കണ്ണൂർ:കണ്ണൂര്‍ റെയില്‍വേ സ്റ്റേഷനില്‍ ഓട്ടോമാറ്റിക് തെര്‍മല്‍ സ്മാര്‍ട്ട് ഗേറ്റ് സ്ഥാപിച്ചു.കോവിഡ് വ്യാപനം നിയന്ത്രണാതീതമായി മാറുന്ന സാഹചര്യത്തില്‍ കെ. സുധാകരന്‍ എം.പി മുൻകൈയെടുത്താണ് ഓട്ടോമാറ്റിക് തെര്‍മല്‍ സ്മാര്‍ട്ട് ഗേറ്റ് യാഥാർഥ്യമാക്കിയത്.വെള്ളിയാഴ്ച രാവിലെ 11ന് തെര്‍മ്മല്‍ സ്മാര്‍ട്ട് ഗേറ്റ് കെ. സുധാകരന്‍ ഉദ്ഘാടനം ചെയ്യും. ഇന്ത്യയില്‍തന്നെ ആദ്യമായാണ് ഒരു റെയില്‍വേ സ്റ്റേഷനില്‍ ഇത്തരം ഒരു സംവിധാനം നിലവില്‍ വരുന്നത്.ഈ സുരക്ഷ ഗേറ്റ് വഴി കടന്നുപോകുന്ന എല്ലാ യാത്രക്കാരുടെയും ഫോട്ടോ, ശരീര താപനില, എത്ര ആളുകള്‍ കടന്നുപോയി എന്നീ വിവരങ്ങള്‍ റെയില്‍വേ അതോറിറ്റിക്കും, ആരോഗ്യ വകുപ്പിനും കിട്ടും. ജനങ്ങള്‍ സ്റ്റേഷനില്‍ കൂട്ടംകൂടി നിന്ന് സുരക്ഷ ഉദ്യോഗസ്ഥരുടെ പരിശോധന കഴിഞ്ഞ് പ്ലാറ്റ് ഫോമിലേക്ക് കയറുന്ന നിലവിലെ സാഹചര്യം മാറ്റാന്‍ ഈ സംവിധാനം ഉപയോഗപ്പെടും. കൂടാതെ, യാത്രക്കാരുടെ ഫോട്ടോ രേഖപ്പെടുത്തുന്നതുകൊണ്ട് ഭാവിയിലും സുരക്ഷാ പ്രശ്നങ്ങള്‍ കൈകാര്യം ചെയ്യുമ്പോൾ ഉദ്യോഗസ്ഥര്‍ക്ക് ഉപകാരപ്പെടും.കോവിഡ് പ്രതിസന്ധിയുടെ തുടക്കത്തില്‍ വന്ദേ ഭാരത് മിഷന്‍ ആരംഭിച്ചപ്പോള്‍ കെ. സുധാകരന്‍ എം.പി മുന്‍കൈയെടുത്ത് കണ്ണൂര്‍ ഇന്‍റര്‍നാഷനല്‍ എയര്‍പോര്‍ട്ടിലും ഇത്തരം സംവിധാനം സ്ഥാപിച്ചിരുന്നു.കോവിഡ് പ്രതിസന്ധി ഒഴിഞ്ഞാലും റെയില്‍വേക്ക് യാത്രക്കാരുടെ നിയന്ത്രണത്തിന് അനുയോജ്യമായ തരത്തില്‍ ഉള്ള ആര്‍ട്ടിഫിഷ്യല്‍ ഇന്‍റലിജന്‍സ് വഴി സ്വയം നിയന്ത്രണത്തില്‍ പ്രവര്‍ത്തിക്കുന്ന അത്യാധുനിക സംവിധാനം ആണ് കണ്ണൂരില്‍ ഒരുക്കിയിരിക്കുന്നത്.
