾ മാത്രമുള്ള വീടുകളിലെത്തി മുറ്റത്ത് കല്ല് സ്ഥാപിക്കാൻ ശ്രമിച്ചതോടെ നാട്ടുകാർ തടഞ്ഞു. കോതി റോഡിൽ സർവ്വെനടത്തി അടയാളപ്പെടുത്താൻ ശ്രമം നടത്തിയത് പ്രതിഷേധക്കാർ തടഞ്ഞു. പ്രതിഷേധം ശക്തമായതോടെ ഉദ്യോഗസ്ഥർ സർവ്വേ നടത്താനാവാതെ രണ്ടാമതും പിൻവാങ്ങി. രണ്ടു ദിവസം മുൻപ് സർവ്വേ നടത്താൻ എത്തിയിരുന്നുവെങ്കിലും പ്രതിഷേധത്തെ തുടർന്ന് പിൻവാങ്ങുകയായിരുന്നു.

തിരുവനന്തപുരം : സംസ്ഥാനത്ത് ഇന്ന് 719 പേർക്ക് കൊറോണ സ്ഥിരീകരിച്ചു എറണാകുളം 152, തിരുവനന്തപുരം 135, കോട്ടയം 76, കോഴിക്കോട് 62, കൊല്ലം 57, പത്തനംതിട്ട 46, ഇടുക്കി 38, തൃശൂർ 34, ആലപ്പുഴ 28, കണ്ണൂർ 28, മലപ്പുറം 22, പാലക്കാട് 20, വയനാട് 15, കാസർഗോഡ് 6 എന്നിങ്ങനേയാണ് ജില്ലകളിൽ രോഗ ബാധ സ്ഥിരീകരിച്ചത്. കഴിഞ്ഞ 24 മണിക്കൂറിനിടെ 20,250 സാമ്പിളുകളാണ് പരിശോധിച്ചത്.കഴിഞ്ഞ 24 മണിക്കൂറിനിടെ 5 മരണങ്ങളാണ് കൊറോണ മൂലമാണെന്ന് സ്ഥിരീകരിച്ചത്. ഇതുകൂടാതെ മുൻ ദിവസങ്ങളിൽ മരണപ്പെടുകയും എന്നാൽ രേഖകൾ വൈകി ലഭിച്ചത് കൊണ്ടുള്ള 7 മരണങ്ങളും സുപ്രീം കോടതി വിധിപ്രകാരം കേന്ദ്രസർക്കാരിന്റെ പുതിയ മാർഗനിർദേശമനുസരിച്ച് അപ്പീൽ നൽകിയ 106 മരണങ്ങളും റിപ്പോർട്ട് ചെയ്തിട്ടുണ്ട്. ഇതോടെ സംസ്ഥാനത്തെ ആകെ മരണം 67,315 ആയി.ഇന്ന് രോഗം സ്ഥിരീകരിച്ചവരിൽ ഒരാൾ സംസ്ഥാനത്തിന് പുറത്ത് നിന്നും വന്നവരാണ്. 660 പേർക്ക് സമ്പർക്കത്തിലൂടെയാണ് രോഗം ബാധിച്ചത്. 51 പേരുടെ സമ്പർക്ക ഉറവിടം വ്യക്തമല്ല. 7 ആരോഗ്യ പ്രവർത്തകർക്കാണ് രോഗം ബാധിച്ചത്. രോഗം സ്ഥിരീകരിച്ച് ചികിത്സയിലായിരുന്ന 915 പേർ രോഗമുക്തി നേടി. തിരുവനന്തപുരം 138, കൊല്ലം 21, പത്തനംതിട്ട 77, ആലപ്പുഴ 41, കോട്ടയം 15, ഇടുക്കി 87, എറണാകുളം 137, തൃശൂർ 83, പാലക്കാട് 20, മലപ്പുറം 29, കോഴിക്കോട് 140, വയനാട് 45, കണ്ണൂർ 69, കാസർഗോഡ് 13 എന്നിങ്ങനേയാണ് രോഗമുക്തിയായത്. ഇതോടെ 6148 പേരാണ് രോഗം സ്ഥിരീകരിച്ച് ഇനി ചികിത്സയിലുള്ളത്.