News Desk

കൊച്ചി : ഐഎസ്ആർഒ ചാരക്കേസിൽ നഷ്ടപരിഹാരം ആവശ്യപ്പെട്ട് മറിയം റഷീദയും ഫൗസിയ ഹസനും സിബിഐ മുഖേന സുപ്രീം കോടതിയെ സമീപിച്ചു. രണ്ട് കോടി രൂപ വീതം നഷ്ടപരിഹാരം നൽകണമെന്നാണ് ആവശ്യം. ഈ തുക അന്നത്തെ അന്വേഷണ ഉദ്യോഗസ്ഥരിൽ നിന്ന് ഈടാക്കി നൽകണം. ലോഡ്ജ് മുറിയിൽ തന്നെ അപമാനിക്കാൻ ശ്രമിച്ച മുൻ സ്പെഷ്യൽ ബ്രാഞ്ച് ഇൻസ്‌പെക്ടർ പി വിജയനെതിരെ പ്രത്യേകം കേസെടുക്കണമെന്നും മറിയം റഷീദ ആവശ്യപ്പെട്ടിട്ടുണ്ട്.ചാരക്കേസ് കെട്ടിച്ചമച്ചതാണെന്ന് കോടതി കണ്ടെത്തിയിരുന്നു. തുടർന്ന് നമ്പി നാരായണന് അൻപത് ലക്ഷം രൂപ നഷ്ടപരിഹാരം നൽകാനും പ്രതികളെ നിയമത്തിന് മുന്നിൽ കൊണ്ടുവരണമെന്നും സുപ്രീം കോടതി നിർദ്ദേശിച്ചിരുന്നു. പോലീസ്, ഐബി ഉദ്യോഗസ്ഥരടക്കം 18 പേരെ ഗൂഢാലോചന കേസിൽ പ്രതിചേർത്തുകൊണ്ടാണ് സിബിഐ കേസ് രജിസ്റ്റർ ചെയ്തത്. ഈ ഉദ്യോഗസ്ഥരിൽ നിന്നും നഷ്ടപരിഹാരം ഈടാക്കി നൽകണം എന്നാണ് ഇവരുടെ ആവശ്യം.രണ്ട് പേരുടെയും ആവശ്യം സിബിഐ സുപ്രീം കോടതിയെ അറിയിക്കും. മൂന്നരവർഷത്തോളം വിചാരണപോലും ഇല്ലാതെ ജയിൽക്കിടന്നെന്നും തുടർന്നുളള സ്വൈര്യ ജീവിതം വഴിമുട്ടിയെന്നുമാണ് ഇരുവരുടെയും ഹർജിയിലുളളത്.

കോട്ടയം: പ്രതിശ്രുത വരനൊപ്പം ബൈക്കിൽ യാത്ര ചെയ്യുന്നതിനിടെ കെഎസ്ആർടിസി ബസിന് അടിയിൽപ്പെട്ട് യുവതിക്ക് ദാരുണാന്ത്യം. മാമ്മൂട് കരിങ്ങണാമറ്റം സ്വദേശി സുബി ജോസഫാണ് മരിച്ചത്. കോട്ടയം വാഴൂർ റോഡിൽ വച്ചായിരുന്നു അപകടം.ഒരേ ദിശയിലാണ് കെഎസ്ആർടിസി ബസും സ്കൂട്ടറും സഞ്ചരിച്ചിരുന്നത്.കുമളിയിൽനിന്ന് കായംകുളത്തേക്ക് പോവുകയായിരുന്നു ബസ്. സ്കൂട്ടറിനെ ബസ് ഓവർടേക്ക് ചെയ്യുന്നതിനിടെ സ്കൂട്ടർ റോഡിൽനിന്നു തെന്നിമാറുകയും സുബി ബസിനടിയിൽപെടുകയുമായിരുന്നു. യുവാവ് അത്ഭുതകരമായി രക്ഷപെട്ടു.മാമ്മൂട് വളവുകുഴി കരിങ്ങണാമറ്റം സണ്ണി – ബിജി ദമ്പതികളുടെ ഏകമകളാണ് സുബി ജോസഫ്.  മൃതദേഹം കോട്ടയം മെഡിക്കൽ കോളജ് ആശുപത്രി മോർച്ചറിയിൽ.

കൊച്ചി: തൃക്കാക്കര നഗരസഭയിലെ പണക്കിഴി വിവാദത്തിൽ ചെയർപേഴ്‌സൺ അജിത തങ്കപ്പനെതിരെ വിജിലൻസ് അന്വേഷണത്തിന് അനുമതി. എൽഡിഎഫ് കൗൺസിലർമാർ നൽകിയ പരാതിയിൽ കഴമ്പുണ്ടെന്ന വിജിലൻസ് ത്വരിത പരിശോധന റിപ്പോർട്ടിന്റെ അടിസ്ഥാനത്തിലാണ് അന്വേഷണത്തിന് വിജിലൻസ് ഡയറക്ടർ അനുമതി നൽകിയിരിക്കുന്നത്. കേസിൽ എഫ്‌ഐആർ രജിസ്റ്റർ ചെയ്ത് ഉടൻ അന്വേഷണമാരംഭിക്കും.നഗരസഭാദ്ധ്യക്ഷ അജിത തങ്കപ്പൻ കൗൺസിലർമാർക്ക് ഓണക്കോടിയോടൊപ്പം പതിനായിരം രൂപ വീതം നൽകിയെന്നാണ് പരാതി. കോഴപ്പണമായി ലഭിച്ച പണമാണ് ഇവർ വിതരണം ചെയ്തതെന്നാണ് ആരോപണം.ചെയർപേഴ്‌സൺ രാജിവെക്കണമെന്നും പ്രതിപക്ഷാംഗങ്ങൾ ആവശ്യപ്പെട്ടു. പിന്നീട് എൽഡിഎഫ് കൗൺസിലർമാർ വിജിലൻസ് ഡയറക്ടർക്ക് പരാതി നൽകി. തുടർന്ന് ഡയറക്ടറുടെ നിർദേശപ്രകാരം വിജിലൻസിന്റെ എറണാകുളം യൂണിറ്റ് ത്വരിതാന്വേഷണം നടത്തുകയായിരുന്നു.

മരട്:നിരവധി അവകാശവാദങ്ങള്‍ക്കും നാടകീയതയ്ക്കും ഒടുവില്‍ യഥാര്‍ഥ ഭാഗ്യവാനെ കണ്ടെത്തി. ഓണം ബംപര്‍ 12 കോടി സമ്മാനം ലഭിച്ചത് കൊച്ചി മരട് സ്വദേശി ഓട്ടോറിക്ഷാ ഡ്രൈവര്‍ ജയപാലന്. സമ്മാനര്‍ഹമായ ടിക്കറ്റ് ജയപാലന്‍ കൊച്ചിയിലെ കാനറാ ബാങ്കില്‍ സമര്‍പ്പിച്ചു. സ്ഥിരമായി ലോട്ടറി എടുക്കുന്നയാളാണ് താന്‍. ഭാഗ്യം തേടിവന്നപ്പോള്‍ പ്രത്യേകിച്ച്‌ ഒന്നും തോന്നുന്നില്ലെന്നും ജയപാലൻ പറഞ്ഞു. കഴിഞ്ഞ 10നാണ് തൃപ്പൂണിത്തുറയിലെ ഏജന്‍സിയില്‍നിന്നു ലോട്ടറി ടിക്കറ്റ് എടുത്തത്. നമ്പറിന്റെ പ്രത്യേകത കണ്ടാണ് സമ്മാനാര്‍ഹമായ ടിക്കറ്റ് എടുത്തതെന്നും ജയപാലന്‍ പറഞ്ഞു. ആദ്യം കടം വീട്ടണം, കുടുംബ ഭദ്രത ഉറപ്പുവരുത്തണം. സ്ഥിരമായി എല്ലാതരം ലോട്ടറി ടിക്കറ്റും എടുക്കുന്നയാളാണ് താനെന്നും ജയപാലന്‍ കൂട്ടിച്ചേര്‍ത്തു. മീനാക്ഷി ലോട്ടറീസിന്‍റെ തൃപ്പൂണിത്തുറ ശാഖയില്‍നിന്നു വിറ്റ ടിക്കറ്റിനാണ് ഒന്നാം സമ്മാനമെന്ന് ഞായറാഴ്ചതന്നെ ഉറപ്പിച്ചിരുന്നു. നേരത്തെ പ്രവാസിയായ സെയ്ദലവി ഉൾപ്പെടെ ലോട്ടറി അടിച്ചത് തനിക്കാണെന്ന് അവകാശപ്പെട്ടുകൊണ്ട് രംഗത്തെത്തിയിരുന്നു. ഇതിനൊടുവിലാണ് യഥാർത്ഥ ഭാഗ്യവാനെ കണ്ടെത്തിയത്.