കൊച്ചി:നടിയെ ആക്രമിച്ച കേസിൽ പ്രതിയായി ആലുവ സബ്ജയിലിൽ കഴിയുന്ന നടൻ ദിലീപിന് ജയിലിൽ പ്രത്യേക പരിഗണന ഇല്ലെന്നു ഡിജിപി ആർ.ശ്രീലേഖ.ഇത് സംബന്ധിച്ച് ജയിൽ അധികൃതരുമായി സംസാരിച്ചതായും ഡിജിപി അറിയിച്ചു.ജയിലിൽ ദിലീപിന് വി.ഐ.പി പരിഗണനയാണെന്നും ദിലീപിന്റെ സഹായി തമിഴ്നാട് സ്വദേശിയായ മോഷണക്കേസ് പ്രതിയാണെന്നും ജയിൽ ജീവനക്കാർക്ക് കഴിക്കാനായി തയ്യാറാക്കുന്ന പ്രത്യേക ഭക്ഷണം അടുക്കളയിലെത്തി കഴിക്കാൻ ദിലീപിന് അനുവാദമുണ്ടെന്നുമായിരുന്നു വാർത്തകൾ.
തിരുവനന്തപുരം:ലോക അത്ലറ്റിക് മീറ്റിൽ പങ്കെടുക്കാൻ പിയു ചിത്രക്ക് അവസരം നിഷേധിച്ചതിനെതിരെ സമര്‍പിച്ച ഹർജി ഹൈക്കോടതി ഇന്ന് പരിഗണിക്കും. ആഗസ്റ്റ് നാല് മുതൽ 13 വരെ ലണ്ടനിൽ നടക്കുന്ന ലോക മേളയിൽ പങ്കെടുക്കുന്ന 24 പേരുടെ പട്ടിക പ്രഖ്യാപിച്ചപ്പോൾ തന്റെ പേര് ഒഴിവാക്കുകയായിരുന്നുവെന്ന് ചൂണ്ടിക്കാട്ടിയാണ് ചിത്ര ഹർജി നൽകിയിരിക്കുന്നത്. ഏഷ്യൻ അത്ലലറ്റിക് മീറ്റിലെ സ്വർണ മെഡൽ ജേതാവെന്ന നിലയിൽ ലോക മേളയിലേക്കുള്ള സംഘത്തിൽ സ്വാഭാവികമായും അംഗമാകേണ്ടതാണ്. എന്നാൽ, ഈ മാസം 23ന് ചേർന്ന യോഗത്തെ തുടർന്ന് ഇന്ത്യൻ അത്ലറ്റിക് ഫെഡറേഷന്റെ സെലക്ഷൻ കമ്മിറ്റി മൽസരത്തിൽ പങ്കെടുക്കുന്നവരുടെ പേര് പ്രഖ്യാപിച്ചപ്പോൾ തന്റെ പേര് ഇല്ലായിരുന്നുവെന്നും ചിത്ര ഹരജിയിൽ പറയുന്നു. ഹരജിയില്‍ ഇന്ത്യൻ അത്ലറ്റിക് ഫെഡറേഷനോട് ഹൈക്കോടതി വിശദീകരണം തേടിയിട്ടുണ്ട്.
കൊച്ചി:നടി ആക്രമിക്കപ്പെട്ട കേസുമായി ബന്ധപ്പെട്ട് റിമി ടോമിയെ അന്വേഷണ സംഘം ചോദ്യം ചെയ്തു.നടിയെ ആക്രമിച്ച സംഭവം അറിഞ്ഞത് എപ്പോഴാണെന്നും എങ്ങനെയാണെന്നും പോലീസ് അന്വേഷിച്ചതായാണ് സൂചന.കഴിഞ്ഞ ദിവസമായിരുന്നു ചോദ്യം ചെയ്യൽ.ദിലീപുമായി സാമ്പത്തിക ഇടപാടുകൾ ഉണ്ടോ എന്നും ആരാഞ്ഞു.ദിലീപുമായി അടുത്ത ബന്ധം പുലർത്തുന്ന ഗായികയെ ചോദ്യം ചെയ്യുമെന്ന് നേരത്തെ വാർത്തകളുണ്ടായിരുന്നു.ആക്രമിക്കപ്പെട്ട നടിയും റിമിയുമായി നേരത്തെ സൗഹൃദത്തിലായിരുന്നു.എന്നാൽ പിന്നീട് ഇവർ തമ്മിൽ അകലുകയായിരുന്നു.ഇതിന്റെ കാരണങ്ങളും പോലീസ് അന്വേഷിച്ചതായാണ് സൂചന. അതേസമയം റിമി ടോമിയെ ചോദ്യം ചെയ്തിട്ടില്ലെന്ന് അന്വേഷണ സംഘം വ്യക്തമാക്കി.റിമി ടോമിയോട് ചില കാര്യങ്ങൾ ഫോണിലൂടെ ആരായുക മാത്രമാണ് ചെയ്തതെന്ന് പോലീസ് പറയുന്നു.റിമിയെ ചോദ്യം ചെയ്തിട്ടില്ലെന്നും ചോദ്യം ചെയ്യാൻ ഉദ്ദേശിക്കുന്നില്ലെന്നും പോലീസ് വ്യക്തമാക്കി.
കൊച്ചി:നടി ആക്രമിക്കപ്പെട്ട കേസുമായി ബന്ധപ്പെട്ട് കാവ്യാ മാധവന്റെ അമ്മ ശ്യാമള മാധവനെ പോലീസ് വീണ്ടും ചോദ്യം ചെയ്യുമെന്ന് സൂചന.നേരത്തെ നടത്തിയ ചോദ്യം ചെയ്യലിൽ പൊരുത്തക്കേടുകൾ കണ്ടെത്തിയതിനെ തുടർന്നാണ് വീണ്ടും മൊഴിയെടുക്കാൻ തീരുമാനിച്ചത്.കാവ്യയെ ചോദ്യം ചെയ്തതിനു പിന്നാലെ അമ്മയെയും ചോദ്യം ചെയ്തിരുന്നു.സംഭവത്തിൽ കാവ്യക്ക് കാര്യമായ പങ്കില്ലെന്നാണ് അന്വേഷണ സംഘം സൂചിപ്പിക്കുന്നതെങ്കിലും അമ്മയ്ക്ക് ഇതേപ്പറ്റി അറിയാമെന്നാണ് റിപ്പോർട്. കാക്കനാട്ടെ ലക്ഷ്യ എന്ന വ്യാപാര സ്ഥാപനം കാവ്യാമാധവന്റേതാണെങ്കിലും ഇത് നടത്തുന്നത് ശ്യാമളയാണ്.പൾസർ സുനിയെ കണ്ടിട്ടുണ്ടോ എന്ന ചോദ്യത്തിന് കണ്ടിട്ടില്ല എന്ന മറുപടിയാണ് കിട്ടിയത്.നടിയെ അക്രമിക്കുന്നതിന്റെ ദൃശ്യങ്ങൾ അടങ്ങിയ മെമ്മറി കാർഡ് ലക്ഷ്യയിൽ ഏൽപ്പിച്ചുവെന്നു സുനി പറഞ്ഞിരുന്നു.സുനി ഇവിടെ എത്തിയിരുന്നോ എന്ന് കണ്ടെത്താൻ സി സി ടി വി ദൃശ്യങ്ങൾ പരിശോധനയ്ക്ക് അയച്ചിരിക്കുകയാണ്.ഇതിന്റെ വിശദാംശങ്ങൾ കിട്ടിയില്ലെന്നു പോലീസ് പറഞ്ഞു.
തിരുവനന്തപുരം:കണ്ണൂരിൽ നിന്നും മട്ടന്നൂർ,വീരാജ്പേട്ട വഴി മൈസൂരിലേക്കുള്ള സംസ്ഥാനപാത ദേശീയപാതയായി അംഗീകരിക്കുമെന്ന് കേന്ദ്ര ഗതാഗത മന്ത്രി നിതിൻ ഗഡ്‌കരി മുഖ്യമന്ത്രി പിണറായി വിജയന് ഉറപ്പു നൽകി.കേരളത്തിലെ ദേശീയ പാതകളുടെയും തുറമുഖങ്ങളുടെയും വികസനവുമായി ബന്ധപ്പെട്ട് ഡൽഹിയിൽ നടത്തിയ ചർച്ചയിലാണ് മുഖ്യമന്ത്രി കേരളത്തിന്റെ ദേശീയപാത വികസനം സംബന്ധിച്ച ആവശ്യങ്ങൾ ഉന്നയിച്ചത്.കണ്ണൂർ-മൈസൂർ പാത ദേശീയപാതയായി തത്വത്തിൽ അംഗീകരിക്കുകയാണെന്നും ബാക്കി നടപടിക്രമങ്ങൾ ഉടൻ പൂർത്തിയാക്കുമെന്നും അറിയിച്ചു.കാലവർഷത്തിൽ നശിച്ച റോഡുകൾ പുനര്നിര്മിക്കുന്നതിനു കേരളം ആവശ്യപെട്ട 400 കോടി രൂപ അനുവദിക്കും.ഇതിൽ 180 കോടി രൂപ അടിയന്തിരമായി അനുവദിച്ചു.പണം ചിലവഴിച്ചതിന്റെ കണക്കും രേഖകളും സമർപ്പിക്കുന്ന മുറയ്ക്ക് കൂടുതൽ തുക അനുവദിക്കും.
പട്ന:ബിജെപിക്കെതിരായ പ്രതിപക്ഷ ഐക്യത്തിന്റെ പ്രതീകമായി ഉയർന്നുവന്ന ബീഹാറിലെ മഹാസഖ്യം തകർന്നു.സഖ്യവുമായി മുന്നോട്ടു പോകാനാവില്ലെന്നും രാജി വെക്കുകയാണെന്നും നിതീഷ് കുമാർ പ്രഖ്യാപിച്ചു.തൊട്ടുപിന്നാലെ നിതീഷ് കുമാറിന് പിന്തുണയുമായി ബിജെപി എത്തി.ഇന്ന് രാവിലെ പത്തിന് പുതിയ സർക്കാർ സത്യപ്രതിജ്ഞ ചെയ്യും.ബുധനാഴ്ച രാത്രി ചേർന്ന ബിജെപി സംസ്ഥാന നേതാക്കളുടെ യോഗത്തിലാണ് ഇത് സംബന്ധിച്ചുള്ള തീരുമാനം ഉണ്ടായത്.ഇക്കാര്യം ബിജെപി യുടെ മുതിർന്ന നേതാവ് സുശീൽ കുമാർ മോഡി നിതീഷ് കുമാറിനെ അറിയിച്ചു.വ്യഴാഴ്ച പുലർച്ചെ ജെഡിയു,ബിജെപി നേതാക്കൾ ഗവർണറെ കണ്ടു 132 എം എൽ എ മാരുടെ പിന്തുണ അറിയിച്ചു.തുടർന്ന് പുറത്തെത്തിയ സുശീൽ കുമാർ രാവിലെ പത്തു മണിക്ക് സത്യപ്രതിജ്ഞ നടക്കുമെന്ന് അറിയിക്കുകയായിരുന്നു.സി.ബി.ഐ രജിസ്റ്റർ ചെയ്ത അഴിമതി കേസിൽ പ്രതിയായ ഉപമുഖ്യമന്ത്രി തേജസ്വി യാദവ് രാജി വെക്കണമെന്ന നിലപാട് സഖ്യ കക്ഷിയായ ആർ ജെ ഡി പരസ്യമായി തള്ളിയതിന് തൊട്ടു പിന്നാലെ നിതീഷ് കുമാർ തന്റെ രാജി പ്രഖ്യാപിക്കുകയായിരുന്നു.ആർ.ജെ.ഡി അധ്യക്ഷൻ ലാലു പ്രസാദ് യാദവിന്റെ മകനാണ് തേജസ്വി.അഴിമതിക്കെതിരായ ഉറച്ച പോരാട്ടത്തിന് നിതീഷിനെ അഭിനന്ദിക്കുന്നുവെന്നു പ്രധാനമന്ത്രി നരേന്ദ്ര മോഡി ട്വിറ്ററിൽ കുറിച്ചു.
ന്യൂഡൽഹി:ദൂരദർശൻ 1959 മുതൽ ഉപയോഗിക്കുന്ന ലോഗോയിൽ മാറ്റം വരുത്തുന്നു.കൂടുതൽ ആകർഷകമായ രീതിയിലേക്ക് ചാനലിന്റെ അവതരണം കൊണ്ട് വരുന്നതിന്റെ ഭാഗമായാണ് ലോഗോയിൽ മാറ്റം വരുത്തുന്നത്.ഇതിനായി ലോഗോ മൽസരവും നടത്തുന്നുണ്ട്.മികച്ച ലോഗോ ഡിസൈനർക്കു ഒരു ലക്ഷം രൂപയാണ് സമ്മാനം.ഒരേ സമയം പുതിയകാലത്തെ അഭിലാഷങ്ങളും ഗൃഹാതുരത്വവും പ്രകടിപ്പിക്കുന്ന രീതിയിലായിരിക്കണം ലോഗോ ഡിസൈൻ ചെയ്യേണ്ടത്.ഓഗസ്റ്റ് 15 നു മുൻപ് പുതിയ ഡിസൈനുകൾ സമർപ്പിക്കേണ്ടതാണെന്നും പുതിയ തലമുറയെ ആകർഷിക്കുവാൻ ഇനിയും മാറ്റങ്ങൾ ആവിഷ്‌ക്കരിക്കുമെന്നും ദൂരദർശൻ സിഇഒ ശശി എസ് വെമ്പട്ടി പറഞ്ഞു.
ബീഹാർ:ബീഹാർ മുഖ്യമന്ത്രി നിതീഷ് കുമാർ രാജിവെച്ചു.ഗവർണർക്കു രാജിക്കത്ത് കൈമാറി.ഉപമുഖ്യമന്ത്രി തേജസ്വി യാദവ് രാജി വയ്ക്കാത്ത പശ്ചാത്തലത്തിലാണ് നിതീഷ് കുമാറിന്റെ രാജി.ഇതോടെ മഹാസഖ്യം തകർച്ചയിലേക്ക്.അഴിമതി ആരോപണം നേരിടുന്ന തേജസ്വി 72 മണിക്കൂറിനുള്ളിൽ രാജിവെക്കണമെന്ന് നിതീഷ് കുമാർ ആവശ്യപ്പെട്ടിരുന്നു.ഇത് തേജസ്വി യാദവ് നിരസിച്ചു.ഇതാണ് നിതീഷിന്റെ രാജിയിലേക്കു നയിച്ചത്.