News Desk

തിരുവനന്തപുരം:അരുവിക്കര എം.എൽ.എ ശബരീനാഥനും തിരുവനന്തപുരം സബ് കളക്ടർ ദിവ്യ.എസ്.അയ്യരും വിവാഹിതരായി.തക്കല ശ്രീ കുമാരസ്വാമി ക്ഷേത്രത്തിൽ വെച്ച് നടന്ന ലളിതമായ ചടങ്ങിൽ ശബരി ദിവ്യക്കു താലി ചാർത്തി.ഉമ്മൻ ചാണ്ടി,രമേശ് ചെന്നിത്തല,വി.ഡി സതീശൻ,കെ.സി ജോസഫ്,ആന്റോ ആന്റണി,ടി.പി ശ്രീനിവാസൻ,ബിജു പ്രഭാകരൻ തുടങ്ങിയവർ ചടങ്ങിൽ പങ്കെടുത്തു.തിരുവനതപുരം നാലാഞ്ചിറ ഗിരിദീപം കൺവെൻഷൻ സെന്ററിൽ വച്ച് ഇന്ന് വൈകുന്നേരം വിവാഹ സൽക്കാരം നടക്കും.

കണ്ണൂർ:വിദ്യാർത്ഥികൾക്കും മുതിർന്നവർക്കും വിവിധ ശാസ്ത്രമേഖലകളിൽ വിജ്ഞാനം പകരാൻ സയൻസ് എക്സ്പ്രസ്സ് കണ്ണൂരിലെത്തുന്നു.ഡൽഹിയിൽ നിന്നും പുറപ്പെട്ട ട്രെയിൻ ജൂലൈ എട്ടിനാണ് കണ്ണൂരിലെത്തുക.ജൂലൈ പത്തുവരെ കണ്ണൂർ റെയിൽവേ സ്റ്റേഷനിലുണ്ടാകും.ദിവസവും രാവിലെ പത്തു മുതൽ അഞ്ചു വരെയാണ് പ്രദർശനം.ശീതീകരിച്ച പതിനാറു കോച്ചുകളിലായാണ് പ്രദർശനം ഒരുക്കിയിരിക്കുന്നത്.കാലാവസ്ഥ വ്യതിയാനത്തിന്റെ കാരണങ്ങൾ,ഇതിൽ മനുഷ്യന്റെ പങ്ക്,ശാസ്ത്രീയ വശങ്ങൾ,അന്തരഫലം,ലഘൂകരിക്കാനുള്ള മാര്ഗങ്ങള്,ഭാവി പദ്ധതികൾ തുടങ്ങിയ വിഷയങ്ങളാണ് പ്രദർശനത്തിലുള്ളത്. സന്ദർശകർക്ക് ആവശ്യമായ വിവരങ്ങൾ നൽകാൻ പരിശീലനം നേടിയ ശാസ്ത്ര പ്രവർത്തകരുടെ സേവനവും ലഭ്യമാണ്.അഹമ്മദാബാദിലെ വിക്രംസാരാഭായ് കമ്മ്യൂണിറ്റി സയൻസ് സെന്ററിനാണ് പ്രദർശനത്തിന്റെ മേൽനോട്ടം.19000km താണ്ടി രാജ്യത്തെ 68 കേന്ദ്രങ്ങളിലായാണ് സയൻസ് എക്സ്പ്രസ്സ് പര്യടനം നടത്തുക.സ്കൂളുകൾക്ക് 9428405407,9428405408 എന്നീ നമ്പറുകളിൽ വിളിച്ചു രജിസ്റ്റർ ചെയ്യാം.രജിസ്റ്റർ ചെയ്യാതെയും പ്രദര്ശനം കാണാം. പ്രവേശനം സൗജന്യമാണ്.

കണ്ണൂർ:സ്കൂളിൽ നിന്നും വീട്ടിലേക്കു മടങ്ങുന്നതിനിടെ ഒൻപതു വയസ്സുകാരി ബസിടിച്ചു മരിച്ചു.അളവിൽ ഒറ്റത്തെങ്ങിലെ അജിത്തിന്റെ മകൾ അഭിനന്ദനയാണ് മരിച്ചത്.ഇന്നലെ വൈകിട്ടോടെ സ്കൂൾ വിട്ടു വരുമ്പോഴാണ് അപകടം.ഒറ്റത്തെങ്ങിൽ റോഡ് മുറിച്ചു കടക്കുമ്പോൾ അഴീക്കൽ ഭാഗത്തു നിന്നും വന്ന ബസ്സിടിക്കുകയായിരുന്നു .ഉടനെ നാട്ടുകാർ കുട്ടിയെ എ.കെ.ജി ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.വളപട്ടണം പോലീസ് കേസെടുത്തു. അഴീക്കോട് സൗത്ത് യു.പി സ്കൂൾ വിദ്യാർത്ഥിനിയാണ് മരിച്ച അഭിനന്ദന.അമ്മ ബിന്ദു,സഹോദരങ്ങൾ അഭിജിത്,അനുജിത്.