കണ്ണൂർ: കണ്ണൂരിലെ സമാധാനശ്രമങ്ങള്‍ അട്ടിമറിക്കാന്‍ സിപിഎമ്മിനകത്തെ സര്‍ക്കാര്‍ വിരുദ്ധ ലോബി പ്രവര്‍ത്തിക്കുന്നതായി യുഡിഎഫ് നേതാവ് എംഎം ഹസ്സന്‍ കണ്ണൂര്‍ ഗസറ്റ് ഹൗസില്‍ മാധ്യമപ്രവര്‍ത്തകരോട് പറഞ്ഞു. ജില്ലയിലെ സമാധാന ശ്രമങ്ങള്‍ ഇല്ലാതാക്കുന്നത് മുഖ്യമന്ത്രി നോവിച്ചുവിട്ട ഒരു മൂര്‍ഖനാണെന്നും അദ്ദേഹം തുറന്നടിച്ചു. ഇതിനു ഉദാഹരണമാണ് സര്‍വ്വകക്ഷി സമാധാനയോഗം കഴിഞ്ഞതിനു ശേഷം ജില്ലയിലുണ്ടായ അക്രമ സംഭവങ്ങള്‍. കഴിഞ്ഞ ദിവസം കതിരൂരിലും നടുവിലും ഉണ്ടായ അക്രമങ്ങളുടെ ഉത്തരവാദി ആരാണെന്നും ഹസ്സന്‍ ചോദിച്ചു.
കണ്ണൂർ: കണ്ണൂരില്‍ നിന്നും ഗള്‍ഫ് നാടുകളിലേക്ക് പറന്ന പ്രവാസികള്‍ക്കും ഇനിയങ്ങോട്ട് ഗള്‍ഫിലേക്ക് പോകാന്‍ ഒരുങ്ങുന്നവര്‍ക്കും, അവിടെ നിന്ന് തിരിച്ച് നാട്ടിലേക്ക് തിരികെയെത്തുന്നവര്‍ക്കും ഒരു സന്തോഷവാര്‍ത്തയുണ്ട്.കേരളത്തിന്റെ നാലാമത് അന്താരാഷ്ട്ര വിമാനത്താവളമാകാന്‍ ഒരുങ്ങുന്ന കണ്ണൂരില്‍ നിന്നും തുടക്കം സര്‍വ്വീസ് നടത്തുന്നത് ഗള്‍ഫ് രാജ്യങ്ങളിലേക്കായിരിക്കുമെന്ന് റിപ്പോര്‍ട്ടാണ് പ്രവാസികളെ സന്തോഷിപ്പിക്കുന്നത്. ഇതോടെ ഗള്‍ഫ് രാജ്യങ്ങളിലേക്ക് എത്തിപെടാനുള്ള ഇവരുടെ മണിക്കൂറുകള്‍ കുറഞ്ഞുകിട്ടും.
കണ്ണൂര്‍ വിമാനത്താവളത്തില്‍ നിന്നും തുടക്കത്തില്‍ പത്ത് ഗള്‍ഫ് രാജ്യങ്ങളിലെ വിമാനത്താവളങ്ങളിലേക്ക് സര്‍വ്വീസ് നടത്താനുള്ള അനുമതിയ്ക്കായാണ് കണ്ണൂര്‍ കാത്തിരിക്കുന്നത്. നേരത്തെ വിദേശത്തും സ്വദേശത്തുമുള്ള വിമാന കമ്പനികളുമായി കിയാല്‍ ചര്‍ച്ച നടത്തിയതാണ്. ഈ ചര്‍ച്ചയില്‍ അനുകൂല നിലപാടുകളാണ് കമ്പനികള്‍ കൈക്കൊണ്ടതെന്നും കിയാല്‍ അറിയിച്ചിരുന്നു.
ഗള്‍ഫ് രാജ്യങ്ങളിലേക്ക് പോകുന്നവരിലേറെയും വടക്കന്‍ ജില്ലകളില്‍നിന്നുള്ളവരാണ്. ഇവരെല്ലാം ആശ്രയിക്കുന്നതാകട്ടെ തിരുവനന്തപുരം, കൊച്ചി വിമാനത്താവളങ്ങളെയാണ്. കണ്ണൂരില്‍ വിമാനത്താവളം യാഥാര്‍ഥ്യമാകുന്നതോടെ ഇവരുടെ ഗള്‍ഫ് രാജ്യങ്ങളിക്കുള്ള പറക്കല്‍ എളുപ്പമാവും.
മട്ടന്നൂര്‍ : മട്ടന്നൂര്‍ചാവശ്ശേരി ടൗണിലുള്ള കിണറ്റില്‍ നിന്നും മൃതദേഹം കണ്ടെത്തി. ഇന്ന് ഒരു മണിയോടെയാണ് സംഭവം. പരിയാരം കായല്ലൂര്‍ സ്വദേശി റഫീഖിനെയാണ് മരിച്ച നിലയില്‍ കണ്ടത്. പോലീസും ഫയര്‍ഫോഴ്‌സും എത്തിയാണ് മൃതദേഹം കരയ്‌ക്കെത്തിച്ചത്. സംഭവത്തില്‍ പോലീസ് അന്വേഷണം ആരംഭിച്ചു.
കണ്ണൂർ: ജില്ലയിലെ പാചകവാതക വിതരണ തൊഴിലാളികള്‍ നടത്തിവന്ന പണിമുടക്ക് പിന്‍വലിച്ചു. വിവിധ ആവശ്യങ്ങള്‍ ഉന്നയിച്ചാണ് ഇക്കഴിഞ്ഞ 13ന് പാചകവാതക തൊഴിലാളികളും പെട്രോള്‍ പമ്പ് തൊഴിലാളികളും സമരം ആരംഭിച്ചത്. 2016 ഡിസംബര്‍ 21 ലെ മിനിമം വേതനം സംബന്ധിച്ചുള്ള ഉത്തരവ് നടപ്പാക്കാമെന്ന ധാരണയിലാണ് സമരം പിന്‍വലിക്കാന്‍ തൊഴിലാളികള്‍ തയാറായത്. അതേസമയം പെട്രോള്‍ പമ്പുടമകളും തൊഴിലാളി യുനിയനുകളും തമ്മിലുള്ള ചര്‍ച്ച തുടരുന്നു.
ചെന്നൈ : തമിഴ്നാട്ടിലെ രാഷ്ട്രീയ അനിശ്ചിതത്വങ്ങൾക്ക് വിരാമം. തമിഴ്നാടിന്റെ പുതിയ മുഖ്യമന്തിയായി എടപ്പാടി പളനി സ്വാമി ഇന്ന് സത്യപ്രതിജ്ഞ ചെയ്യും. രാവിലെ ഗവർണറുമായി നടന്ന കൂടിക്കാഴ്ചയിൽ സർക്കാർ രൂപീകരിക്കാൻ സി വിദ്യാസാഗർ റാവു പളനിസ്വാമിയെ ക്ഷണിച്ചു.
പതിനഞ്ചു ദിവസത്തിനകം വിശ്വാസവോട്ട് തേടണമെന്നും ഗവർണർ പളനിസ്വാമിയോട് ആവശ്യപ്പെട്ടിട്ടുണ്ട്. ഇന്ന് വൈകിട് 4 30 ഓടെ പളനിസ്വാമി സത്യപ്രതിജ്ഞ ചെയ്യുമെന്നാണ് സൂചന.
കഴിഞ്ഞ രണ്ടാഴ്ചയിലേറെയായി നിലനിൽക്കുന്ന രാഷ്ട്രീയ ഭരണ പ്രതിസന്ധികൾക്കാണ് ഇതോടെ വിരാമമാവുന്നത്. വാര്‍ത്ത പുറത്തുവന്നതോടെ കൂവത്തൂരിലെ റിസോര്‍ട്ടില്‍ ശശികല അനുകൂലികള്‍ ആഹ്ലാദ പ്രകടനം തുടങ്ങി. സേലം ജില്ലയിലെ എടപ്പാടിയില്‍നിന്നുള്ള ജനപ്രതിനിധിയാണ് പളനിസാമി.
ചെന്നൈ: തമിഴ്‌നാട്ടില്‍ രാഷ്ട്രീയ പ്രതിസന്ധികള്‍ തുടരുന്നതിനിടെ അണ്ണാ ഡിഎംകെ നിയമസഭാകക്ഷി നേതാവ് എടപ്പാടി പളനിസാമിയെ ഗവര്‍ണര്‍ സി. വിദ്യാസാഗര്‍ റാവു രാജ്ഭവനിലേക്ക് ക്ഷണിച്ചു. വ്യാഴാഴ്ച ഉച്ചയ്ക്ക് മുന്‍പ് എടപ്പാടി ഗവര്‍ണറുമായി കൂടിക്കാഴ്ച നടത്തും. നീക്കത്തെ ഏറെ പ്രതീക്ഷയോടെയാണ് അണ്ണാ ഡിഎംകെ കാണുന്നത്. അമ്മയുടെ വിജയം എന്നാണ് നടപടിയെ പാര്‍ട്ടി വിശേഷിപ്പിച്ചത്.
തമിഴ്‌നാട്ടില്‍ പുതിയ സര്‍ക്കാര്‍ രൂപീകരിക്കാന്‍ ഗവര്‍ണര്‍ സി. വിദ്യാസാഗര്‍ റാവുവിനുമേല്‍ സമ്മര്‍ദമേറുന്നതിനിടെയാണ് പുതിയ നീക്കം. ദിവസങ്ങളായി തുടരുന്ന രാഷ്ട്രീയ അനിശ്ചിതത്വവും ഭരണസ്തംഭനവും പുതിയ തലത്തിലേക്ക് നീങ്ങുന്നതിനിടെയാണ് എടപ്പാടി വീണ്ടും ഗവര്‍ണറെ കാണുന്നത്. ആരെ ആദ്യം വിശ്വാസവോട്ട് തേടാന്‍ സഭയിലേക്ക് അയയ്ക്കും എന്നതാണ് ചോദ്യം. സര്‍ക്കാരിന്റെ ഭൂരിപക്ഷം തെളിയിക്കേണ്ടത് സഭാതലത്തില്‍ തന്നെവേണമെന്നാണ് ഗവര്‍ണര്‍ക്ക് കിട്ടിയ നിയമോപദേശങ്ങളെല്ലാം.
എടപ്പാടി പളനിസാമിയും കാവല്‍ മുഖ്യമന്ത്രി ഒ. പനീര്‍സെല്‍വവും കഴിഞ്ഞദിവസം രാജ്ഭവനിലെത്തി അവകാശവാദം ഉന്നയിച്ചിരുന്നു. 124 എംഎല്‍എമാരുടെ പിന്തുണയുണ്ടെന്നായിരുന്നു എടപ്പാടിയുടെ അവകാശവാദം. പനീര്‍സെല്‍വത്തിന് എട്ട് അംഗങ്ങളുടെ പിന്തുണയാണുള്ളത്. പളനി സാമിയെ പിന്തുണയ്ക്കുന്ന എം എല്‍ എമാരെല്ലാം കൂവത്തൂരിലെ റിസോര്‍ട്ടില്‍ കഴിയുകയാണ്. ഇതിനു പിന്നാലെയാണ് അദ്ദേഹത്തെ ഗവര്‍ണര്‍ ക്ഷണിച്ചിരിക്കുന്നത്. മുഖ്യമന്ത്രിയാകുന്നതിന് എടപ്പാടിയെ ക്ഷണിക്കുമെന്നാണ് സൂചന.
അതേസമയം പളനിസാമിയെ മുഖ്യമന്ത്രിയായി സത്യപ്രതിജ്ഞ ചെയ്യാന്‍ അനുവദിച്ചാല്‍ സഭയില്‍ സമഗ്ര വോട്ടെടുപ്പ് ഇല്ലാതാവും. നിലവിലെ സാഹചര്യത്തില്‍ പളനിസാമിയെ സര്‍ക്കാരുണ്ടാക്കാന്‍ ക്ഷണിക്കുകയല്ലാതെ മറ്റ് മാര്‍ഗമില്ലെന്നാണ് രാജ്ഭവന്‍ വൃത്തങ്ങള്‍ പറയുന്നത്. എല്ലാവശവും പരിഗണിച്ച ശേഷമായിരിക്കും ഗവര്‍ണര്‍ ഒരു തീരുമാനത്തിലെത്തുന്നത്. പളനിസാമിയെ ക്ഷണിക്കുന്നതിന് മുമ്പ് എം.എല്‍.എമാരെ തട്ടിക്കൊണ്ടുപോയി റിസോര്‍ട്ടില്‍ താമസിപ്പിച്ചിരിക്കുന്ന കാര്യവും ഗവര്‍ണര്‍ പരിഗണിക്കും എന്നും വിലയിരുത്തുന്നുണ്ട്.
തിരുവനന്തപുരം : സംസ്ഥാനത്ത് കുട്ടികള്‍ കുറഞ്ഞ ആംഗന്‍വാടികള്‍ പൂട്ടിയിടാനും കുറഞ്ഞ കുട്ടികള്‍ ഉള്ളവരെ സമീപത്തെ ആംഗന്‍വാടികളിലേക്ക് മാററാനും നിര്‍ദേശം. ഇതു സംബന്ധിച്ച് ആംഗന്‍വാടി സൂപ്പര്‍വൈസര്‍മാരോട് അന്വേഷണം നടത്തി റിപ്പോര്‍ട്ട് ആവശ്യപ്പെട്ടിരിക്കയാണ് സര്‍ക്കാര്‍. കഴിഞ്ഞ ആഴ്ചയാണ് ഇതു സംബന്ധിച്ച് സര്‍ക്കുലര്‍ ബ്ലോക്ക് ഐ.സി.ഡി.എസ്. ഓഫീസുകളില്‍ എത്തിയത്.
വിവിധ ബ്ലോക്കുകളായി നിരവധി ആംഗന്‍വാടികള്‍ ഉണ്ട്. കുട്ടികള്‍ കുറഞ്ഞ കാരണം പറഞ്ഞ് അംഗന്‍വാടികള്‍ പൂട്ടാനുളള സര്‍ക്കാര്‍ തീരുമാനം പ്രതിഷേധത്തോടെയാണ് പലരും സ്വീകരിച്ചത്. സര്‍ക്കാറിന്റെ ഈ തീരുമാനം സര്‍വെ നടത്തി നടുവൊടിഞ്ഞു നില്‍ക്കുന്ന ആംഗന്‍വാടി ജീവനക്കാരില്‍ നിന്നും കടുത്ത എതിര്‍പ്പാണ് ഉണ്ടാകുന്നത്.
ബംഗളൂരു : അനധികൃത സ്വത്തു സന്പാദന കേസിൽ കീഴടങ്ങിയ അണ്ണാ ഡിഎംകെ ജനറൽ സെക്രട്ടറി വി.കെ. ശശികലയ്ക്ക് ബംഗളൂരു പരപ്പന അഗ്രഹാര ജയിലിൽ ലഭിച്ചത് സാധാരണ സെൽ. വനിതകൾക്കുള്ള ബ്ലോക്കിലെ സെല്ലണ് ശശികലയ്ക്ക് നൽകിയത്. നേരത്തെ സെല്ലിൽ ഉണ്ടായിരുന്ന രണ്ടു തടവുകാർക്കൊപ്പമാണ് ചിന്നമ്മയേയും പാർപ്പിച്ചിരിക്കുന്നത്. ബുധനാഴ്ച വൈകുന്നേരമാണ് ശശികല കോടതിയിലെത്തി കീഴടങ്ങിയത്. ജയിലിൽ പ്രത്യേക സൗകര്യം ഒരുക്കണമെന്ന് കീഴടങ്ങുന്പോൾ ശശികല കോടതിയോട് ആവശ്യപ്പെട്ടു.
എക്ലാസ് സെൽ ജയിലിൽ അനുവദിക്കണമെന്നായിരുന്നു പ്രധാന ആവശ്യം. പ്രമേഹമുള്ളതിനാല്‍ വീട്ടിലുണ്ടാക്കുന്ന ഭക്ഷണവും മിനറല്‍ വാട്ടറും ഒപ്പം സഹായിയും ജയിലില്‍ വേണമെന്നും ആവശ്യപ്പെട്ടു. കൂടാതെ യൂറോപ്യന്‍ ക്ലോസറ്റുള്ള ശൗചാലയ സൗകര്യവും അവര്‍ ആവശ്യപ്പെട്ടു. ധ്യാനിക്കാൻ സെല്ലിൽ സൗകര്യം ഏർപ്പെടുത്തണമെന്നും അവർ ആവശ്യപ്പെട്ടു. 24 മണിക്കൂറും ചൂടുവെള്ള സൗകര്യം വേണം.പ്രത്യേക കിടക്കയും ടിവിയും ഉള്ള സൗകര്യങ്ങളോടു കൂടിയ മുറിയാണ് ജയിലില്‍ ശശികലയെ കാത്തിരിക്കുന്നതെന്നാണ് ജയില്‍ അധികൃതര്‍ അറിയിച്ചിരുന്നത്. ശശികലയുടെ ആവശ്യങ്ങൾ കോടതി ജയിൽ അധികൃതർക്ക് കൈമാറി.