News Desk

കൊച്ചി:ഗുരുവായൂര്‍-പുനലൂര്‍ പാസഞ്ചര്‍ ട്രെയിനില്‍ യുവതിക്കുനേരെ അജ്ഞാതന്റെ ആക്രമണം. സ്‌ക്രൂഡ്രൈവര്‍ കൊണ്ട് കുത്തുമെന്നു ഭീഷണിപ്പെടുത്തി ആഭരണങ്ങള്‍ ഊരി വാങ്ങി. അക്രമിയില്‍നിന്നു രക്ഷപ്പെടാന്‍ പുറത്തേക്കു ചാടിയതിനെത്തുടര്‍ന്ന് തലയ്ക്കു പരുക്കേറ്റ യുവതി ആശുപത്രിയില്‍ ചികിത്സയിലാണ്. പ്രതിയെ തിരിച്ചറിയാന്‍ കഴിഞ്ഞിട്ടില്ല. മുളന്തുരുത്തി സ്വദേശിയാണ് സ്ത്രീകളുടെ കമ്ബാര്‍ട്ട്‌മെന്റില്‍ ആക്രമണത്തിന് ഇരയായത്. ഇന്നു രാവിലെ പത്തോടെ കാഞ്ഞിരമറ്റത്തിനു സമീപം ഒലിപ്പുറത്തായിരുന്നു സംഭവം. ചെങ്ങന്നൂരിലെ സ്‌കൂളില്‍ ക്ലാര്‍ക്കായി ജോലിചെയ്യുന്ന യുവതി അങ്ങോട്ട് പോകാനായി മുളന്തുരുത്തിയില്‍നിന്നാണ് ട്രെയിനില്‍ കയറിയത്. സംഭവസമയത്ത് കംപാര്‍ട്ടുമെന്റില്‍ ഇവര്‍ മാത്രമാണുണ്ടായിരുന്നത്. കംപാർട്ടുമെന്റിലേക്ക് ചാടിക്കയറിയ അക്രമി രണ്ടു വാതിലുകളും അടച്ചാണ് യുവതിയെ ആക്രമിച്ചത്. ഒരു സ്‌ക്രൂഡ്രൈവർ കൊണ്ട് കഴുത്തിൽ കുത്തിപിടിച്ച് മാലയും വളയും ഊരി നൽകാൻ ആവശ്യപ്പെട്ടതായി യുവതി പറഞ്ഞു. എല്ലാം ഊരി നൽകിയിട്ടും ഉപദ്രവിക്കുകയായിരുന്നു. നാട്ടുകാരാണ് ആശുപത്രിയിൽ എത്തിച്ചതെന്നും യുവതി വ്യക്തമാക്കി. തലയ്ക്ക് പരിക്കേറ്റ യുവതി തീവ്രപരിചരണ വിഭാഗത്തിലാണ് ചികിത്സയിൽ കഴിയുന്നത്.

തിരുവനന്തപുരം:കോവിഡ് വ്യാപനത്തിന്റെ പശ്ചാത്തലത്തിൽ സംസ്ഥാനത്ത് എസ് എസ് എല്‍ സി ഐടി പ്രാക്ടിക്കല്‍ പരീക്ഷ മാറ്റിവെച്ചു.എസ് എസ് എല്‍ സി പരീക്ഷയുടെ ഭാഗമായി മെയ് അഞ്ചിന് ആരംഭിക്കുവാന്‍ നിശ്ചയിച്ചിരുന്ന ഐ റ്റി പ്രാക്ടിക്കല്‍ പരീക്ഷയാണ് മാറ്റിവെച്ചത്. പുതുക്കിയ തിയതികൾ പിന്നീട് അറിയിക്കും.രോഗവ്യാപനം കണക്കിലെടുത്ത് കഴിഞ്ഞ ദിവസം സംസ്ഥാനത്തെ ഹയർ സെക്കന്ററി പ്രാക്ടിക്കൽ പരീക്ഷകൾ മാറ്റിയിരുന്നു. ഇതിന് പിന്നാലെയാണ് പത്താക്ലാസ് പരീക്ഷകളും മാറ്റാൻ തീരുമാനിച്ചത്. മുൻ നിശ്ചയിച്ച തീയതി പ്രകാരം ബുധനാഴ്ച മുതലാണ് പരീക്ഷകൾ ആരംഭിക്കേണ്ടിയിരുന്നത്. കൊറോണ വ്യാപനം കുറയുകയാണെങ്കിൽ അടുത്ത മാസം പകുതിയോടെ പരീക്ഷകൾ നടത്താമെന്നാണ് പൊതു വിദ്യാഭ്യാസ വകുപ്പ് കരുതുന്നത്. എന്നാൽ രോഗവ്യാപനം രൂക്ഷമാകുകയാണെങ്കിൽ പരീക്ഷകൾ പൂർണമായി ഒഴിവാക്കാനും ആലോചനയുണ്ട്.

തിരുവനന്തപുരം: സംസ്ഥാനത്ത് ഇരട്ട ജനിതകവ്യത്യാസം വന്ന വൈറസിന്റെ വ്യാപനം ഗുരുതരമായി വർദ്ധിക്കുന്നതായി റിപ്പോർട്ട്.ഏപ്രില്‍ ആദ്യവാരം കണ്ടെത്തിയ പഠന ഫലത്തില്‍ 40ശതമാനം പേരില്‍ ഈ വകഭേദം കണ്ടെത്തിയെങ്കില്‍ ഇത് മൂന്നാഴ്ച പിന്നിടുമ്ബോള്‍ 75ശതമാനത്തിനുമേല്‍ എത്തിയിട്ടുണ്ടാകുമെന്നാണ് ആരോഗ്യവിദഗ്ദ്ധരുടെ വിലയിരുത്തല്‍. വൈറസ് വ്യാപനത്തിന്റെ തോതിൽ മുൻകരുതലെടുത്തില്ലെങ്കിൽ ഡൽഹിക്കു സമാനമായ അന്തരീക്ഷത്തിലേക്ക് കേരളം വീഴുമെന്നാണ് മുന്നറിയിപ്പ്. തീവ്രവേഗത പ്രതിദിന രോഗികളുടെ എണ്ണം ഒരാഴ്ചകൊണ്ട് അരലക്ഷത്തിലേക്ക് ഉയർത്തുമെന്നും ആരോഗ്യവകുപ്പ് സൂചിപ്പിക്കുന്നു.ജനിതക വ്യത്യാസം വന്ന വൈറസിനെ സംബന്ധിച്ച് മാർച്ച് മാസത്തിൽ തന്നെ ഗവേഷണം ആരംഭിച്ചിരുന്നു. കേരളത്തിൽ കോട്ടയം ജില്ലയിൽ ആദ്യം കണ്ടെത്തിയ വൈറസ് പത്തു ജില്ലകളിൽ വ്യാപിച്ചെന്നും കണ്ടെത്തിയിട്ടുണ്ട്.ഓക്‌സിജൻ സംവിധാനങ്ങളുള്ള ആശുപത്രികളുടെ എണ്ണം വർദ്ധിപ്പിച്ചുകൊണ്ടുള്ള മുന്നൊരുക്കം അനിവാര്യമാണെന്നാണ് ആരോഗ്യ വകുപ്പ് അറിയിക്കുന്നത്.