News Desk

ഇരിട്ടി:പായം പഞ്ചായത്തിലെ മട്ടിണി,ഉദയഗിരി,കേളൻ പീടിക എന്നിവിടങ്ങളിൽ സിപിഎം-ആർഎസ്എസ് അക്രമം.കഴിഞ്ഞ ദിവസം രാത്രിയാണ് അക്രമം നടന്നത്.പാർട്ടി ഓഫീസുകളും കൊടിമരവും തകർത്തു.ബോംബേറും ഉണ്ടായി.മട്ടിണിയിൽ ആർഎസ്എസ് കാര്യാലയത്തിന് തീയിട്ടു.ഓഫീസിനു മുൻപിലെ കൊടിമരവും നശിപ്പിച്ചു.കുന്നോത്ത് കേളൻപീടികയിൽ ബിജെപി പ്രവർത്തകൻ രാജേഷിന്റെ ഫർണിച്ചർ കടയ്ക്ക് നേരെയും അക്രമം ഉണ്ടായി.വിളമന ഉദയഗിരിയിൽ സിപിഎമ്മിന്റെ കൊടിമരം തകർക്കുകയും ബോർഡുകൾ നശിപ്പിക്കുകയും ചെയ്തു.ഈ പ്രദേശത്ത് മൂന്നു സ്ഥലങ്ങളിൽ ബോംബേറുണ്ടായി.ഉദയഗിരി റോഡിൽ റോഡിൽ ബോംബ് വീണുപൊട്ടി റോഡിൽ കുഴി രൂപം കൊണ്ടു.രാത്രി 10.30 ഓടെ മുഖംമൂടി ധരിച്ചെത്തിയ സംഘമാണ് അക്രമം നടത്തിയതെന്ന് നാട്ടുകാർ പറഞ്ഞു.അക്രമത്തിനു പിന്നിൽ സിപിഎം ആണെന്ന് ആർഎസ്എസ് വിഭാഗ് സമ്പർക്ക പ്രമുഖ സജീവൻ ആറളം പറഞ്ഞു.എന്നാൽ സമാധാനാന്തരീക്ഷം നിലനിൽക്കുന്ന പ്രദേശത്ത് ആർഎസ്എസ് അക്രമം അഴിച്ചു വിടുകയാണെന്ന് സിപിഎം ഇരിട്ടി ഏരിയ സെക്രെട്ടറി ബിനോയ് കുര്യൻ പ്രസ്താവനയിൽ പറഞ്ഞു.

കൊച്ചി:നടി ആക്രമിക്കപ്പെട്ട കേസുമായി ബന്ധപ്പെട്ട് കാവ്യാ മാധവൻ സമർപ്പിച്ച മുൻകൂർ ജാമ്യാപേക്ഷയിൽ ഹൈക്കോടതി തീർപ്പാക്കി.കാവ്യയുടെ അറസ്റ്റിനു സാധ്യതയില്ലാത്തതിനാൽ മുൻ‌കൂർ ജാമ്യാപേക്ഷയ്ക്ക് പ്രസക്തിയില്ലെന്ന് കോടതി വ്യക്തമാക്കി.കേസിൽ കാവ്യയെ പ്രതി ചേർത്തിട്ടില്ലെന്ന് പോലീസ് കോടതിയെ അറിയിച്ചു.അതേസമയം നാദിർഷായുടെ മുൻ‌കൂർ ജാമ്യാപേക്ഷ പരിഗണിക്കുന്നത് ഒക്ടോബർ നാലിലേക്ക് മാറ്റി.കേസിൽ അറസ്റ്റിലായി ജയിലിൽ കഴിയുന്ന ദിലീപിനെതിരെ മൊഴി നല്കാൻ അന്വേഷണ സംഘം  സമ്മർദ്ദം ചെലുത്തുന്നുവെന്നും തന്നെ പ്രതിയാക്കാൻ ശ്രമിക്കുന്നു എന്നുമുള്ള വാദവുമായാണ് നാദിർഷ മുൻ‌കൂർ ജാമ്യാപേക്ഷ സമർപ്പിച്ചത്.ഇതിനു പിന്നാലെ അന്വേഷണ ഉദ്യോഗസ്ഥർ  ഭീഷണിപ്പെടുത്തുന്നു എന്ന് കാണിച്ചു കാവ്യാമാധവനും മുൻ‌കൂർ ജാമ്യാപേക്ഷ സമർപ്പിക്കുകയായിരുന്നു.എന്നാൽ നിലവിൽ ഇരുവരെയും പ്രതിചേർക്കാൻ ഉദ്ദേശിക്കുന്നില്ലെന്ന് അന്വേഷണസംഘം കോടതിയെ അറിയിക്കുകയായിരുന്നു.

കണ്ണൂർ:കണ്ണൂരിൽ സി ജി എച് എസ് ഡിസ്‌പെൻസറി സ്ഥാപിക്കുന്നതിനെതിരെ തിരുവനന്തപുരം ലോബി.തിരുവനന്തപുരത്ത് പ്രവർത്തിക്കുന്ന മൂന്നു ഡിസ്പെൻസറികളിലൊന്ന് കണ്ണൂരിലേക്ക് മാറ്റാനുള്ള കേന്ദ്ര നീക്കത്തിനെതിരെയാണ് തിരുവനന്തപുരത്തു നിന്നും സമ്മർദ്ദമുണ്ടായത്.കേന്ദ്ര സർക്കാർ ജീവനക്കാർക്കും പെൻഷൻകാർക്കും കുടുംബാംഗങ്ങൾക്കും സൗജന്യ ചികിത്സ ലഭ്യമാക്കുന്നവയാണ് സി ജി എച് എസ് ഡിസ്‌പെൻസറി.ഇവിടെ മരുന്നുകളും സൗജന്യമായിരിക്കും. കേരളത്തിൽ അനുവദിച്ചിട്ടുള്ള മൂന്നു ഡിസ്പെൻസറികളും തിരുവനന്തപുരത്താണ് ഉള്ളത്.ഇതിലൊന്ന് കണ്ണൂരിലേക്ക് മാറ്റി സ്ഥാപിക്കണമെന്ന് കെ.കെ രാഗേഷ് എം.പി നേരത്തെ കേന്ദ്ര ആരോഗ്യമന്ത്രിയോട് ആവശ്യപ്പെട്ടിരുന്നു.ഈ ആവശ്യം പരിഗണിക്കാമെന്ന് മന്ത്രി ഉറപ്പുനൽകുകയും ചെയ്തിരുന്നു.ഈ നീക്കത്തിനെതിരെയാണ് തിരുവനന്തപുരത്ത്  നിന്നും എതിർപ്പുണ്ടായിരിക്കുന്നത്.ഡിസ്‌പെൻസറി കണ്ണൂരിൽ നിലവിൽ വന്നാൽ കണ്ണൂർ,കോഴിക്കോട്,കാസർകോഡ് എന്നിവിടങ്ങളിലുള്ള കേന്ദ്ര ഗവ.ജീവനക്കാർക്കും പെൻഷൻകാർക്കും ദീർഘയാത്ര ഒഴിവാക്കാനുള്ള അവസരം ലഭിക്കും.സൗജന്യ ചികിത്സ,മരുന്ന്,മൂന്നു കിലോമീറ്ററിനുള്ളിൽ വീട്ടിലെത്തിയുള്ള ചികിത്സ എന്നിവയും ഡിസ്‌പെൻസറി നിലവിൽ വന്നാൽ ലഭ്യമാകും.