News Desk

പാലക്കാട്:തമിഴ്‌നാട്ടിലെ ദിണ്ടിക്കലിൽ നിന്നും കേരളത്തിലെ വിവിധ ഭാഗങ്ങളിൽ വിതരണത്തിനായി കൊണ്ടുവന്ന പായ്ക്കറ്റ് പാലിൽ ഹൈഡ്രജൻ പെറോക്‌സൈഡിന്റെ അംശം കണ്ടെത്തി.ക്ഷീര വികസന വകുപ്പിന്റെ മീനാക്ഷിപുരത്തെ സ്ഥിരം പാൽ പരിശോധനാകേന്ദ്രത്തിൽ ചൊവ്വാഴ്ച വൈകുന്നേരം എത്തിയ പാൽവണ്ടിയിലെ കവറുകളിലാണ് ഹൈഡ്രജൻ പെറോക്‌സൈഡിന്റെ അംശം കണ്ടെത്തിയത്. ഇതിൽ മലബാർ മിൽക്ക് എന്ന പേരിലുള്ളതായിരുന്നു കവറുകൾ.മുറിവുകൾ ക്‌ളീൻ ചെയ്യാനും മൗത് വാഷിന്റെ ഘടകമായും ഹൈഡ്രജൻ പെറോക്‌സൈഡ് ഉപയോഗിക്കാറുണ്ട്.ഇത് പാലിൽ ചേർക്കാൻ അനുവാദമില്ലാത്ത രാസപദാർത്ഥമാണ്.ടോൺഡ് മിൽക്ക്,ഡബിൾ ടോൺഡ് മിൽക്ക് എന്നിവയുടെ പായ്ക്കറ്റുകളിലാണ് ഹൈഡ്രജൻ പെറോക്‌സൈഡിന്റെ അംശമുള്ളതായി പരിശോധനയിൽ തെളിഞ്ഞത്.ഇതുകൂടാതെ കൗമിൽക്,ഫുൾ ക്രീം മിൽക്ക് എന്നിവയുടെ പായ്‌ക്കറ്റുകളും ലോറിയിൽ ഉണ്ടായിരുന്നെങ്കിലും അവയിൽ ഇത് കണ്ടെത്തിയിരുന്നില്ല.ഡിണ്ടിക്കൽ എ.ആർ ഡയറി ഫുഡ്സ് പ്രൈവറ്റ് ലിമിറ്റഡ് എന്ന സ്ഥാപനത്തിന്റെ പേരിലാണ് വണ്ടി എത്തിയിരുന്നതെന്നു അധികൃതർ പറഞ്ഞു.പരിശോധനയെ തുടർന്ന് പാലും വണ്ടിയും ഭക്ഷ്യസുരക്ഷാ വകുപ്പിനെ ഏൽപ്പിച്ചു.വണ്ടി കേരളത്തിനകത്തേക്ക് കടത്തി വിടാതെ തിരിച്ചയക്കുമെന്നു അധികൃതർ അറിയിച്ചു.

തിരുവനന്തപുരം: പത്മനാഭസ്വാമി ക്ഷേത്രത്തിലെ ബി നിലവറ തുറക്കാൻ പാടില്ലെന്ന നിലപാടിലുറച്ച് രാജകുടുംബം. നിലവറതുറക്കാൻ തന്ത്രിമാർ തീരുമാനിച്ചാൽ നടപടികളോട് സഹകരിക്കില്ലെന്ന് അശ്വതി തിരുന്നാൾ ഗൗരിലക്ഷമിഭായ് പറഞ്ഞു. അതേസമയം സുപ്രീംകോടതി നിയോഗിച്ച അമിക്കസ് ക്യൂറി ഗോപാൽ സുബ്രഹ്മണ്യം മുഖ്യമന്ത്രി പിണറായി വിജയനുമായും രാജകുടുംബാംഗങ്ങളുമായും കൂടിക്കാഴ്ച നടത്തും.ബി നിലവറ തുറക്കുന്നതു സംബന്ധിച്ച് സമവായം ഉണ്ടാക്കാനാണ് ഗോപാൽ സുബ്രഹ്മണ്യത്തിന്‍റെ ശ്രമം. ക്ഷേത്രത്തിലെ മൂലവിഗ്രഹ പരിശോധന നിരീക്ഷിക്കാനാണ് എത്തിയതെന്ന് ഗോപാൽ സുബ്രഹ്മണ്യം പറഞ്ഞു.പത്മനാഭസ്വാമി ക്ഷേത്രത്തിലെ ബി നിലവറ തുറക്കണമെന്നായിരുന്നു സുപ്രീംകോടതി നേരത്തെ നടത്തിയ നിരീക്ഷണം. എന്നാൽ, ബി നിലവറ തുറക്കുന്നത് വലിയ പ്രത്യാഘാതങ്ങൾക്ക് ഇടയാക്കുമെന്നും, നിലവറ തുറക്കുന്നത് ഉചിതമാകില്ലെന്നുമായിരുന്നു രാജകുടുംബത്തിന്‍റെ വാദം.

മലപ്പുറം: ചലച്ചിത്ര താരം ബിജുമേനോൻ സഞ്ചരിച്ചിരുന്ന കാർ അപകടത്തിൽപെട്ടു. വളാഞ്ചേരിക്ക് സമീപം വട്ടപ്പാറയിൽ കഴിഞ്ഞ രാത്രിയാണ് അപകടമുണ്ടായത്. അപകടത്തിൽ വാഹനത്തിന് കേടുപാടുകൾ പറ്റിയെങ്കിലും ബിജുമേനോൻ പരിക്കേൽക്കാതെ രക്ഷപ്പെട്ടു.തൃശൂർ ഭാഗത്തുനിന്ന് കോഴിക്കോട് ഭാഗത്തേക്ക് പോവുകയായിരുന്ന കാർ നിയന്ത്രണം വിട്ട് ബിജുമേനോൻ സഞ്ചരിച്ച കാറിലും നിയന്ത്രണം വിട്ട് മറ്റൊരു കാറിലും ഇടിക്കുകയായിരുന്നു. വളാഞ്ചേരി പോലീസും ഹൈവേ പോലീസും ചേർന്ന് വാഹനങ്ങൾ നീക്കം ചെയ്ത് ഗതാഗതം പുനസ്ഥാപിച്ചു. രാത്രി ഏറെ വൈകി ബിജുമേനോൻ മറ്റൊരു കാറിൽ വീണ്ടും യാത്ര തിരിച്ചു.