തിരുവനന്തപുരം: ജിഷ്ണുവിന്റെ അമ്മയ്ക്കും കുടുംബത്തിനും നേരെ നടന്ന പൊലീസ് അക്രമത്തില്‍ പ്രതിഷേധിച്ച് കോണ്‍ഗ്രസും ബിജെപിയും ആഹ്വാനം ചെയ്ത ഹര്‍ത്താല്‍ തുടങ്ങി. പരീക്ഷ, പത്രം, ആസ്പത്രി, വിവാഹം, മരണം, ശബരിമല – ഉംറ തീര്‍ഥാടകര്‍, ഉത്സവം, പള്ളിപ്പെരുന്നാള്‍ തുടങ്ങിയ അവശ്യ സര്‍വീസുകളെ ഹര്‍ത്താലില്‍ നിന്ന് ഒഴിവാക്കിയതായി അറിയിച്ചിട്ടുണ്ട്. ഉപതിരഞ്ഞെടുപ്പ് നടക്കുന്നതിനാല്‍ മലപ്പുറം ജില്ലയെ ഹര്‍ത്താലില്‍ നിന്ന് ഒഴിവാക്കിയിട്ടുണ്ട്. അതേസമയം ഇന്ന് നടത്താനിരുന്ന പിഎസ്എസി പരീക്ഷകള്‍ക്ക് മാറ്റമില്ല.
പൊലീസ് അതിക്രമത്തിനിരയായി ചികിത്സയില്‍ കഴിയുന്ന ജിഷ്ണു പ്രണോയിയുടെ അമ്മ മഹിജയും, അമ്മാവന്‍ ശ്രീജിത്തും ആശുപത്രിയില്‍ നിരാഹാരം ആരംഭിച്ചു. ഇന്നലെയാണ് നീതി ആവശ്യപ്പെട്ട് സമരത്തിനെത്തിയ ജിഷ്ണുവിന്റെ അമ്മയ്ക്കും കുടംുബത്തിനു നേരെ പൊലീസ് അതിക്രമം അഴിച്ചുവിട്ടത്. പൊലീസ് ആസ്ഥാനത്ത് സമരം അനുവദിക്കില്ലെന്ന് കാണിച്ച് സമരക്കാരെ പൊലീസ് തടയുകയായിരുന്നു.
