തിരുവനന്തപുരം:വ്യാപാരി വ്യവസായി ഏകോപന സമിതി ജൂലൈ 11 ന് നടത്താനിരുന്ന കടയടപ്പ് സമരം പിൻവലിച്ചു.ജി.എസ്.ടി വിഷയത്തിൽ സർക്കാരിന്റെ നിലപാടുകളിൽ പ്രതിഷേധിച്ചാണ് സമരം നടത്താൻ തീരുമാനിച്ചത്.ധനമന്ത്രി തോമസ് ഐസക്കുമായി നടത്തിയ ചർച്ചയെ തുടർന്നാണ് സമരം പിൻവലിക്കാൻ തീരുമാനിച്ചത്.
പാലക്കാട്:സി.പി.ഐ നേതാവ് പന്ന്യൻ രവീന്ദ്രനെ ദേഹാസ്വാസ്ഥ്യം ഉണ്ടായതിനെ തുടർന്ന് ആശുപത്രിയിൽ പ്രവേശിപ്പിച്ചു.ആന്ജിയോപ്ലാസ്റ്റിക്കു വിധേയനായതിനെ തുടർന്ന് ഇദ്ദേഹത്തിന് ഡോക്ടർമാർ ഒരാഴ്ചത്തെ വിശ്രമം നിർദേശിച്ചു.ഇതോടെ പന്ന്യൻ രവീന്ദ്രന്റെ ഒരാഴ്ചത്തെ പരിപാടികളും റദ്ദാക്കി.പാലക്കാട് ജില്ലാ കമ്മിറ്റി ഓഫീസിൽ വെച്ചാണ് രാവിലെ ഇദ്ദേഹത്തിന് ദേഹാസ്വാസ്ഥ്യം ഉണ്ടായത്.കുഴഞ്ഞു വീണ ഇദ്ദേഹത്തിനെ ഉടൻ തന്നെ പാലക്കാട് ജില്ലാ ആശുപത്രിയിൽ പ്രവേശിപ്പിച്ചു.ഓൾ ഇന്ത്യ ബാങ്ക് എംപ്ലോയീസ് ഫെഡറേഷൻ സംസ്ഥാന സമ്മേളനത്തിൽ പങ്കെടുക്കാനാണ് ഇദ്ദേഹം പാലക്കാട് എത്തിയത്.റെവന്യൂ മന്ത്രിയോടും പാലക്കാട് ജില്ലാ സെക്രട്ടറിയോടും സംസാരിച്ചിരിക്കവെയാണ് അദ്ദേഹം കുഴഞ്ഞു വീണത്.
കൊച്ചി:നടി ആക്രമിക്കപ്പെട്ട കേസിൽ അന്വേഷണം സിനിമ മേഖലയുമായി ബന്ധമുള്ള കൂടുതൽ പേരിലേക്ക് വ്യാപിപ്പിക്കുന്നു.നടൻ ദിലീപുമായി അടുത്ത ബന്ധമുള്ളവരെ കേന്ദ്രീകരിച്ചാണ് അന്വേഷണം.ദിലീപുമായി അടുത്ത ബന്ധമുള്ള കണ്ണൂരിലെ തീയേറ്റർ ഉടമയെ ആലുവ പോലീസ് ക്ലബ്ബിൽ വിളിച്ചു വരുത്തി ചോദ്യം ചെയ്തു.ഇയാൾ നിരവധി തവണ ദിലീപിനെ ഫോണിൽ ബന്ധപ്പെട്ടിരുന്നു എന്ന് സൂചന ലഭിച്ചതിനെ തുടർന്നാണ് പോലീസ് വിവരങ്ങൾ ശേഖരിച്ചത്.നടി ആക്രമിക്കപ്പെട്ട കാലയളവിലെ ദിലീപിന്റെ ഫോൺ കോളുകളെ കുറിച്ചും പോലീസ് അന്വേഷിക്കുന്നുണ്ട്.കൂടാതെ ആക്രമിക്കപ്പെട്ട നടിയുടെ അഭിമുഖങ്ങളും പോലീസ് വിശദമായി പരിശോധിക്കുന്നുണ്ട്.സിനിമയിൽ നിന്നും തന്നെ ഒതുക്കാൻ ശ്രമിച്ചു എന്ന നടിയുടെ ആരോപണം സംബന്ധിച്ചും കൂടുതൽ അന്വേഷണം നടത്താനാണ് പോലീസ് ഉദ്ദേശിക്കുന്നത്.
തിരുവനന്തപുരം:കോഴിവില കുറയ്ക്കാനുള്ള സംസ്ഥാന സർക്കാർ തീരുമാനത്തിനെതിരെ സിപിഎം അനുകൂല സംഘടനയായ പൗൾട്രി ഫാമേഴ്സ് ആന്‍റ് ട്രേഡേഴ്സ് സമിതി. ധനമന്ത്രി തോമസ് ഐസകിന്‍റെ വാദം അംഗീകരിക്കാനാവില്ലെന്നും കൂടിയ വിലയ്ക്ക് വിൽക്കുന്നതിനെതിരെ നടപടിയെടുത്താൽ കടകളടച്ച് സമരം നടത്തുമെന്ന മുന്നറിയിപ്പുമായി സംഘടന രംഗത്തെത്തി.ജിഎസ്ടിയിൽ പതിനാലര ശതമാനം നികുതി കുറഞ്ഞിട്ടും സംസ്ഥാനത്തെ കോഴിവില കൂടുകയാണ്. ഈ സാഹചര്യത്തിലാണ് തിങ്കളാഴ്ച മുതൽ 87 രൂപയ്ക്ക് കോഴി വിൽക്കണമെന്ന‍് ധനമന്ത്രി തോമസ് ഐസക് കർശന നിർദേശം നൽകിയത്. എന്നാൽ കോഴി ലഭ്യത കുറഞ്ഞതിനാലാണ് വില കൂടിയതെന്നും വില കുറച്ച് വിൽക്കില്ലെന്നുമാണ് വ്യാപാരി സംഘടനയായ പൗൾട്രി ഫാമേഴ്സ് ആന്‍റ് ട്രേഡേഴ്സ് സമിതിയുടെ നിലപാട്.ഞായറാഴ്ച തൃശൂരിൽ ചേരുന്ന യോഗത്തിൽ സർക്കാർ തീരുമാനത്തിനെതിരെ സമരമടക്കമുള്ള കാര്യങ്ങൾ ചർച്ച ചെയ്യും. തമിഴ്നാട്ടിൽ നിന്ന് കോഴി എത്തിക്കുന്നത് നിർത്തിവച്ച് കടകളടച്ച് സമരം ചെയ്യാനാണ് ആലോചന.
തിരുവനന്തപുരം:പത്മനാഭസ്വാമി ക്ഷേത്രത്തിലെ ബി നിലവറ തുറക്കാന്‍ പാടില്ലെന്ന് രാജകുടുംബം. നിലവറ തുറക്കരുതെന്നത് പിടിവാശിയല്ലെന്നും, അതിന് നിരവധി കാരണങ്ങളുണ്ടെന്നും, അതെല്ലാം കോടതിയെ ബോധ്യപ്പെടുത്തുമെന്നും മുതിര്‍ന്ന രാജകുടുംബാംഗം അശ്വതിതിരുനാള്‍ ഗൌരിലക്ഷ്മി ഭായി പറഞ്ഞു.പത്മനാഭാസ്വനാമി ക്ഷേത്രത്തിലെ ബി നിലവറ തുറന്നാല്‍ ആരുടേയും വികാരം വ്രണപ്പെടില്ലെന്നും തുറക്കുന്ന കാര്യം രാജകുടുംബവുമായി ആലോചിക്കണമെന്നുമായിരുന്നു സുപ്രീംകോടതി കഴിഞ്ഞ ദിവസം വ്യക്തമാക്കിയത്. എന്നാല്‍ ബി നിലവറ തുറക്കാന്‍ കഴിയില്ലെന്ന നിലപാടായിരിക്കും രാജകുടുംബം സുപ്രീംകോടതിയില്‍ സ്വീകരിക്കുക. തുറക്കാന്‍ കഴിയില്ലെന്ന് പറയുന്നതിന് നിരവധി കാരണങ്ങളുണ്ടെന്ന് രാജകുടുംബാഗം അശ്വതിതിരുനാള്‍ ഗൌരിലക്ഷ്മി ഭായി പറഞ്ഞു.ബി നിലവറ നേരത്തെ ഏഴ് പ്രവശ്യം തുറന്നുവെന്ന് വസ്തുതയല്ല. തുറന്നത് ബി നിലവറക്ക് മുന്നിലുള്ള ഒരു വരാന്ത മുറിയാണ്.പ്രത്യേക തരം പൂട്ടിട്ടാണ് നിലവറ പൂട്ടിയതെന്ന് കേട്ടിട്ടുണ്ടെന്നും അശ്വതിതിരുനാള്‍ ഗൌരിലക്ഷ്മി ഭായി പറഞ്ഞു.
തിരുവനന്തപുരം:തിരുവനന്തപുരം, വേളിയില്‍ റെയില്‍വേ ട്രാക്കില്‍ സഹോദരങ്ങളുടെ മൃതദേഹങ്ങള്‍ കണ്ടെത്തി. തിരുവനന്തപുരം ചെന്നിലോട് സ്നേഹ ഭവനില്‍ ഷിബിയുടെ മക്കളായ ഫെബിന്‍ ( 6), ഫെബ ( 9 ) എന്നിവരുടെ മൃതദേഹങ്ങളാണ് കണ്ടെത്തിയത്. കുട്ടികളെ കൊലപ്പെടുത്തിയ ശേഷം പിതാവ് ആത്മഹത്യ ചെയ്തെന്ന് സംശയമുണ്ട്.
കോട്ടയ്ക്കൽ:കോട്ടയ്ക്കലിൽ സ്വകാര്യ ബസ്സും ലോറിയും കൂട്ടിയിടിച്ച് ഒരു മരണം.നിരവധി ആളുകൾക്ക് പരിക്കേറ്റു.പരിക്കേറ്റവരെ കോട്ടയ്ക്കലിലെയും കോഴിക്കോട്ടെയും സ്വകാര്യ ആശുപത്രികളിൽ പ്രവേശിപ്പിച്ചു.ഇന്ന് പുലർച്ചെ രണ്ടു മണിയോടെ മലപ്പുറം കോട്ടക്കൽ എച്.എം.എസ് ഹോസ്പിറ്റലിന് സമീപത്താണ് സംഭവം നടന്നത്.കോട്ടയത്ത് നിന്നും കൊട്ടിയൂർ അമ്പായത്തോട്ടിലേക്കു വരികയായിരുന്ന അന്ന ബസ്സാണ് അപകടത്തിൽപ്പെട്ടത്.അപകടത്തിൽ ഇരിട്ടി സ്വദേശിനി കല്ലപ്രായിൽ മറിയാമ്മ(68)ആണ് മരണപ്പെട്ടത്.
ഭുവനേശ്വർ:ഏഷ്യന്‍ അത്‌ലറ്റിക്ക്‌ ചാമ്പ്യന്‍ഷിപ്പിന്‍റെ രണ്ടാം ദിനം ഇന്ത്യയുടെ മെഡല്‍കൊയ്ത്ത്. ട്രാക്കില്‍ നാല് ഇനങ്ങളില്‍ നിന്ന് 4 സ്വര്‍ണമടക്കം 7 മെഡലുകളാണ് ഇന്ത്യ കൊയ്തത്. പുരുഷ വിഭാഗം ഷോട്ട് പുട്ടില്‍ തജീന്ദര്‍ പാല്‍ സിങ് തൂര്‍ ഇന്ത്യക്ക് വേണ്ടി വെള്ളി നേടി.വനിതകളുടെ 400 മീറ്റര്‍ ഓട്ടത്തില്‍ ഒന്നാമതെത്തി നിര്‍മല സ്വര്‍‍ണവേട്ടക്ക് തുടക്കമിട്ടു. പൂവ്വമ്മയെ പിന്തള്ളി മലയാളിതാരം ജിസ്ന തന്‍റെ ആദ്യ സീനിയര്‍ മത്സരത്തില്‍ വെങ്കലം നേടി. പിന്നാലെ പുരുഷവിഭാഗത്തില്‍ സ്വര്‍ണവും വെള്ളിയും ഇന്ത്യ നേടി. മലയാളിയായ അനസ് സ്വര്‍ണവും ആരോഗ്യരാജീവ് വെള്ളിയും നേടി. 42 വര്‍ഷത്തിന് ശേഷമാണ് ഈ ഇനത്തില്‍ ഇന്ത്യ സ്വര്‍ണം നേടുന്നത്.പിന്നാലെ 1500 ല്‍ പുരുഷ വനിത വിഭാഗങ്ങളിലും സ്വര്‍ണം നേടി ഇന്ത്യ ട്രാക്കിലെ കരുത്ത് ഒരിക്കല്‍കൂടി തെളിയിച്ചു. പിയു ചിത്രയും അജയ് കുമാര്‍ സരോജുമാണ് ഇന്ത്യക്ക് സ്വര്‍ണതിളക്കം സമ്മാനിച്ചത്. വനിതകളുടെ 100 മീറ്ററില്‍ ദ്യുതി ചന്ദ് വെങ്കലവും നേടിയതോടെ ട്രാക്കില്‍ നിന്ന് മാത്രമുള്ള മെഡല്‍ നേട്ടം 8 ആയി. ഇതിനുപുറമെ പുരുഷ വിഭാഗം ഷോട്ട് പുട്ടില്‍ ഇന്ത്യന്‍ താരം തജീന്ദര്‍ പാല്‍ സിങ് തൂര്‍ വെള്ളിയും നേടി.