കണ്ണൂര്‍: കെ.പി.എസ്.ടി.എ.സംസ്ഥാന സമ്മേളനത്തിനെത്തിയ അധ്യാപകന്‍ കുഴഞ്ഞുവീണ് മരിച്ചു. കണ്ണൂര്‍ പാപ്പിനിശ്ശേരി അരോളി ഗവ.ഹയര്‍ സെക്കണ്ടറി സ്‌കൂള്‍ ഹൈസ്‌കൂള്‍ വിഭാഗം അധ്യാപകന്‍ പി.വി. രാധാകൃഷ്ണന്‍ (53) ആണ് മരിച്ചത്. ഇന്ന് ഉച്ചക്ക് ഒരു മണിയോടെ സമ്മേളനം നടക്കുന്ന മലപ്പുറം ടൗണ്‍ഹാളിന് പുറത്ത് കുഴഞ്ഞു വീണ ഇദ്ദേഹത്തെ ഉടന്‍ മലപ്പുറം സഹകരണ ആശുപത്രിയിലെത്തിച്ചെങ്കിലും മരിച്ചിരുന്നു. കെ.പി.എസ്.ടി.എ കണ്ണൂര്‍ ജില്ലാ കമ്മിറ്റി അംഗമാണ്.
ചെന്നൈ: എഐഎഡിഎംകെ ജനറല്‍ സെക്രട്ടറി ശശികല ഗവര്‍ണറുമായി കൂടിക്കാഴ്ച നടത്തുന്നു.നിരവധി പാര്‍ട്ടി പ്രവര്‍ത്തകരും ശശികലയ്‌ക്കൊപ്പം ഉണ്ട്. ജയലളിതയുടെ ശവകുടീരത്തിലെത്തി ആദരാഞ്ജലികള്‍ അര്‍പ്പിച്ച ശേഷമായിരുന്നു അവര്‍ രാജ്ഭവനിലേക്ക് തിരിച്ചത്.
മധ്യപ്രദേശ്: മുലയൂട്ടുന്ന കുട്ടികളുമായി അമ്മമാരുടെ ബസ് യാത്ര മിക്കപ്പോഴും ദുരിതപൂർണ്ണമാണ്. ഇടയ്ക്ക് കുഞ്ഞിന് പാൽ നൽകേണ്ടി വന്നാൽ തുറിച്ചു നോട്ടങ്ങളും കമ്മന്റുകളും അവൾക്കു ചുറ്റും ഉണ്ടാകും. ഇതിനു ഒരു പരിഹാരവുമായി എത്തിയിരിക്കുകയാണ് മധ്യപ്രദേശ് സർക്കാർ. അമ്മയുടെ സ്വകാര്യത ഉറപ്പുവരുത്താനായി മൂന്ന് വശത്തു നിന്നും കർട്ടൻ കൊണ്ട് മറച്ച സീറ്റാണ് ഇതിനായി ബസിൽ ഒരുക്കിയിരിക്കുന്നത്. സർക്കാർ ബസുകൾക്കു പുറമെ സ്വകാര്യ ബസുകളിലും ഇത് നടപ്പിലാക്കും. ഇത് സംബന്ധിച്ഛ് ബസുടമകൾക്ക് നിർദേശം നൽകിയതായി ഭുപേന്ദ്ര സിംഗ് അറിയിച്ചു.
സ്ത്രീകളുടെ അന്തസ്സ് കാത്തുസൂക്ഷിക്കുക എന്ന ലക്ഷ്യത്തോടെയാണ് ഗതാഗത വകുപ്പ് ഇത്തരമൊരു തീരുമാനവുമായി രംഗത്തെത്തിയിരിക്കുന്നത്. ചൈന പോലുള്ള രാജ്യങ്ങളിൽ മറ്റേർണിറ്റി സീറ്റ് എന്ന ഈ സംവിധാനം വളരെക്കാലം മുൻപേ നടപ്പിലാക്കിയതാണ്.
ആറളം: ശമ്പളം മുടങ്ങിയതിൽ പ്രതിഷേധിച്ഛ് ആറളം ഫാം ഓഫീസിനു മുന്നിൽ അനിശ്ചിതകാല ഉപരോധസമരം തുടങ്ങി. സമരം തീർക്കാൻ മാനേജ്‌മന്റ് ഇടപെടണമെന്ന് സി ഐ ടി യു സംസ്ഥാന സെക്രട്ടറി കെ പി സഹദേവൻ ഉദ്ഘാടനം ചെയ്തുകൊണ്ട് ആവശ്യപ്പെട്ടു. ഇല്ലെങ്കിൽ സമരം കളക്ടറേറ്റിലേക്ക് മാറ്റേണ്ടി വരുമെന്ന് അദ്ദേഹം മുന്നറിയിപ്പ് നൽകി. ബിനോയ് കുരിയൻ അധ്യക്ഷത വഹിച്ചു. എ ഐ ടി യു സി ജില്ലാ പ്രസിഡന്റ് താവം ബാലകൃഷ്ണൻ, ഐ എൻ ടി യു സി ജില്ലാപ്രസിഡന്റ് വി ശശീന്ദ്രൻ, കെ ടി ജോസ് എന്നിവർ സംസാരിച്ചു.
പ്രകടനമായി എത്തിയാണ് തൊഴിലാളികളും ജീവനക്കാരും സമരം ആരംഭിച്ചത് .ഫാമിൽ ജോലിചെയ്യുന്ന 537 തൊഴിലാളികളിൽ 21 പേര് ജീവനക്കാരും 32 പേര് കരാർ ജീവനക്കാരും 304 സ്ഥിരം തൊഴിലാളികളും 180 താത്ക്കാലിക തൊഴിലാളികളുമാണ്. ഇതിൽ 308 പേരും ആദിവാസി വിഭാഗങ്ങളിൽ നിന്നുള്ളവരാണ്.
ഇരിട്ടി: കാക്കയങ്ങാട് കുരാട്ടിൽ മുത്തപ്പൻ മടപ്പുര ക്ഷേത്രത്തിലെ ഉത്സവം കഴിഞ്ഞ് മടങ്ങുകയായിരുന്ന സി പി എം പ്രവർത്തകർ സഞ്ചരിച്ച കാറിനു നേരെ ബോംബേറ്. ഇന്നലെ പുലർച്ചെയാണ് സംഭവം. കാറിൽ നാലുപേർ ഉണ്ടായിരുന്നു. സംഭവത്തിൽ പരിക്കേറ്റ മൂന്നു പേരെ പേരാവൂർ താലൂക്ക് ആശുപത്രിയിൽ പ്രവേശിപ്പിച്ചു.
നേരത്തെ ഉത്സവ സ്ഥലത്തുണ്ടായ സംഘർഷത്തിൽ പരിക്കേറ്റ ബി ജെ പി പ്രവർത്തകൻ ഉമേഷിനെ തലശേരി സഹകരണ ആശുപത്രിയിൽ പ്രവേശിപ്പിച്ചു.
ചെറുപുഴ: കുറഞ്ഞ ചെലവില്‍ കൃഷിചെയ്ത് പൊന്നുവിളയിക്കുന്നത് അത്ര ചെറിയ കാര്യമൊന്നുമല്ല. പാട്ടത്തിനെടുത്ത 40 സെന്റില്‍ പാവയ്ക്ക കൃഷി ചെയ്ത് പൊന്നുവിളയിക്കുകയാണ് ഈ കര്ഷകന്. തിരുമേനി മുതുവത്തെ വെളിയത്ത് ജോണ്‍സണാണ് കുറഞ്ഞ ചെലവില്‍ കൃഷി ചെയ്ത് വലിയ നേട്ടമുണ്ടാക്കുന്നത്. ഭാര്യയായ മഞ്ജുവിന്റെ സഹായവും ഇദ്ദേഹത്തിനുണ്ട്
പുറത്തുനിന്നുള്ളവരുടെ സഹായമില്ലാതെ ഒറ്റയ്ക്കു തന്നെയാണ് കൃഷിയ്ക്കു വേണ്ട എല്ലാ കാര്യങ്ങളും ഇദ്ദേഹം ചെയ്യുന്നത്. ഇതിനു പുറമെ മികച്ച ക്ഷീര കര്ഷകന് കൂടിയാണ് ജോണ്‍സണ്‍. നാല് പശുക്കള്‍ ഉള്ള ജോണ്‍സണ്‍ കൃഷിയ്ക്കുള്ള വളവും ഇവയില്‍ നിന്നാണ് കണ്ടെത്തുന്നത്. കൂടാതെ എല്ലുപൊടി, കടലപ്പിണാക്ക്, വേപ്പിന്‍ പിണ്ണാക്ക്, കോഴിവളം എന്നിവയും കൃഷിക്കുവേണ്ടി ഉപയോഗിക്കുന്നുണ്ട്.
മയ്യിൽ: നാടക പ്രവർത്തകരായ ജിജു ഒറപ്പടി യും വിജേഷ് കൈലാസും മുടി നീട്ടി വളർത്താൻ തുടങ്ങിയപ്പോൾ ആർക്കും അത്ര പുതുമയൊന്നും തോന്നിയിരുന്നില്ല. കലാകാരന്മാരുടെ കാര്യത്തിൽ അതൊരു പതിവ് കാഴ്ചയാണല്ലോ. എന്നാൽ കഴിഞ്ഞ ദിവസം ഒറപ്പടി കലാകൂട്ടായ്മയുടെ കളിവട്ടം പാഠശാല ഒരുക്കിയ ചടങ്ങിൽ പെൺമുടിയുടെ ലക്ഷ്യമെന്തെന്നു ഇരുവരും പ്രഖ്യാപിച്ചപ്പോൾ സദസ്സിലും ആ നന്മയുടെ വെളിച്ചം വീശി. “അർബുദരോഗികൾക്ക് വിഗ് നിർമ്മിക്കുന്നതിനായി തലമുടി ദാനം ചെയ്യുന്ന പദ്ധതിക്ക് ഈ നാട്ടിലും തുടക്കമിടണമെന്നു ഞങ്ങൾക്കും തോന്നി. സ്വയം വഴികാണിക്കാനും തീരുമാനിച്ചു. ദാനം ചെയ്യാൻ മുടിക്ക് 17 ഇഞ്ച് നീളമെങ്കിലും വേണമെന്നുണ്ട്. ആ നീളമെത്തിയതോടെയാണ് ഇവിടെ വെച്ച്‌ മുടി മുറിച്ചു ദാനം ചെയ്യുന്നത്”.
അതുകേട്ടതും സദസ്സിൽ കൈയടിയുടെ പെരുമഴയായി. മുടിദാന പദ്ധതിയുടെ ഉദ്ഘാടനം സാമൂഹിക പ്രവർത്തക നിഷ ജോസ് നിർവഹിച്ചു. പിറകെ വേദിയിൽ നിന്ന് ചോദ്യമുയർന്നു. മുടി ദാനം ചെയ്യാൻ തയ്യാറുള്ളവർ ആരെങ്കിലുമുണ്ടോ…?. ആദ്യമെത്തിയത് ജിജു ഒറപ്പടിയുടെ ഭാര്യ ശിശിരയാണ്. പിന്നെ ബിന്ദു, പ്രകാശ് , വിദ്യാർത്ഥിനിയായ അനാമിക എന്നിവരും പതിനേഴ് ഇഞ്ചു നീളത്തിൽ മുടിനല്കി. ചടങ്ങിൽ മയ്യിൽ പഞ്ചായത്ത് പ്രസിഡന്റ് പി ബാലൻ അധ്യക്ഷനായിരുന്നു. ജിജു ഒറപ്പടി സ്വാഗതവും മോഹൻ കാരകിൾ നന്ദിയും പറഞ്ഞു.