ജിദ്ദ:സൗദി അറേബ്യൻ നഗരമായ മക്കയിലെ ഹോട്ടലിൽ വൻ തീപിടുത്തം.ഹജ്ജിനെത്തിയ തീർത്ഥാടകർ താമസിച്ചിരുന്ന ഹോട്ടലിലാണ് തീപിടുത്തം ഉണ്ടായത്.ഇതേ തുടർന്ന് 600 തീർത്ഥാടകരെ ഒഴിപ്പിച്ചു.സംഭവത്തിൽ ആളപായമുണ്ടായതായി റിപ്പോർട് ചെയ്തിട്ടില്ല.15 നില കെട്ടിടത്തിന്റെ എട്ടാം നിലയിലെ എയർ കണ്ടീഷനിൽ നിന്ന് തീ പടർന്നാണ് അപകടമുണ്ടായതെന്ന് മക്കയിലുള്ള സൗദി സിവിൽ ഡിഫെൻസ് ജനറൽ ഡിപ്പാർട്മെന്റ് വക്താവ് മേജർ നായിഫ് അൽ ശരീഫ് അറിയിച്ചു.തീ ഇതിനോടകം തന്നെ നിയന്ത്രണ വിധേയമാക്കിയിട്ടുണ്ട്.സുരക്ഷാ മുൻകരുതലെന്ന നിലയിലാണ് തീർത്ഥാടകരെ ഒഴിപ്പിച്ചത്.സംഭവത്തെ കുറിച്ച് വിശദമായ പരിശോധന നടത്തി അന്വേഷണ റിപ്പോർട്ട് സമർപ്പിച്ച ശേഷം തീർത്ഥാടകരെ തിരികെ പ്രവേശിപ്പിക്കുമെന്നും അദ്ദേഹം പറഞ്ഞു.
