News Desk

തൃശൂർ: ഗുരുവായൂരിലെ ലോഡ്ജ്മുറിയിൽ കൂട്ട ആത്മഹത്യയ്ക്കു ശ്രമിച്ച നാലംഗ കുടുബത്തിലെ കുട്ടി മരിച്ചു. മലപ്പുറം ചേറങ്കോട് കാറുമല വീട്ടിൽ സുനിലിന്‍റെ മകൻ ആകാശ് (മൂന്ന്) ആണ് മരിച്ചത്. വ്യാഴാഴ്ച പുലർച്ചെ രണ്ടിനാണ് സുനിൽ(36), ഭാര്യ സുജാത, മക്കളായ ആകാശ്, അമൽ (ആറ്) എന്നിവരടങ്ങുന്ന കുടുംബം പടിഞ്ഞാറേ നടയിലെ ലോഡ്ജിൽ മുറിയെടുത്തത്. തുടർന്ന് ക്ഷേത്ര ദർശനം നടത്തിയ ശേഷമാണ് കുടുംബം ആത്മഹത്യയ്ക്ക് ശ്രമിച്ചത്.ഉച്ചയോടെ ലോഡ്ജിൽ മടങ്ങിയെത്തി പാൽപായസത്തിൽ എലിവിഷം കലർത്തി കഴിക്കുകയായിരുന്നു. വിഷം അകത്തു ചെന്ന് കുട്ടികൾ അവശനിലയിലോടെ ഇവർ ദേവസ്വം ആശുപത്രിയിൽ ചികിത്സ തേടിയെത്തി. ഭക്ഷ്യവിഷബാധയാണെന്നാണ് ആശുപത്രിയിൽ പറഞ്ഞത്. പിന്നീട് മെഡിക്കൽ കോളജിലേക്ക് കൊണ്ടുപോയെങ്കിലും ഇന്നുപുലർച്ചെ ആകാശ് മരിക്കുകയായിരുന്നു. ചികിത്സയിലുള്ള അമലിന്‍റെ നിലയും ഗുരുതരമാണ്.റബർ ടാപ്പിംഗ് തൊഴിലാളിയായ സുനിൽ കടുത്ത സാന്പത്തിക പ്രതിസന്ധിയിലായിരുന്നെന്ന് പറയുന്നു. ഗുരുവായൂർ ടെന്പിൾ പോലീസ് കേസെടുത്ത് അന്വേഷണം തുടരുകയാണ്.

കണ്ണൂർ:പൊന്നോണത്തിന്റെ വരവറിയിച്ച് ഇന്ന് അത്തം.പൂവിളികളും ഓണപ്പാട്ടുകളുമായി ഇനി മലയാളികൾക്ക് ഓണക്കാലം.മലയാളികളുടെ വസന്ത കാലമാണ് ഓണക്കാലം.പൂവിളികളും ഓണത്തുമ്പിയും,ഊഞ്ഞാലാട്ടവും,പുലികളികളും സദ്യവട്ടവുമായി ഇനി പത്തുനാളുകൾ സന്തോഷത്തിന്റെ ഉത്സവ ദിനങ്ങൾ.അത്തം കഴിഞ്ഞ് പതിനൊന്നിനാണ് തിരുവോണം.പൂരാടം രണ്ടു ദിവസങ്ങളിലായതു കൊണ്ടാണ് ഇങ്ങനെ സംഭവിച്ചിരിക്കുന്നത്.പൂക്കളമിടലാണ് ഇനി കുട്ടികളുടെ പ്രധാന വിനോദം.വീട്ടു മുറ്റങ്ങളിൽ  നിന്നും വിദ്യാലയങ്ങൾ,സർക്കാർ ഓഫീസുകൾ , സ്വകാര്യ സ്ഥാപനങ്ങൾ ,തുടങ്ങി പൊതു നിരത്തുകൾ വരെ പൂക്കളങ്ങൾക്ക് വേദിയാകുന്നു. ചരിത്ര പ്രസിദ്ധമായ തൃപ്പൂണിത്തുറ അത്തം ഘോഷയാത്ര ഇന്ന് നടക്കും. വിളവെടുപ്പ് ഉത്സവത്തിന്റെ മുന്നോടൊയായി കൊച്ചി രാജാവ് തൃക്കാക്കര വാമന മൂർത്തിയെ ദർശിക്കൻ പോകുന്ന ചടങ്ങായിരുന്നു ഘോഷയാത്ര.പരിവാര സമേതം പല്ലക്കിൽ പോകുന്ന രാജാവിനെ കാണാൻ ഹിൽപാലസ് കൊട്ടാരം മുതൽ തൃക്കാക്കര വരെയുള്ള പാതയോരങ്ങളിൽ ജനങ്ങൾ കാത്തു നിൽക്കുമായിരുന്നു.അതിന്റെ ഓർമയാണ് ഇന്നും നടക്കുന്ന അത്തം ഘോഷയാത്ര.

മയ്യിൽ:ആഡംബര കാറിൽ കഞ്ചാവ് കടത്തിയ രണ്ടു വിദ്യാർത്ഥികളെ പോലീസ് അറസ്റ്റ് ചെയ്തു.50 ഗ്രാം കഞ്ചാവ് ഇവരിൽ നിന്നും പിടിച്ചെടുത്തു.കയരളം മൊട്ടയിലെ തമീം(21),പെരുമാച്ചേരിയിലെ നബീൽ(18) എന്നിവരെയാണ്  ശ്രീകണ്ഠപുരം എക്‌സൈസ് ഇൻസ്പെക്റ്റർ പി.പി ജനാർദനനും സംഘവും അറസ്റ്റ് ചെയ്തത്.വിദ്യാർഥികൾ ഓടിച്ചുപോകുന്ന ആഡംബര കാർ  പിന്തുടർന്ന് ചോദ്യം ചെയ്തപ്പോഴാണ് കഞ്ചാവ് കടത്തുന്ന വിവരം ലഭിച്ചത്.സ്ഥിരമായി കഞ്ചാവ് ഉപയോഗിക്കുന്ന ഇവർ മറ്റു കുട്ടികൾക്ക് എത്തിച്ചു കൊടുത്ത് ആഡംബര ജീവിതം നയിക്കുന്നവരാണ്.തിരുവനന്തപുരം രെജിസ്ട്രേഷനിലുള്ള കാറിന്റെ വിവിധ അറകളിൽ പല പൊതികളിലായി സൂക്ഷിച്ച നിലയിലായിരുന്നു കഞ്ചാവ് കണ്ടെത്തിയത്.

തലശ്ശേരി:ധർമടം കോളാട് പാലത്തിനു സമീപം ചെമ്മീൻ ഷെഡിൽ നിന്നും അരലക്ഷം രൂപയുടെ കള്ളനോട്ടുകൾ പിടികൂടി.രണ്ടായിരത്തിൻറെ 25 കള്ളനോട്ടുകളാണ് പിടികൂടിയത്. ചെമ്മീൻകെട്ടിലെ തൊഴിലാളി ആസാം സ്വദേശി ജിയറുൽ ഹക്ക് ആണ് നോട്ടുകൾ ഒളിപ്പിച്ചുവെച്ചത്. എൻ.ഐ എ  നൽകിയ വിവരത്തിന്റെ അടിസ്ഥാനത്തിൽ പെരുമ്പാവൂർ പോലീസ് ഒരാളെ അറസ്റ്റ് ചെയ്തിരുന്നു.ഇയാളിൽ നിന്നും 16,000 രൂപയുടെ കള്ളനോട്ട് പോലീസ് പിടിച്ചെടുത്തു.ഇയാളെ ചോദ്യം ചെയ്തപ്പോൾ കിട്ടിയ വിവരത്തിന്റെ അടിസ്ഥാനത്തിലാണ് ജിയാരുൾ  ഹക്കിനെ പോലീസ് അറസ്റ്റ് ചെയ്തത്.ധർമ്മടത്തെ ചെമ്മീൻകെട്ടിൽ തൊഴിലാളികൾ താമസിക്കുന്ന ഷെഡിൽ 50,000 രൂപയുടെ കള്ളനോട്ടുകൾ ഒളിപ്പിച്ചിട്ടുണ്ടെന്ന ഇയാളുടെ മൊഴിയെ തുടർന്നാണ് പെരുമ്പാവൂർ പോലീസ് ഇയാളെയും കൂട്ടി ധർമ്മടത്തെത്തിയത്.ധർമടം എസ്.ഐ വി.വി ശ്രീജേഷിന്റെ നേതൃത്വത്തിൽ പെരുമ്പാവൂർ പോലീസും ചേർന്ന് നടത്തിയ അന്വേഷണത്തിലാണ് ചെമ്മീൻകെട്ടിൽ നിന്നും തുണിയിൽ പൊതിഞ്ഞ നിലയിൽ നോട്ടുകൾ കണ്ടെത്തിയത്..എട്ട് വർഷമായി സംസ്ഥാനത്തുള്ള ഇയാൾ നിരവധി സ്ഥലങ്ങളിൽ കള്ളനോട്ട് വിതരണം ചെയ്തിട്ടുണ്ടെന്നാണ് പോലീസ് പറയുന്നത്.അസമിൽ നിന്നാണ് ഇയാൾക്ക് കള്ളനോട്ടു ലഭിക്കുന്നതെന്ന്‌ ഇയാൾ പോലീസിനോട് പറഞ്ഞു.ഒരുലക്ഷം രൂപയുടെ കള്ളനോട്ടിന് അൻപതിനായിരം രൂപയാണ് നൽകേണ്ടതെന്നും ഇയാൾ പറഞ്ഞു.

തിരുവനന്തപുരം: ആരോഗ്യമന്ത്രി കെ.കെ. ശൈലജ രാജിവയ്ക്കണമെന്നാവശ്യപ്പെട്ട് നിയമസഭാ കവാടത്തിൽ പ്രതിപക്ഷ എംഎൽഎമാർ നടത്തിവന്ന സത്യഗ്രഹ സമരം അവസാനിപ്പിച്ചു. ബാലാവകാശ കമ്മീഷൻ നിയമനത്തിൽ മന്ത്രിക്കെതിരെയുള്ള പരാമർശങ്ങൾ ഹൈക്കോടതി ഡിവിഷൻ ബെഞ്ച് നീക്കിയതിന് പിന്നാലെയാണ് പ്രതിപക്ഷ എംഎൽഎമാർ സത്യഗ്രഹ സമരം അവസാനിപ്പിച്ചത്.ആരോഗ്യമന്ത്രിക്കെതിരായ പ്രതിഷേധം പൊതു സമൂഹത്തിന്‍റെ പിന്തുണയോടെ തുടരുമെന്നും പ്രതിപക്ഷ നേതാവ് രമേശ് ചെന്നിത്തല പറഞ്ഞു.