News Desk

ആലപ്പുഴ :മുന്നില്‍പ്പോയ ലോറിയില്‍ നിന്ന് ടാര്‍പോളിന്‍ ഷീറ്റ് പറന്ന് ഓട്ടോറിക്ഷയ്ക്ക് മുകളിൽ വീണതിനെ തുടര്‍ന്നുണ്ടായ അപകടത്തില്‍ ഒരാള്‍ മരിച്ചു.ഓട്ടോ ഡ്രൈവറുടെ കാഴ്ച മറഞ്ഞതിനെ തുടര്‍ന്ന് നിയന്ത്രണം വിട്ട ഓട്ടോ എതിരെ വന്ന ലോറിയുമായി കൂട്ടിയിടിക്കുകയായിരുന്നു. ഓട്ടോ ഡ്രൈവർ കോട്ടയം പള്ളം പന്നിമറ്റം പുളിമൂട്ടില്‍ വി കെ സജീവ് (54) ആണ് മരിച്ചത്.ഇയാളുടെ ഭാര്യ ലീലാമ്മയെ കാലിന് സാരമായ പരിക്കുകളോടെ വണ്ടാനം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ആലപ്പുഴ എസി റോഡില്‍ പള്ളാത്തുരുത്തി പാലത്തിന് അടുത്തുവെച്ച്‌ ബുധനാഴ്ച വൈകീട്ടായിരുന്നു അപകടം. ആലപ്പുഴ ഭാഗത്തു നിന്നും കോട്ടയത്തേക്ക് പോകുകയായിരുന്നു ഓട്ടോറിക്ഷ.ഇതിനിടെ മുന്നില്‍ പോയ ലോറിയില്‍ നിന്നും പടുത(ടാര്‍പോളിന്‍ ഷീറ്റ്) അഴിഞ്ഞ് ഓട്ടോയ്ക്ക് മേല്‍ പറന്നുവീഴുകയായിരുന്നു. പടുത മുഴുവനായി ഓട്ടോയില്‍ മൂടിയതോടെ കാഴ്ച മറഞ്ഞ് നിയന്ത്രണം വിട്ട് ലോഡുമായി വന്ന ടോറസ് ലോറിയില്‍ ഇടിക്കുകയായിരുന്നു

കോട്ടയം: സംസ്ഥാനത്ത് പക്ഷിപ്പനി പടരുന്ന സാഹചര്യത്തില്‍ സ്ഥിതിഗതികള്‍ വിലയിരുത്താന്‍ കേന്ദ്ര സംഘം നാളെ കേരളത്തിലെത്തും.പക്ഷിപ്പനി സ്ഥിരീകരിച്ച കോട്ടയം, ആലപ്പുഴ ജില്ലകളില്‍ വിദഗ്ധ സംഘം സന്ദര്‍ശനം നടത്തും. നേരത്തെ കേരളമടക്കമുള്ള സംസ്ഥാനങ്ങള്‍ക്ക് കേന്ദ്ര സര്‍ക്കാര്‍ പക്ഷിപ്പനി ജാഗ്രതാ നിര്‍ദ്ദേശം നല്‍കിയിരുന്നു. ഇതിന് പിന്നാലെയാണ് നാളെ സന്ദര്‍ശനം നടത്തുന്നത്.പക്ഷിപ്പനി ഭീഷണിയാകുന്ന സാഹചര്യത്തില്‍ കേരളമടക്കമുള്ള സംസ്ഥാനങ്ങളുടെ പ്രതിരോധ നടപടികള്‍ ഏകോപിപ്പിക്കാന്‍ കേന്ദ്രസര്‍ക്കാര്‍ കണ്‍ട്രോള്‍ റൂമും തുറന്നിട്ടുണ്ട്. പക്ഷിപ്പനി വ്യാപനം ഒഴിവാക്കാന്‍ സാദ്ധ്യമായ എല്ലാ മുന്‍കരുതലുകളും സ്വീകരിക്കണമെന്ന് കേന്ദ്രം സംസ്ഥാനങ്ങളോട് ആവശ്യപ്പെട്ടിരുന്നു. സംസ്ഥാനത്ത് നിരീക്ഷക സമിതി രൂപീകരിക്കണമെന്നും കേന്ദ്ര നിര്‍ദ്ദേശത്തില്‍ പറഞ്ഞിരുന്നു.കേരളത്തില്‍ എച്ച്‌-5 എന്‍-8 വിഭാഗത്തില്‍പ്പെട്ട വൈറസ് ബാധയാണ് പക്ഷികളില്‍ സ്ഥിരീകരിച്ചിരിക്കുന്നത്. ഈ വൈറസ് മനുഷ്യരിലേക്ക് പകരില്ലെന്നാണ് ആരോഗ്യ വകുപ്പ് നല്‍കുന്ന വിശദീകരണം.പക്ഷിപ്പനി സ്ഥിരീകരിച്ച ആലപ്പുഴ,കോട്ടയം ജില്ലകളില്‍ പന്ത്രണ്ടായിരത്തോളം താറാവുകള്‍ രോഗം ബാധിച്ച്‌ ചത്തു. കൂടാതെ രോഗം സ്ഥിരീകരിച്ച 36000 താറാവുകളെ നശിപ്പിച്ചിട്ടുമുണ്ട്. പക്ഷികളെ കൊല്ലുന്നതിന് നേതൃത്വം നല്‍കുന്നതിന് ആലപ്പുഴയില്‍ 18 അംഗ റാപ്പിഡ് റെസ്‌പോണ്‍സ് ടീം രൂപവത്കരിച്ചിട്ടുണ്ട്. ഒരു വെറ്റിനറി ഡോക്ടറുള്‍പ്പടെ 10 പേര്‍ ടീമില്‍ അംഗങ്ങളായിരിക്കും. കോട്ടയത്ത് വെറ്ററിനറി ഡോക്ടര്‍മാരുടെ നേതൃത്വത്തിലുള്ള എട്ട് ദ്രുതകര്‍മ്മ സേനകളെ നിയോഗിച്ചു. വിവിധ വകുപ്പുകളിലെ അഞ്ച് ഉദ്യോഗസ്ഥര്‍ വീതമാണ് ഓരോ സംഘത്തിലും ഉണ്ടാകുക.പക്ഷികളുടെ അസ്വാഭാവിക മരണങ്ങള്‍ ശ്രദ്ധയില്‍പ്പെട്ടാല്‍ ഉടന്‍ കേന്ദ്രസര്‍ക്കാരിനെ അറിയിക്കണമെന്ന് നിര്‍ദേശിച്ചിട്ടുണ്ട്. കേരളം, രാജസ്ഥാന്‍, ഹിമാചല്‍പ്രദേശ്, മധ്യപ്രദേശ് സംസ്ഥാനങ്ങളിലാണ് പക്ഷിപ്പനി സ്ഥിരീകരിച്ചിട്ടുള്ളത്. ഹരിയാന, ഗുജറാത്ത്, പഞ്ചാബ്, ഉത്തരാഖണ്ഡ് തുടങ്ങിയ സംസ്ഥാനങ്ങളിലും പക്ഷിപ്പനി ജാഗ്രതാ നിര്‍ദേശം നല്‍കിയിട്ടുണ്ട്.

തിരുവനന്തപുരം:സംസ്ഥാനത്തെ തീയേറ്ററുകൾ തുറക്കുന്നത് സംബന്ധിച്ച പുതിയ മാർഗനിർദേശങ്ങളുമായി ആരോഗ്യ വകുപ്പ്.കൊവിഡ് നിയന്ത്രണങ്ങള്‍ പാലിച്ചുള്ള നീണ്ടകാലത്തെ അടച്ചിടലുകള്‍ക്ക് ശേഷമാണ് തീയേറ്ററുകൾ തുറക്കാനൊരുങ്ങുന്നത്.രാവിലെ 9 മുതല്‍ രാത്രി 9 വരെ മാത്രമായിരിക്കും തിയേറ്ററുകള്‍ പ്രവര്‍ത്തിക്കുക.സെക്കന്‍റ്  ഷോ ഉണ്ടായിരിക്കില്ല. കൊവിഡ് നെഗറ്റീവ് ആയ ജീവനക്കാര്‍ മാത്രമേ ജോലിയില്‍ പ്രവേശിക്കാന്‍ പാടുള്ളു. മള്‍ട്ടിപ്ലക്സ് തിയേറ്ററുകളില്‍ ആള്‍ക്കൂട്ടം ഉണ്ടാവുന്ന തരത്തില്‍ ഒരു സമയം ഒന്നിലധികം സിനിമകള്‍ പ്രദര്‍ശിപ്പിക്കുന്ന രീതിയില്‍ മാറ്റം വരുത്തണം.ആകെ സീറ്റുകളുടെ 50 ശതമാനത്തില്‍ മാത്രമാണ് പ്രവേശനം.തിയറ്റര്‍ തുറക്കുന്നതിന് മുൻപ് എയര്‍കണ്ടീഷണര്‍ ശുചീകരിക്കണം. കൃത്യമായ ഇടവേളയില്‍ ഇത് തുടരണം. അകത്തുള്ള വായു നിരന്തരം കൈമാറുന്നതിന്റെ തോത് വര്‍ധിപ്പിക്കുന്ന നിലയിലാകണം എസിയുടെ പ്രവര്‍ത്തനം.മാസ്ക്, സാനിറ്റൈസര്‍, സാമൂഹ്യഅകലം എന്നിവ നിർബന്ധമായും പാലിക്കണം.തിയറ്ററിനുള്ളില്‍ ഭക്ഷണപദാര്‍ഥം പാടില്ല.പരമാവധി ഓണ്‍ലൈന്‍ ബുക്കിങ് സൗകര്യം ഉപയോഗപ്പെടുത്തണം. രോഗലക്ഷണം ഉള്ളവര്‍ക്കായി തിയറ്ററുകളില്‍ ‘സിക്ക് റൂം’ സ്ഥാപിക്കണം. ആരോഗ്യപ്രവര്‍ത്തകര്‍ എത്തുന്നതുവരെ ഇവര്‍ ഇവിടെ കഴിയണം.ഹൈറിസ്ക് വിഭാഗത്തില്‍പ്പെട്ട ജീവനക്കാരെ ജനങ്ങളുമായി സമ്പർക്കമില്ലാത്ത ജോലി ചെയ്യിക്കണം തുടങ്ങിയവയാണ് പ്രധാന മാർഗനിർദേശങ്ങൾ.