കൊച്ചി:നടിയെ ആക്രമിച്ച കേസിൽ അറസ്റ്റിലായ നടൻ ദിലീപിന് ജയിലിൽ പ്രത്യേക സൗകര്യങ്ങൾ അനുവദിക്കില്ല.ജയിലിൽ ദിലീപ് സാധാരണ തടവുകാരൻ ആയിരിക്കും.ജയിലിൽ ദിലീപിനെതിരെ ആക്രമണ സാധ്യത ഉള്ളതിനാൽ പ്രത്യേക സെല്ലിൽ പാർപ്പിക്കണമെന്നു മജിസ്‌ട്രേറ്റ് പറഞ്ഞിരുന്നു.എന്നാൽ അത്തരം സൗകര്യങ്ങൾ ഒന്നും നൽകില്ലെന്ന് പോലീസ് വ്യക്തമാക്കി.ദിലീപിന്റെ വരവ് കാത്ത് നിരവധിപേരാണ് ജയിലിന് പുറത്തു കാത്തു നിന്നത്.വെൽക്കം ടു സെൻട്രൽ ജയിൽ എന്ന മുദ്രാവാക്യം വിളിച്ചു കൊണ്ടാണ് ജനം ദിലീപിനെ ജയിലിലേക്ക് ആനയിച്ചത്.
ആലുവ:നടിയെ ആക്രമിച്ച കേസിൽ ജനപ്രിയ നായകൻ ദിലീപിനെ 14 ദിവസത്തേക്ക് റിമാൻഡ് ചെയ്തു.ദിലീപിനെ ആലുവ സബ്‌ജയിലിൽ എത്തിച്ചു.പോലീസ് നാളെ കസ്റ്റഡി അപേക്ഷ നൽകും.ഇന്ന് രാവിലെ ഏഴു മണിയോടെയാണ് ദിലീപിനെ അങ്കമാലി മജിസ്‌ട്രേറ്റിനു മുൻപിൽ ഹാജരാക്കിയത്.ഐപിസി 120 ബി വകുപ്പാണ് ദിലീപിനെതിരെ ചുമത്തിയിരിക്കുന്നത്.19 തെളിവുകൾ ദിലീപിനെതിരായി പോലീസ് ഹാജരാക്കിയിട്ടുണ്ട്.പോലീസ് വാനിലാണ് ആലുവ പോലീസ് ക്ലബ്ബിൽ നിന്നും ദിലീപിനെ മജിസ്‌ട്രേറ്റിന്റെ അടുത്തെത്തിച്ചത്.മാധ്യമപ്രവർത്തകരുടെ ചോദ്യത്തിന് എല്ലാം കഴിയട്ടെ എന്നാണ് ദിലീപ് പ്രതികരിച്ചത്.ഹൈക്കോടതിയിലെ മുതിർന്ന അഭിഭാഷകൻ രാം കുമാറാണ് ദിലീപിന് വേണ്ടി ഹാജരായിരിക്കുന്നത്.ദിലീപിനായി കോടതിയിൽ ജാമ്യാപേക്ഷ നൽകിയിട്ടുണ്ട്.
കൊച്ചി: നടിയെ ആക്രമിച്ച കേസില്‍ സൂപ്പര്‍ താരം ദിലീപിനെയും സുഹൃത്തും സന്തത സഹചാരിയുമായ നാദിര്‍ഷായെയും പൊലീസ് അറസ്റ്റ് ചെയ്തത് വ്യക്തമായ തെളിവുകള്‍ ലഭിച്ചതിന്‍റെ അടിസ്ഥാനത്തിലെന്ന് സൂചന.ആവശ്യമായ തെളിവുകളെല്ലാം ലഭിച്ച ശേഷമാണ് അറസ്റ്റിലേക്ക് നീങ്ങിയതെന്നാണ് സൂചന. വര്‍ഷങ്ങള്‍ നീണ്ട ഗൂഢാലോചനയാണ് നടന്നത്. ഇതിനാവശ്യമായ തെളിവുകളെല്ലാം ലഭിച്ച ശേഷമായിരുന്നു ദിലീപിനെയും നാദിര്‍ഷായെയും അറസ്റ്റ് ചെയ്യാന്‍ അന്വേഷണ സംഘം തീരുമാനിച്ചത്.ദിലീപിനെതിരെ ഗൂഢാലോചന കേസില്‍ തെളിവുണ്ടെന്നാണ് അറിയുന്നത്. പ്രതികരിലൊരാള്‍ മാപ്പു സാക്ഷിയാകുമെന്നും സൂചനയുണ്ട്. മൂന്നു വര്‍ഷമായി നടിയെ ലക്ഷ്യമിടുകയായിരുന്നു. എംജി റോഡിലെ ഒരു ഹോട്ടലിലാണ് സുപ്രധാന ഗൂഢാലോചന നടന്നതെന്നാണ് അറിയുന്നത്. നേരത്തെയും നടിക്കു നേരെ ഒരു ആക്രമണ ശ്രമം നടന്നിരുന്നു. 2013 മുതല്‍ രൂപം കൊണ്ട ഗൂഢാലോചനയാണ് നടിക്കു നേരെയുള്ള ആക്രമണത്തിനും സൂപ്പര്‍ താരത്തിന്‍റെ അറസ്റ്റിലും കലാശിച്ചത്.
കൊച്ചി:നടൻ ദിലീപ് അറസ്റ്റ് ചെയ്യപ്പെട്ട സംഭവത്തിൽ ഇപ്പോൾ പ്രതികരിക്കാനില്ലെന്ന് ആക്രമണത്തിന് ഇരയായ നടിയുടെ കുടുംബം.ദിലീപിന്റെ അറസ്റ്റ് സ്ഥിതീകരിച്ച ശേഷം പ്രതികരണത്തിനായി സമീപിച്ച മാധ്യമങ്ങളോടാണ് കുടുംബം ഇത്തരത്തിൽ അറിയിച്ചത്.സംഭവത്തിൽ ദിലീപിനൊപ്പം നാദിര്ഷയും കസ്റ്റഡിയിലുണ്ടെന്നു സൂചനയുണ്ട്.
കൊച്ചി:നടിയെ ആക്രമിച്ച കേസിൽ നടൻ ദിലീപിനെ അറസ്റ്റ് ചെയ്തു.പൾസർ സുനിയെ വീണ്ടും കസ്റ്റഡിയിലെടുത്ത് ചോദ്യം ചെയ്തതോടെ ഗൂഢാലോചന സംബന്ധിച്ച് നിർണായക വിവരങ്ങൾ ലഭിച്ചത്.ഇതാണ് ഇപ്പോൾ ദിലീപിന്റെ അറസ്റ്റിലേക്ക് എത്തിച്ചിരിക്കുന്നത്.2013 ലാണ് ഈ ആക്രമണത്തിന്റെ ഗൂഢാലോചന തുടങ്ങിയതെന്നും സൂചന ലഭിച്ചിട്ടുണ്ട്.ഇതിനു മുൻപും സംസ്ഥാനത്തിന് പുറത്തു വെച്ച് നടിയെ ആക്രമിക്കാൻ ശ്രമം നടന്നതായും സൂചന ലഭിച്ചിട്ടുണ്ട്.ഇതിനായി പൾസർ സുനിയെ തന്നെയാണ് നിയോഗിച്ചതെന്നും അന്വേഷണ സംഘം പറയുന്നു.ഇതുമായി ബന്ധപ്പെട്ടു വ്യക്തമായ വിവരങ്ങൾ ദിലീപിനെതിരെ ലഭിച്ചിട്ടുണ്ടെന്നാണ് അറിയുന്നത്.
കൊച്ചി:നടിയെ ആക്രമിച്ച കേസുമായി ബന്ധപ്പെട്ടു ജനപ്രിയ നായകൻ ദിലീയതിനെ പോലീസ് അറസ്റ്റ് ചെയ്തു.വ്യക്തമായ തെളിവുകളുടെ അടിസ്ഥാനത്തിലാണ് ദിലീപിനെ പോലീസ് അറസ്റ്റ് ചെയ്തിരിക്കുന്നത്.അറസ്റ്റ് കാര്യം മുഖ്യമന്ത്രിയുടെ ഓഫീസിൽ സ്ഥിതീകരിച്ചു.തിങ്കളാഴ്ച രാവിലെ മുതൽ ദിലീപ് പോലീസ് കസ്റ്റഡിയിലായിരുന്നു.എന്നാൽ അറസ്റ്റ് വിവരം വൈകിട്ടോടെയാണ് പോലീസ് പുറത്തുവിട്ടത്.
ശ്രീനഗർ:കല്ലേറ് ചെറുക്കാൻ ജമ്മു കാശ്മീരിൽ സൈന്യം മനുഷ്യകവചമാക്കിയ യുവാവിന് പത്തുലക്ഷം രൂപ നഷ്ടപരിഹാരം നല്കാൻ കോടതി വിധി.ജമ്മു കശ്മീരിലെ മനുഷ്യാവകാശ കമ്മീഷനാണ് വിധി പ്രഖ്യാപിച്ചത്.ശ്രീനഗർ മണ്ഡലത്തിലെ ഉപതെരഞ്ഞെടുപ്പിനെ തുടർന്നുണ്ടായ കല്ലേറിനെ പ്രതിരോധിക്കാനാണ് സൈന്യം ഫാറൂഖ് അഹമ്മദ് ധർ എന്ന യുവാവിനെ മനുഷ്യ കവചമാക്കിയത്.പ്രതിഷേധക്കാരുടെ കല്ലേറിൽ നിന്നും രക്ഷപെടാൻ യുവാവിനെ സൈനിക ജീപ്പിനു മുന്നിൽ കെട്ടിയിട്ടു കവചം തീർത്ത സംഭവം വലിയ വിവാദമായിരുന്നു.സൈന്യത്തിന് നേരെ കല്ലെറിഞ്ഞു എന്നാരോപിച്ചാണ് ഫാറൂഖിനെ ജീപ്പിനു മുൻപിൽ കെട്ടിയിട്ടത്.എന്നാൽ താൻ കല്ലെറിഞ്ഞില്ലെന്നും വോട്ട് ചെയ്ത് തിരികെ പോരുമ്പോൾ സൈനികർ പിടികൂടുകയായിരുന്നെന്നുമാണ് ഫാറൂഖ് പറയുന്നത്.
ഭുവനേശ്വർ:ഏഷ്യന്‍ അത്‍ലറ്റിക്ക് ചാമ്പ്യന്‍ഷിപ്പില്‍ ഇന്ത്യക്ക് ചരിത്രത്തിലാദ്യമായി കിരീടം. ചൈനയെ പിന്തള്ളി 12 സ്വര്‍ണമടക്കം 29 മെഡലുകളോടെയാണ് ആതിഥേയരുടെ കിരീടനേട്ടം. ഇന്ത്യക്ക് വേണ്ടി ദീര്‍ഘദൂര ഓട്ടത്തില്‍ ജി ലക്ഷ്മണന്‍ ഇരട്ടസ്വര്‍ണം നേടിയപ്പോള്‍ ടീം നായകന്‍ നീരജ് ചോപ്ര മീറ്റ് റെക്കോര്‍ഡോടെ ജാവലിന്‍ ത്രോയില്‍ സ്വര്‍ണമണിഞ്ഞു.ട്രാക്കിലെ മെഡല്‍കൊയ്ത്താണ് അഭിമാനകരമായ നേട്ടം കാണികള്‍ക്ക് മുമ്പില്‍ സ്വന്തമാക്കാന്‍ ഇന്ത്യക്ക് കരുത്തായത്.അവസാനദിവസം ട്രാക്കില്‍ നിന്നും ഫീല്‍ഡില്‍ നിന്നുമായി ഇന്ത്യ സ്വന്തമാക്കിയത് 5 സ്വര്‍ണമടക്കം 9 മെഡലുകള്‍. നായകന്‍ നീരജ് ചോപ്ര ചാമ്പ്യന്‍ഷിപ്പിലെ രണ്ടാമത്തെ മീറ്റ് റെക്കോര്‍ഡോടെ ജാവലിനില്‍ സ്വര്‍ണം നേടി. 5000ത്തിന് പിന്നാലെ 10000ത്തിലും ഒന്നാമനായതോടെ ജി ലക്ഷ്മണന്‍ ചാമ്പ്യന്‍ഷിപ്പില്‍ ഇരട്ട സ്വര്‍ണം സ്വന്തമാക്കി. 4-400 മീറ്റര്‍ റിലേകളില്‍ ത്രസിപ്പിക്കുന്ന വിജയം നേടിയ ഇന്ത്യ 800 ല്‍ പക്ഷെ നിരാശപ്പെടുത്തി. പരിക്കേറ്റ് മടങ്ങിയ ടിന്‍റുലൂക്കയുടെ അഭാവത്തില്‍ അര്‍ച്ചന ആദേവ് നേടിയ സ്വര്‍ണത്തിന് പക്ഷെ അധികം ആയുസുണ്ടായില്ല. ശ്രീലങ്കന്‍ താരത്തെ പിടിച്ച് തള്ളിയിന് അര്‍ച്ചനയെ അയോഗ്യയാക്കി.പുരുഷ വിഭാഗത്തില്‍ ജിന്‍സണ്‍ ജോണ്‍സണ് മൂന്നാമതെത്താനെ കഴിഞ്ഞുള്ളു. ഹെപ്റ്റാത്തലണില്‍ സ്വപ്ന ബര്‍മനും ഇന്ത്യക്ക് വേണ്ടി അവസാനദിനം സ്വര്‍ണമണിഞ്ഞു. 10000 മീറ്ററില്‍ മലയാളി താരം ടി ഗോപി വെള്ളിയും ജാവലിന്‍ ത്രോയില്‍ ധവീന്ദര്‍ സിങ് കാങും ഹെപ്ടാത്തലണില്‍ പൂര്‍ണിമ ഹെമ്പ്രാമും ഇന്ത്യക്ക് വേണ്ടി ചാമ്പ്യന്‍ഷിപ്പിന്‍റെ അവസാനനാളില്‍ വെങ്കലവും നേടി.
തിരുവനന്തപുരം:മിനിമം വേതനം ആവശ്യപ്പെട്ട് നഴ്സുമാർ നടത്തുന്ന സമരത്തിൽ സ്വരം കടുപ്പിച്ച് സർക്കാർ.നഴ്സുമാരുടെ ശമ്പളം സംബന്ധിച്ച് ഇന്ന് തന്നെ തീരുമാനം എടുക്കണമെന്ന് സർക്കാർ ആശുപത്രി മാനേജ്മെന്റുകൾക്ക് അന്ത്യശാസനം നൽകി.അല്ലാത്തപക്ഷം സർക്കാർ തന്നെ ശമ്പളം നിശ്ചയിച്ച് വിജ്ഞാപനം പുറത്തിറക്കുമെന്നും അറിയിച്ചിട്ടുണ്ട്.സമരം ചെയ്യുന്ന നഴ്സുമാരുടെ പ്രതിനിധികൾ,ആശുപത്രി മാനേജ്മെന്റുകൾ എന്നിവരുമായി തൊഴിൽ,ആരോഗ്യ വകുപ്പ് മന്ത്രിമാരാണ് ഇന്ന് ചർച്ച നടത്തിയത്.ഉച്ചയ്ക്ക് ശേഷം നടന്ന ചർച്ചയിൽ രണ്ടു മണിക്കൂറോളം തൊഴിൽ,ആരോഗ്യ വകുപ്പ് മന്ത്രിമാർ പങ്കെടുത്തു.തുടർന്ന് ഉദ്യോഗസ്ഥരും ആശുപത്രി മാനേജ്‌മെന്റുകളും തമ്മിൽ മിനിമം വേതനം സംബന്ധിച്ച് ചർച്ച നടത്തുകയാണിപ്പോൾ.ഇതിൽ തീരുമാനമായ ശേഷം മന്ത്രിമാരുടെ സാന്നിധ്യത്തിൽ വീണ്ടും ചർച്ച നടത്തും.മാനേജ്മെന്റുകൾ ധാരണ ഉണ്ടാക്കിയില്ലെങ്കിൽ സർക്കാർ മുൻകയ്യെടുത്ത് വിജ്ഞാപനം പുറത്തിറക്കുമെന്നും അറിയിച്ചിട്ടുണ്ട്.
കോഴിക്കോട് :കോഴിക്കോട് മുക്കത്ത് നാലുവയസ്സുകാരിക്ക് പിതാവിന്റെ ക്രൂര മർദനം.നാല് ദിവസം മുൻപാണ് കുട്ടിക്ക് മർദനമേറ്റത്.കട്ടിൽ കേടാക്കി എന്നുപറഞ്ഞു ഇരുമ്പു വടിഉപയോഗിച്ച് കുട്ടിയെ ക്രൂരമായി ഉപദ്രവിക്കുകയായിരുന്നു.ശരീരത്തിൽ നിരവധി മുറിവുകളോടെ കുട്ടി മുക്കം പ്രാഥമികാരോഗ്യ കേന്ദ്രത്തിൽ ചികിത്സയിലാണ്.ഉടൻ തന്നെ കുട്ടിയെ കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റുമെന്ന് അധികൃതർ അറിയിച്ചു.സംഭവത്തിൽ കുട്ടിയുടെ പിതാവിനെ പോലീസ് അറസ്റ്റ് ചെയ്തു.എന്നാൽ സംഭവത്തെ കുറിച്ച് യാതൊന്നും അറിയില്ലെന്നാണ് കുട്ടിയുടെ മാതാവ് പൊലീസിന് മൊഴി നൽകിയിരിക്കുന്നത്.