കണ്ണൂർ: ജൂബിലി ഹാളിലെ കോവിഡ് വാക്സിനേഷന്‍ കേന്ദ്രം ഇന്ന് മുതൽ പുനരാരംഭിക്കും. പ്രതിരോധ പ്രവര്‍ത്തനങ്ങള്‍ക്കായി കോര്‍പറേഷന്‍ നിയോഗിച്ച 200 വളന്‍റിയര്‍മാര്‍ക്കാണ് ആദ്യദിവസം വാക്സിന്‍ നല്‍കുക. രാവിലെ 9.30 മുതല്‍ 11 വരെ കോര്‍പറേഷനിലെ ഒന്നു മുതല്‍ 25വരെ ഡിവിഷനിലുള്ള വളന്‍റിയര്‍മാര്‍ക്കും 11 മുതല്‍ ഒരുമണി വരെ 26 മുതല്‍ 55വരെ ഡിവിഷനിലുള്ള വളന്‍റിയര്‍മാര്‍ക്കും നേരിട്ടെത്തി രജിസ്റ്റര്‍ ചെയ്യാം.നേരത്തെ ദിവസവും ആയിരത്തോളം പേര്‍ക്ക് വാക്സിന്‍ നല്‍കിക്കൊണ്ടിരുന്ന ജൂബിലി ഹാളിലെ വാക്സിനേഷന്‍ കേന്ദ്രം മുന്നറിയിപ്പ് കൂടാതെ ആരോഗ്യവകുപ്പ് നിര്‍ത്തലാക്കിയത് ഏറെ വിവാദമായിരുന്നു. ഇതിനെ തുടര്‍ന്ന് കോര്‍പറേഷന്‍ നിരന്തരം ആവശ്യപ്പെട്ടതിനാലാണ് വാക്സിനേഷന്‍ പുനരാരംഭിക്കാന്‍ ഇപ്പോള്‍ തയാറായിരിക്കുന്നത്. വാക്സിന്‍ മാത്രമാണ് ആരോഗ്യവകുപ്പ് നല്‍കുകയെന്നും മറ്റ് മുഴുവന്‍ സൗകര്യങ്ങളും കോര്‍പറേഷന്‍ തന്നെ ഒരുക്കണമെന്നും ജില്ല മെഡിക്കല്‍ ഓഫീസർ കോർപറേഷന് നല്‍കിയ കത്തില്‍ നേരത്തെ വ്യക്തമാക്കിയിരുന്നു. അതിന് കോര്‍പറേഷന്‍ തയാറായതിനെ തുടര്‍ന്നാണ് ഇപ്പോള്‍ വാക്സിനേഷന്‍ കേന്ദ്രം പുനരാരംഭിക്കുന്നത്.
