News Desk

കൊച്ചി:കൊച്ചിയിൽ നടി ആക്രമിക്കപ്പെട്ട കേസിൽ നടനും അമ്മയുടെ വൈസ് പ്രെസിഡന്റുമായ ഇടവേള ബാബയുവിന്റെ മൊഴിയെടുക്കൽ പൂർത്തിയായി.ആലുവ പോലീസ് ക്ലബ്ബിൽ വെച്ച് ഒന്നര മണിക്കൂർ നീണ്ട മൊഴിയെടുപ്പാണ് പോലീസ് നടത്തിയത്.അമ്മയുടെ താരനിശയുടെ റിഹേഴ്‌സൽ സമയത്തെ കാര്യങ്ങൾ ചോദിച്ചു.ഇതിന്റെ ചില രേഖകൾ പൊലീസിന് കൈമാറിയതായും എല്ലാ കാര്യങ്ങളും പോലീസ് ചോദിച്ചറിഞ്ഞതായും മൊഴി നൽകി പുറത്തു വന്ന ശേഷം ഇടവേള ബാബു മാധ്യമങ്ങളെ അറിയിച്ചു.2013 ഇൽ അമ്മയുടെ താരനിശയുമായി ബന്ധപ്പെട്ട പരിപാടിക്കിടെ ഹോട്ടൽ മുറിയിൽ വെച്ച് ദിലീപ് കേസിലെ മുഖ്യപ്രതിയായ സുനിയുമായി കൂടിക്കാഴ്ച നടത്തി എന്ന പോലീസിന്റെ കണ്ടെത്തലിന്റെ പശ്ചാത്തലത്തിലാണ് ഇടവേള ബാബുവിനെ വിളിപ്പിച്ചത്.ഹോട്ടലിൽ വെച്ച് നടിയും ദിലീപുമായി ഉണ്ടായ തർക്കത്തെ കുറിച്ചും പോലീസ് ചോദിച്ചറിഞ്ഞു എന്നാണ് സൂചന.

കണ്ണൂർ:രമ്യ വധക്കേസിൽ ഭർത്താവിന് ജീവപര്യന്തം,ഭർത്തൃമാതാവിന് രണ്ടു വർഷം കഠിന തടവും കോടതി വിധിച്ചു.കാട്ടാമ്പള്ളി സ്വദേശി രമ്യയെ പയ്യന്നൂരിലെ ലോഡ്ജിൽ മരിച്ച നിലയിൽ കണ്ടെത്തിയ കേസിലാണ് രമ്യയുടെ ഭർത്താവു ഷമ്മികുമാറിന് ജീവപര്യന്തവും മൂന്നു ലക്ഷം രൂപ പിഴയും ഭർത്തൃമാതാവ് പാർവതിക്ക് രണ്ടു വർഷം കഠിന തടവും തലശ്ശേരി കോടതി വിധിച്ചത്.ഭർതൃ സഹോദരൻ ലതീഷ് കുമാറിനെ പ്രതിയല്ലെന്നു കണ്ട് വിട്ടയച്ചു.

കൊല്ലം:പത്തനാപുരത്ത് പെൺകുട്ടിയെ കിടപ്പുമുറിയിൽ മരിച്ച നിലയിൽ കണ്ടെത്തി.പിറവന്തൂർ വെട്ടിത്തിട്ട നല്ലകുളം കരിമൂട്ടിൽ ബിജു-ബീന ദമ്പതികളുടെ മകൾ റിന്സിയെയാണ് വീട്ടിനുള്ളിലെ കിടപ്പുമുറിയിൽ മരിച്ചനിലയിൽ കണ്ടെത്തിയത്.ഇന്ന് രാവിലെ ഏഴു മണിയോടെ അമ്മ ബിന്ദുവാണ്  റിൻസിയുടെ മൃതദേഹം ആദ്യം കണ്ടത്.പെൺകുട്ടിയുടെ ശരീരത്തിൽ മുറിവേറ്റ പാടുകളുണ്ടെന്നു പോലീസിന്റെ പ്രാഥമിക പരിശോധനയിൽ വ്യക്തമായിട്ടുണ്ട്.റിൻസിയുടെ കഴുത്തിലും ശരീരത്തിന്റെ മറ്റു ചില ഭാഗങ്ങളിലുമാണ് മുറിവേറ്റ അടയാളങ്ങൾ കണ്ടെത്തിയിരിക്കുന്നത്.പോസ്റ്റ്‌മോർട്ടത്തിനു ശേഷം മാത്രമേ കൂടുതൽ വിവരങ്ങൾ ലഭിക്കുകയുള്ളൂ എന്നാണ് പോലീസ് ഉദ്യോഗസ്ഥർ അറിയിച്ചത്.മരിച്ച റിൻസിയുടെ കിടപ്പുമുറിക്കു രണ്ടു വാതിലുകളാണ് ഉള്ളത്.ഇതിൽ ഒരെണ്ണം പുറത്തേക്കു തുറക്കുന്ന വാതിലാണ്.ഈ വാതിൽ തുറന്നു കിടക്കുന്നതു ശ്രദ്ധയിൽപെട്ട അമ്മ ബീന സംശയം തോന്നി കിടപ്പുമുറിയിൽ എത്തിയപ്പോഴാണ് റിൻസിയെ മരിച്ച നിലയിൽ കണ്ടെത്തിയത്.കലഞ്ഞൂർ ഗവണ്മെന്റ് ഹയർ സെക്കണ്ടറി സ്കൂളിലെ പ്ലസ് വൺ വിദ്യാർത്ഥിനിയാണ് റിൻസി.ആൻസി ഏക സഹോദരിയാണ്.സംഭവത്തിൽ പുനലൂർ പോലീസ് കേസെടുത്തു അന്വേഷണം ആരംഭിച്ചിട്ടുണ്ട്.
.   .