News Desk

ചീമേനി: എന്‍ഡോസള്‍ഫാന്‍ ദുരിതബാധിതന്‍ പഞ്ചായത്ത് ഓഫീസില്‍ കുഴഞ്ഞുവീണ് മരിച്ചു. കയ്യൂര്‍-ചീമേനി പഞ്ചായത്തിലെ ചീമേനി കിഴക്കേക്കര സ്വദേശി കെ.കമലാക്ഷന്‍ (44) ആണ് മരിച്ചത്. വീടിന് സഹായധനം കിട്ടാത്തതിനെക്കുറിച്ച് അന്വേഷിക്കാനെത്തിയപ്പോഴാണ് കുഴഞ്ഞുവീണ് മരിച്ചത്.

പത്ത് വര്‍ഷത്തിലേറെയായി  കമലാക്ഷന്‍ എന്‍ഡോസള്‍ഫാന്‍ ദുരിതബാധിതനാണ്. കുറേ വര്‍ഷം കിടപ്പിലായിരുന്നു. രണ്ടുവര്‍ഷം മുന്‍പ് ഇന്ദിര ആവാസ് യോജന പ്രകാരമുള്ള ഗുണഭോക്തൃ ലിസ്റ്റില്‍ ഉള്‍പ്പെട്ടിരുന്നു. സഹായധനം ലഭിക്കുമെന്ന പ്രതീക്ഷയില്‍ പഴയ വീട് പൊളിച്ചുനീക്കി. പുതിയ വീടിന് തറയും പണിതു. എന്നാല്‍ പിന്നീട് പദ്ധതി മാറിയതിനാല്‍ പുതിയ ലിസ്റ്റില്‍ ഉള്‍പ്പെട്ടിരുന്നില്ല.പശു തൊഴുത്തിലാണ് ഇപ്പോള്‍ കമലാക്ഷന്റെ കുടുംബം കഴിയുന്നത്. ഭാര്യ ബീന കൂലിപ്പണിയെടുത്താണ് കുടുംബം പോറ്റുന്നത്. ചീമേനി ഹയര്‍ സെക്കന്‍ഡറി സ്‌കൂളില്‍ പത്താംതരത്തിലും പ്ലസ് വണ്ണിലും പഠിക്കുന്ന കീര്‍ത്തിയും കാവ്യയുമാണ് മക്കള്‍.

പയ്യന്നൂര്‍: മദ്യപന്മാരെ എതിര്‍ത്താല്‍ ഫലം എന്താണെന്ന് കൈക്കോട്ട് കടവ് ഹൈസ്‌കൂളിലെ അദ്ധ്യാപകനായ എം.മോഹനന്‍ മാഷ് പറഞ്ഞു തരും. മദ്യകുപ്പിയും ഭക്ഷണ അവശിഷ്ടങ്ങളും കണിയായി വീട്ടുപടിക്കല്‍ എത്തുമെന്നാണ്  മാഷ് പറയുന്നത്. ഇന്ന് രാവിലെയോടെയാണ് മോഹനന്‍ മാഷിന്റെ വീട്ടുപടിക്കല്‍ മദ്യ കുപ്പിയും ഭക്ഷണ അവശിഷ്ടങ്ങളും കണ്ടത്. പയ്യന്നൂര്‍ സുബ്രഹ്മണ്യസ്വാമി ക്ഷേത്രത്തിന് സമീപമുള്ള മാഷിന്റെ വീട്ടുവരാന്തയിലാണ് മദ്യപന്മാര്‍ തങ്ങളുടെ പ്രതികാരം തീര്‍ത്തത്.

ഈ പ്രദേശങ്ങളിലെ വിദ്യാര്‍ത്ഥികള്‍ അടക്കമുള്ള ചെറുപ്പക്കാരെ മദ്യപാനികളാക്കാനുള്ള ശ്രമത്തെ ഈ അദ്ധ്യാപകന്‍ തടഞ്ഞിരുന്നു. ഇതാണ് മദ്യപന്മാരെ ചൊടിപ്പിച്ചത്.