കണ്ണൂര്‍:ഓണ്‍ലൈന്‍ വ്യാപാര വെബ്സൈറ്റ് വഴി 11 ലക്ഷം രൂപയുടെ ഉല്‍പന്നങ്ങള്‍ തട്ടിയെടുത്ത കേസില്‍ രണ്ട് പേര്‍ അറസ്റ്റില്‍. വ്യാജ മേല്‍വിലാസം ഉപയോഗിച്ച്‌ 30 ഐഫോണുകളും ഒരു ക്യാമറയുമാണ് തട്ടിപ്പ് സംഘം കൈക്കലാക്കിയത്. ഫ്ലിപ്പ്കാര്‍ട്ടില്‍ നിന്ന് ഇരിട്ടി മേഖലയിലേക്ക് അയച്ച സാധനങ്ങളാണ് മൂന്നംഗ സംഘം വിദഗ്ധമായി തട്ടിയെടുത്തത്.കമ്പനികളുടെ വന്‍ ഓഫര്‍ ഉള്ള സമയത്ത് വ്യാജ മേല്‍വിലാസത്തില്‍ ഉല്‍പന്നങ്ങള്‍ ഓര്‍ഡര്‍ ചെയ്യും. ഫോണുകള്‍ എത്തിയാല്‍ പാക്കറ്റിലെ സീല്‍ പൊട്ടാതെ മൊബൈല്‍ മാത്രം മാറ്റും.പകരം മംഗലാപുരത്ത് നിന്ന് വാങ്ങിയ ആയിരം രൂപയുടെ ഡമ്മി ഫോണുകള്‍ തിരികെ വയ്ക്കും.ശേഷം ഇത് മടക്കി അയക്കും. ഇതായിരുന്നു മൂന്നംഗ സംഘത്തിന്റെ തന്ത്രം.തട്ടിയെടുത്ത ഫോണുകള്‍ ഉപയോഗിക്കാതെ കണ്ണൂരിലും മംഗലാപുരത്തുമായി മറിച്ചു വില്‍ക്കുകയാണ് ചെയ്യാറുണ്ടായിരുന്നത്. ഇത്തരത്തില്‍ 30 ഐഫോണുകളും ഒരു ക്യാമറയുമാണ് ഇവര്‍ തട്ടിയെടുത്തത്. ഇടപാടുകാ‍ര്‍ക്ക് ഉല്‍പ്പന്നങ്ങള്‍ എത്തിക്കാന്‍ ചുമതലയുള്ള ഫ്രാഞ്ചൈസിയുടെ പരാതിയിലാണ് രണ്ട് പേരെ പൊലീസ് അറസ്റ്റ് ചെയ്തത്. തട്ടിപ്പിലെ പ്രധാനി സംസ്ഥാനം വിട്ടതായി പൊലീസ് പറയുന്നു.
