News Desk

കൊച്ചി:ആക്രമിക്കപ്പെട്ട നടിയുടെ പേര് വെളിപ്പെടുത്തിയതിന് കമൽഹാസൻ,മഞ്ജു വാര്യർ,റിമ കല്ലിങ്കൽ,ആസിഫ് അലി,ഷംസീർ എംഎൽഎ തുടങ്ങിയവർക്കെതിരെ കേസെടുക്കണമെന്ന് പരാതി.പി.സി ജോർജിന്റെ നേതൃത്വത്തിലുള്ള സംഘടനയായ യുവജനപക്ഷമാണ് ഇത് സംബന്ധിച്ച് നെടുമ്പാശ്ശേരി പോലീസിൽ പരാതി നൽകിയിരിക്കുന്നത്.നടിയുടെ പേര് വെളിപ്പെടുത്തിയതിന് അജു വര്ഗീസ്,പി.സി ജോർജ് എന്നിവർക്കെതിരെ നേരത്തെ കേസെടുത്തിരുന്നു.

തൃശൂർ:ചാലക്കുടിയിൽ ലോറിക്ക് പിന്നിൽ കാറിടിച്ച് രണ്ടു വിദ്യാർഥികൾ മരിച്ചു.പുലർച്ചെ ഒരുമണിയോടെ ദേശീയപാതയിൽ ചാലക്കുടി ഹൈവേയിലായിരുന്നു അപകടം.കാക്കനാട്  രാജഗിരി കോളേജിലെ ഒന്നാം വർഷ എം ബി എ വിദ്യാർത്ഥികളായ ബിമൽ സെബാസ്റ്റ്യൻ(23),ക്രിസ്റ്റി മാത്യു ഫിലിപ്പ്(24) എന്നിവരാണ് മരിച്ചത്.ഗുരുതരമായി പരിക്കേറ്റ ബ്ലെൻസൻ.പി.വർഗീസ്(26) നെ എറണാകുളം രാജഗിരി ആശുപത്രിയിൽ പ്രവേശിപ്പിച്ചു.കാലിക്കറ്റ് സർവകലാശാല ഫെസ്റ്റിവലിൽ പങ്കെടുത്ത ശേഷം മടങ്ങവെയാണ് കാർ ലോറിക്ക് പിന്നിലിടിച്ചത്.

മലപ്പുറം:വേങ്ങര ഉപതിരഞ്ഞെടുപ്പിൽ കെ.ജനചന്ദ്രൻ ബിജെപി സ്ഥാനാർത്ഥിയാകും.പാർട്ടി ദേശീയ കൗൺസിൽ അംഗമായ ഇദ്ദേഹം ബിജെപി മുൻ ജില്ലാ പ്രസിഡന്റ് കൂടിയാണ്. സ്ഥാനാർത്ഥിയായി ശോഭ സുരേന്ദ്രന്റെ പേരും ഉയർന്നു വന്നിരുന്നുവെങ്കിലും അവർ താൽപ്പര്യമില്ലെന്ന് അറിയിക്കുകയായിരുന്നു.

കോഴിക്കോട്:ഒരു മലയാളി കൂടി ഐ എസ്സിൽ ചേർന്നതായി സ്ഥിതീകരണം.മലപ്പുറത്തു നിന്നും കാണാതായ നജീബ് എന്ന യുവാവാണ് ഇസ്ലാമിക് സ്റ്റേറ്റിലെത്തിയതായി തന്റെ മാതാവിന് സന്ദേശം അയച്ചിരിക്കുന്നത്.ഇനി തന്നെ കാത്തിരിക്കേണ്ടെന്നും താൻ ലക്ഷ്യസ്ഥാനത്ത് എത്തിയെന്നും ടെലിഗ്രാം ആപ്പ് വഴി അയച്ച സന്ദേശത്തിൽ പറയുന്നു.താൻ അയച്ച സന്ദേശം പോലീസിന് നൽകരുതെന്നും സന്ദേശത്തിൽ വ്യക്തമാക്കിയിട്ടുണ്ട്. ഇത് താൻ അവസാനമായി അയക്കുന്ന സന്ദേശമാണെന്നും പോലീസിനെ അറിയിച്ചാൽ നിങ്ങൾക്ക് തന്നെയാണ് കുഴപ്പമെന്നും മെസേജിൽ പറയുന്നു.എന്നാൽ തങ്ങൾ ഇന്ത്യക്കാരാണെന്നും ഇവിടെ ജീവിക്കാനാണ് ഇഷ്ട്ടപ്പെടുന്നതെന്നും പലായനം ചെയ്യാൻ ആവശ്യപ്പെട്ട നജീബിന് മാതാവ് മറുപടി നൽകി. കഴിഞ്ഞ മാസം ഇരുപത്തിയാറാം തീയതിയാണ് ഇയാൾ രാജ്യം വിട്ടത്.നജീബിന്റെ തിരോധാനത്തെ കുറിച്ച് എൻഐഎ അന്വേഷിച്ചു വരികയാണ്.