News Desk

കാക്കയങ്ങാട്:മുഴക്കുന്നു നെയ്യാലത്തു നിന്നും നൂറ്റാണ്ടുകൾ പഴക്കമുള്ള പുരാവസ്തുക്കൾ കണ്ടെത്തി.മഴക്കുഴി എടുക്കുന്നതിനിടെയാണ് പുരാവസ്തുക്കൾ ലഭിച്ചത്.സ്വകാര്യ വ്യക്തിയുടെ പറമ്പിൽ തൊഴിലുറപ്പു തൊഴിലാളികൾ മഴക്കുഴി നിർമിക്കുന്നതിനായി മണ്ണ് നീക്കം ചെയ്യുന്നതിനിടെയാണ് പുരാവസ്തുക്കൾ കിട്ടിയത്.വട്ടളം,കുടം,കിണ്ടി,നിലവിളക്ക്,തൂക്കു വിളക്ക്,കിണ്ണം,പൂജാപാത്രങ്ങൾ എന്നിവയാണ് ലഭിച്ചത്.മുഴക്കുന്നു സ്റ്റേഷനിൽ വിവരം അറിയിച്ചതിനെ തുടർന്ന് അഡിഷണൽ എസ്‌.ഐ കെ.രവീന്ദ്രന്റെ നേതൃത്വത്തിലുള്ള സംഘം സ്ഥലത്തെത്തി പുരാവസ്തുക്കൾ സ്റ്റേഷനിലേക്ക് മാറ്റുകയും ചെയ്തു.

കൊച്ചി:കൊച്ചി മെട്രോ പൊതുജനങ്ങള്‍ക്കായി സര്‍വീസ് ആരംഭിച്ചിട്ട് ഒരു മാസം. നാലരക്കോടി രൂപയാണ് മെട്രോയുടെ ഒരുമാസത്തെ വരുമാനം. നാല്‍പത്തിയേഴായിരം പേര്‍ ദിവസവും മെട്രോ ഉപയോഗിക്കുന്നതായാണ് കെഎംആര്‍എല്ലിന്റെ കണക്ക്.ജൂണ്‍ 19നാണ് കൊച്ചി മെട്രോ പൊതുജനങ്ങള്‍ക്കായി സര്‍വീസ് ആരംഭിച്ചത്.യാത്രക്കാരുടെ ദിവസ ശരാശരി 47646 ആണ്. അവധി ദിനങ്ങളിലും വാരാന്ത്യത്തിലുമാണ് മെട്രോയില്‍ കൂടുതല്‍ യാത്രക്കാരെത്തുന്നത്.മെട്രോയുടെ ആദ്യ ആഴ്ചയിലെ കണക്കുകളുമായി താരതമ്യപ്പെടുത്തുമ്പോള്‍ ദിനംപ്രതി യാത്രക്കാരുടെ എണ്ണം കുറയുന്നതായും കണക്കുകള്‍ സൂചിപ്പിക്കുന്നു. ഒരു മാസത്തെ പ്രവര്‍ത്തന റിപ്പോര്‍ട്ട് സംബന്ധിച്ച് തികഞ്ഞ സംതൃപ്തിയാണുള്ളതെന്ന് കെഎംആര്‍എല്‍ അറിയിച്ചു. മെട്രോയുടെ പാലാരിവട്ടം മുതല്‍ മഹാരാജാസ് വരെയുള്ള മെട്രോ റൂട്ടിലെ പരീക്ഷണ ഓട്ടം വിജയകരമായി പുരോഗമിക്കുകയാണെന്നും കെഎംആര്‍എല്‍ പ്രതികരിച്ചു.

കണ്ണൂർ:കണ്ണൂരിൽ രണ്ടിടത്തായി ട്രെയിൻ തട്ടി രണ്ടുപേർ മരിച്ചു.കിഴുത്തള്ളി ഓവുപാലത്തിനു സമീപവും നടാൽ ഈരയിപ്പാലത്തിനു സമീപവുമാണ് അപകടം.കിഴുത്തല്ലി ഓവുപാലത്തിനു സമീപം പുതിയതെരു രാമത്തെരുവിലെ ജീജാസിൽ ജി.വിൻസെന്റിനെയാണ് (70) മരിച്ച നിലയിൽ കണ്ടെത്തിയത്.വിമുക്തഭടനാണ്.ചൊവ്വാഴ്ച കിഴുത്തള്ളിയിലുള്ള ബന്ധുവീട്ടിൽ പോയതായിരുന്നു വിൻസെന്റ്.ഭാര്യ ജീജ,മക്കൾ ഷാലു,ഷെറിൻ. കണ്ണൂർ ടൗൺ പോലീസ് ഇൻക്വസ്റ്റ് നടത്തി മൃതദേഹം പോസ്റ്റുമോർട്ടത്തിനായി പരിയാരം മെഡിക്കൽ കോളേജിലേക്ക് മാറ്റി. നടാൽ ഈരായിപാലത്തിനു സമീപം സേലം സ്വദേശി പുല്ലൂരാന്റെ(55) മൃതദേഹമാണ് കണ്ടെത്തിയത്.വർഷങ്ങളായി കീഴറയിൽ താമസിച്ചുവരികയായിരുന്നു ഇയാൾ.എടക്കാട് പോലീസ് ഇൻക്വസ്‌റ്റ് നടത്തി മൃതദേഹം തലശ്ശേരി ജനറൽ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്.

കൊച്ചി:കൊച്ചിയില്‍ നടിയെ ആക്രമിച്ച കേസില്‍ ദിലീപിന്റെ മാനേജര്‍ അപ്പുണ്ണി ഹൈക്കോടതിയില്‍ മുന്‍കൂര്‍ ജാമ്യാപേക്ഷ നല്‍കി.അപ്പുണ്ണിക്കായി പൊലീസ് വ്യാപക തിരച്ചില്‍ നടത്തുന്നതിനിടെയാണ് ജാമ്യാപേക്ഷ നല്‍കിയത്.കേസിൽ ചോദ്യം ചെയ്യലിനായി അപ്പുണ്ണിയെ പോലീസ് വിളിപ്പിച്ചിരുന്നു.തുടർന്ന് ഒളിവിൽ പോയിരിക്കുകയായിരുന്നു അപ്പുണ്ണി.വ്യാഴാഴ്ച ദിലീപിന്റെ ജാമ്യാപേക്ഷ പരിഗണിക്കുന്നതിന് മുൻപായി തന്നെ അപ്പുണ്ണിയും ജാമ്യഹർജി സമർപ്പിക്കുകയായിരുന്നു. അപ്പുണ്ണിയെ കസ്റ്റഡിയിലെടുക്കാൻ പ്രത്യേക സംഘത്തിനും പോലീസ് രൂപം നൽകിയിട്ടുണ്ട്.തനിക്കു കേസുമായോ ഗൂഡാലോചനയുമായോ യാതൊരു ബന്ധവുമില്ല എന്നാണ് അപ്പുണ്ണി വ്യക്തമാക്കിയിരിക്കുന്നത്.തന്നെയും നാദിർഷയെയും മാപ്പുസാക്ഷിയാക്കാനാണ് പോലീസ് നീക്കം.കസ്റ്റഡിയിലെടുത്താൽ മൂന്നാംമുറ പ്രയോഗിക്കുമോ എന്ന ഭയമുണ്ടെന്നും മുൻ‌കൂർ ജാമ്യ ഹർജിയിൽ വ്യക്തമാക്കിയിട്ടുണ്ട്.  